Imisebenti yebaphristi nebaLevi
1Simakadze wakhuluma ku-Aroni, watsi: “Wena, nemadvodzana akho, nemndeni weyihlo kufanele netfwale bubi lobuphambene nendzawo lengcwele; wena-ke nemadvodzana akho niyakwetfwala tono leticondzene nebuphristi benu. 2Letsa bomnakenu labangemaLevi esiveni seyihlo batewuhlangana nawe bakusite ngesikhatsi wena nemadvodzana akho nikhonta ethendeni lebufakazi. 3Kufanele babe ngaphansi kwakho bente umsebenti wonkhe welithende, kodvwa bangasondzeli etimphahleni tendzawo lengcwele nome elatini. Nakwenteka basondzela, bona nani nitakufa. 4Kufanele batihlanganise nani banakekele lithende lekuhlangana, nayo yonkhe imisebenti yalo; kufanele kubete losondzela kini lapho nikhona khona nine.
5“Nine kufanele ninakekele indzawo lengcwele kanye nelilati, khona intfukutselo yaSimakadze ingetiwuphindza yehlele sive sema-Israyeli. 6Mine matfupha ngikhetse labazalwane bakho labangemaLevi emkhatsini wema-Israyeli kutsi babe sipho kini, banikelwe kuSimakadze kutsi bente umsebenti welithende lekuhlangana. 7Kodvwa wena nemadvodzana akho niyawukhonta njengebaphristi kuko konkhe lokukwaselatini nangekhatsi kwendvwangu. Ngininika inkonzo yebuphristi njengesipho. Lowo longakafaneli loyawusondzela eceleni kwalelilati, uyawubulawa.”
Sabelo sebaphristi
8Simakadze wakhuluma ku-Aroni, watsi: “Mine ngikubeka kutsi uphatse iminikelo leletfwe kimi, yonkhe iminikelo lengcwele lenginikwa yona ngema-Israyeli, mine ngiyinika wena nemadvodzana akho kutsi ibe sabelo sakho titukulwane ngetitukulwane. 9Itawuba ngeyenu incenye yaleminikelo lengcwelengcwele lengayiswa emlilweni. Kuto tonkhe tipho labatiletsa kimi njengeminikelo lengcwelengcwele, nome ingeyalokutinhlavu nome yesono nome yelicala, leyo ncenye lengcwele kakhulu yakho nemadvodzana akho. 10Uyakuwudla njengentfo lengcwelengcwele; wonkhe lomdvuna uyakuwudla. Kufanele uwutsatse ube ngcwele.
11“Ngetulu kwaloko, konkhe lokubekwe kwehlukaniswa neminikelo yekujikitiswa yesive sema-Israyeli lesikunikela kimi kutawuba kwenu. Ngikupha wena nemadvodzana akho kanye nemadvodzakati akho kube sabelo sakho titukulwane ngetitukulwane. Wonkhe umuntfu lohlantekile ngekwemtsetfo emndenini wakho angakudla.
12“Ngikupha sonkhe sivuno lesihle setilinga lesinikelwa kuSimakadze kulowo nalowo mnyaka: semafutsa emncumo, neseliwayini kanye nesakolo. 13Tonkhe titselo tekucala letivutsiwe tako konkhe lokusensimini yabo, labakunikela kuSimakadze, tiyawuba takho. Bonkhe bantfu labahlantekile ngekwemtsetfo ekhaya lakho bangakudla.
14“Konkhe lokunikelwe kuSimakadze ka-Israyeli kutawuba kwakho.
15“Sitselo sekucala sesitalo sakho, nome semuntfu nome sesifuyo, lesinikelwe kimi, sitawuba sakho. Kodvwa kufanele ulihlenge litubulo lemuntfu lelingumfana, kanjalo futsi nelitubulo lelidvuna lesilwane lesingcolile ngekwemtsetfo. 16Kufanele kutsi angaba nenyanga budzala, bese niyawahlenga ngaleyo ntsengo yesihlengo setinhlavu tesiliva letisihlanu ngekwesilinganiso lesisemtsetfweni.
17“Kodvwa ningabolihlenga litubulo lenkhomo nome lemvu, nome lembuti, ngobe kungcwele. Ingati yawo kufanele ifafatwe elatini bese kushiswa emanoni awo, kutsi kutewuba ngumnikelo lowentiwa ngemlilo, kube liphunga lelinuka lusi lolumnandzi kuSimakadze. 18Inyama yawo kufanele ibe yakho, njengemganga wemnikelo wekujikitiswa, nemlente wesekudla ube wakho.
19“Konkhe lokwehlukaniselwe eceleni eminikelweni lengcwele lenikelwe ngema-Israyeli kuSimakadze ngikupha wena nemadvodzana akho nemadvodzakati akho, kutsi kube ngusona sabelo sakho titukulwane ngetitukulwane. Kusivumelwane saphakadze seluswayi kuSimakadze, kutsi sibe sakho nesebantfwabakho.”
20Simakadze wakhuluma ku-Aroni, watsi: “Wena uyawubate lifa eveni labo, kantsi uyawubate nesabelo njengabo. Ngimi lengisabelo sakho nelifa lakho esiveni sonkhe sema-Israyeli.”
Sabelo semaLevi
21“Konkhe kwelishumi ngikupha emaLevi kuma-Israyeli, kutsi kube lifa lawo kulowo msebenti lawentako asakhonta kulomsebenti wabo ethendeni lekuhlangana. 22Kusukela manje ema-Israyeli kufanele angasondzeli edvutane nelithende lekuhlangana, ngaphandle kwaloko atawutetfwalela wona umvuzo wekona kwawo, afe. 23NgemaLevi layawukwenta umsebenti welithende lekuhlangana etfwale bubi lobuphambene nalo. Lesi kutawuba simiso lesingeyiwuphindze siguculwe titukulwane ngetitukulwane letitako. Bangeke balinikwa lifa kuma-Israyeli. 24Esikhundleni saloko, emaLevi ngiwapha kutsi lifa lawo kube kwelishumi kwaloko lokunikelwe ngema-Israyeli kuSimakadze. Ngiko nje ngitsite kuwo: ‘Bona bangeke babe nelifa kuma-Israyeli.’ ”
Kwelishumi kwemaLevi
25Simakadze wakhuluma kuMosi, watsi: 26“Khuluma kumaLevi utsi: ‘Nanemukela kuma-Israyeli kwelishumi lokulifa lenu lenginipha lona, nani kufanele ninikele kwelishumi kwaloko kwelishumi kube ngumnikelo waSimakadze. 27Lomnikelo wenu uyawutsatfwa njengalokutinhlavu lokusandza kuhhudlwa nome inkhovu yeliwayini lephuma etjeni lekuhluta emagelebisi. 28Ngaleyo ndlela nani nitawunikela umnikelo wekwelishumi kuSimakadze, niwutsatse kuko konkhe kwelishumi lenikwemukela kuma-Israyeli. Kuko kona loko kwelishumi kufanele ninikele sabelo saSimakadze ngekusinika Aroni, umphristi. 29Kufanele ninikele sabelo saSimakadze kube nguloko lokuhle kakhulu, nalokungcwelengcwele kuko konkhe leninikwe kona.’
30“Khuluma kumaLevi utsi: ‘Naninikela loko lokuhle kakhulu, loko kuyawutsatfwa njengemphumela wekudla lokuhhudliwe nome inkhovu yeliwayini lephume etjeni lekuhluta emagelebisi. 31Nine nemindeni yenu ningakudla-ke konkhe loko lokusalako, ningakudlela nome ngabe nikuyiphi indzawo, ngobe loko kungumholo wenu ngemsebenti leniwentako ethendeni lekuhlangana. 32Njengobe nitawunikela ngalokuhle kakhulu kwako, ningeke nibe nelicala ngaloko; ngako-ke ningeke niyingcolise iminikelo lengcwele yema-Israyeli, futsi ningeke nife ngalelo cala.’ ”
