Sihlabelelo 106

₁Haleluya, dvumisani Simakadze!

Bongani Simakadze ngobe muhle,

nemusa wakhe ume

kuze kube phakadze.

₂Ngubani longalandzisa

ngemisebenti lemikhulu yaSimakadze,

avakalise lonkhe ludvumo lwakhe?

₃Babusisiwe labo labahamba ngebucotfo

bente kulunga ngato tonkhe tikhatsi.

₄Awu, Simakadze, ngikhumbule

nawusentela umusa sive sakho,

nami ungisindzise kanye naso,

₅kuze ngibone kuchuma

kwalabakhetsiwe bakho,

ngitfokote ekujabuleni kwesive sakho,

ngitigabise kanye nalabalifa lakho.

₆Sonile tsine kanye nabokhokho betfu,

sente lokubi, sonakele.

₇Ngesikhatsi bokhokho baseseGibhithe

abazange bacaphele timangaliso takho,

futsi abazange bakhumbule

bunyenti betento takho temusa,

kodvwa bakuhlubuka

ngaseLwandle Lolubovu.

₈Noko, Simakadze wabasindzisa,

ngenca yelibito lakhe,

kuze abonakalise emandla akhe lamakhulu.

₉ Wakhalimela Lwandle Lolubovu, lwasha,

wabeweta ekujuleni kwalo,

kwaba shangatsi bahamba ehlane.

₁₀Ngako wabasindzisa esandleni sesitsa,

wabahlenga emandleni esitsa.

₁₁Emanti atimbonya titsa tabo,

kute ngisho nasinye sato lesasala.

₁₂Base bayawakholwa emavi akhe,

bahlabela, bamdvumisa.

₁₃Kodvwa basheshe bayikhohlwa

imisebenti yakhe,

abazange basatilindzela teluleko takhe.

₁₄Bahamba bashangashanga ehlane,

bamlinga Nkulunkulu kalashameshame.

₁₅Wabapha leto tintfo bebaticela kuye,

kodvwa wabatfumela kufa lokwabacedza.

₁₆Basesendleleni baba nemona naMosi

kanye na-Aroni,

longcwele waSimakadze.

₁₇Umhlaba wakhamisa wamita Dathani,

wagcibedzela Abiramu nebalandzeli bakhe,

₁₈kwalumekeka umlilo ebutfweni labo,

lilangabi lashisa

lacedza bonkhe lababi.

₁₉Babumba sitfombe selitfole eHorebe,

bakhotsama kuso sithico lesibunjiwe.

₂₀Bamnyembenya lowo abeludvumo lwabo,

bakhetsa sitfombe senkhomo ledla tjani.

₂₁Bamkhohlwa Nkulunkulu,

uMsindzisi wabo,

labebentele tintfo letinkhulu eGibhithe,

₂₂lekwakuyimisebenti lemangalisako

eveni lakaHhamu,

netintfo letesabekako

ngaseLwandle Lolubovu.

₂₃Ngako-ke watsi utababhubhisa,

kepha Mosi, lokhetsiwe wakhe,

wema emkhatsini,

wabalamlela ngekubashweletela kuNkulunkulu,

kutsi lulaka lwakhe lungababhubhisi.

₂₄Baledzelela live lelihle,

abazange balikholwe livi laSimakadze.

₂₅Bakhonona basemathendeni abo,

abazange balilalele livi laSimakadze.

₂₆Ngako-ke waphakamisa sandla sakhe

wafunga kubo

kutsi uyawubabhubhisa bafele ehlane,

₂₇asakate intalo yabo emkhatsini wetive,

ayihlakatele emaveni.

₂₈Base batihlanganisa nalababekhonta

sithico lesasinguBhali wasePheyori,

badla lokwakuhlatjelwe labaphansi,

₂₉bacunula Simakadze ngetento tabo,

kwabhoboka sifo emkhatsini wabo.

₃₀Kwase kusukuma Finehasi

walamula ngekubulala letephulamtsetfo;

lesifo saphela.

₃₁Loku kwabalelwa kuye njengekulunga

titukulwane ngetitukulwane

kuze kube phakadze.

₃₂Bacunula Simakadze

ngaseticojeni taseMeribha,

Mosi wamhambela kabi ngenca yabo,

₃₃ngobe baphambana naMoya waNkulunkulu,

naMosi waze wakhuluma kubo ngemawala.

₃₄Abazange batibhubhise tive,

njengobe Simakadze abebayalile;

₃₅kodvwa batihlanganisa nebetive,

bafundza kwenta imikhuba yato.

₃₆Bakhonta tithico tato,

letagucuka taba lugibe kubo.

₃₇Banikela ngemadvodzana abo

nemadvodzakati abo,

kutsi abe yimihlatjelo yemadimoni.

₃₈Bacitsa ingati lete licala,

ingati yemadvodzana abo nemadvodzakati abo,

labawahlabela tithico taseKhenani;

ngaloko bangcolisa lonkhe live ngengati.

₃₉Batingcolisa ngetintfo lababetenta,

bangete betsembeka kuNkulunkulu,

bafana netiphingi.

₄₀Ngako-ke intfukutselo yaSimakadze

yasivutsela sive sakhe,

loko lokulifa lakhe

kwaba sinengiso kuye.

₄₁Wabanikela emandleni ebetive,

labo lababatondzako bababusa.

₄₂Titsa tabo tabacindzetela,

batfotjiswa ngephansi kwesandla sato.

₄₃Wabakhulula emahlandla lamanyenti,

kepha batimisela kumelana naye,

bawiswa phansi ngebubi babo.

₄₄Noko walunaka lusizi lwabo,

asakuvile kukhala kwabo.

₄₅Wabevela, wasikhumbula sivumelwane sakhe,

ngenca yemusa wakhe lomkhulu

wabuye wabahawukela.

₄₆Wenta bonkhe batfumbi babo

kutsi babahawukele.

₄₇Sisindzise, Simakadze,

Nkulunkulu wetfu,

sibutse etiveni usicocele ndzawonye,

kuze sibonge libito lakho lelingcwele,

sigungubale ngeludvumo lwakho.

₄₈Akabongwe Simakadze,

Nkulunkulu wema-Israyeli,

kusukela phakadze kuze kube phakadze!

Sive sonkhe asitsi: “Amen!”

Haleluya! Dvumisani Simakadze!