Taga 24

₁Ungabi namona nebantfu lababi, futsi ungafisi kutsi babe bangani bakho. ₂Etingcondvweni tabo bacabanga budlova, imilomo yabo ikhuluma ngekulimatana.

₃Umuti wakhiwa ngekuhlakanipha, usimiswe ngekucondza; ₄ngelwati tindlu tigcwaliswe ngemicebo lemihle lengakavami.

₅Umuntfu lohlakaniphile unemandla kakhulu, kwendlula sichwaga; yebo, lonelwati uncono kunalonetikhwepha. ₆Ubotsatsa umyalo lohlakaniphile, nawuphuma imphi; kuncoba kusekubeni nebeluleki labalungile labanyenti.

₇Kucondza kungetulu kwemandla esilima; nase kukhulunywa ngempela, kute lesingahle sikusho silima.

₈Umuntfu lohlose kwenta lokubi uyawuba neludvumo lolubi. ₉Tinhloso tesilima tisono, nebantfu bayamtondza umuntfu lowedzelelako.

₁₀Nawukhubatela ngesikhatsi lesibucayi, usuke unemandla lamancane.

₁₁Nawubona bantfu bayawubulawa, ngaphandle kwesizatfu, baphephise; ₁₂ungasho kutsi: “Bengingakwati-ke loku,” ngobe Nkulunkulu uyati, ehlulele tinhloso takho. Lowo lokwelusako uyakwati loko. Yena uyawuvuza lowo nalowo njengekwemisebenti yakhe.

₁₃Ndvodzana yami, ubodla luju ngobe lumnandzi, nematfonsi etinhlanga tetinyosi ayanongotela. ₁₄Yati futsi kutsi kuhlakanipha kumnandzi; ngobe nawutfole kona, unesiciniseko ngelikusasa lakho, nelitsemba lakho alinawuphelela eteni.

₁₅Ungasilingisi sigelekece ngekunyenyela lolungile kutsi umlimate endlini yakhe, ungayihlaseli ngisho nendzawo lapho ahlala khona; ₁₆ngobe nome lolungile angawa emahlandla lasikhombisa, noko uyawuvuka; kodvwa lababi bayawubhubha.

₁₇Ungakujabuleli kuwa kwesitsa sakho, inhlitiyo yakho ingatfokoti nasikhubatela; ₁₈ngobe Simakadze angahle akubone angete ajabula, esuse lulaka lwakhe kuso.

₁₉Ungahlupheki ngebantfu lababi, ungabi namona nabo; ₂₀ngobe umuntfu lomubi akanalo likusasa lelihle. Bumnyama bodvwa lobummele.

₂₁Ndvodzana yami, ubohlonipha Simakadze nenkhosi yeluhlanga. Ungahambisani nalabamelene naSimakadze nenkhosi, ₂₂ngobe bayawubhubha masinyane. Ngubani nje longati tehlakalo letingehliswa nguSimakadze nenkhosi?

₂₃Nati-ke futsi letinye taga talabahlakaniphile:

Kubi nangabe umehluleli ehlulela ngekukhetsa. ₂₄Nangabe akhuluma kulona lolahlwa licala atsi: “Ute licala,” bonkhe bantfu bayakumcalekisa bamtondze; ₂₅kodvwa behluleli labayawuchuma babusiseke, ngulabo labajezisa labo labafanele kujeziswa.

₂₆Umuntfu lonika imphendvulo leyetsembekile ukhombisa bungani lobungibo sibili.

₂₇Cedzela kucala imisebenti yakho yangaphandle, ulungise emasimi akho, bese wakha indlu yakho.

₂₈Ungabenti bufakazi bekulahla makhelwane wakho ngelicala ngaphandle kwesizatfu, ungamcaleli ngisho nemanga. ₂₉Ungasho nekutsi: “Ngitamenta loko langenta kona! Ngitakwenana njengobe enta kimi!”

₃₀Ngase ngendlula eceleni kwensimi yelivila, bekusivini semuntfu longenangcondvo. ₃₁Kwakunemena wesaphulamshini, nembabatane, nelutsango lwakhona seluwile. ₃₂Ngatsi kube ngikubone loku, ngafundza nasi sifundvo: ₃₃“Kulalalala kancane nekwetelatela kancane, kanye nekugoca tandla kancane, uphumule;” ₃₄kodvwa utawutsi usalele, buphuya bukuhlasele njengesigebengu, nekweswela kukuvimbetele njengesifo.