Sihlabelelo 109

₁Awu, Nkulunkulu lengimdvumisako,

ungathuli ungibukelele.

₂Ngobe lababi netikhohlakali tinginyundzele,

baphambene nami bangicalela emanga.

₃Bangitungeleta ngemavi enzondo,

balwa nami ngaphandle kwesizatfu.

₄Umusa wami

bawubonga ngekungibeka licala,

noko mine ngihlala ngikhuleka.

₅Mine ngabentela lokuhle,

bona bangibonga ngalokubi,

lutsandvo lwami balwenana ngenzondo.

₆Bakhuluma batsi:

“Akagwetjwe ngumehluleli lomubi,

ummangaleli wakhe amelane naye.

₇Ekwehlulelweni kwakhe akalahlwe licala,

umthandazo wakhe awubalwe njengesono.

₈Shangatsi imihla yekuphila kwakhe

ingafinyetwa,

lomunye atsatse sikhundla sakhe.

₉Shangatsi bantfwabakhe bangaba tintsandzane,

nemkakhe abe ngumfelokati.

₁₀Shangatsi bantfwabakhe

bangaba tindzindzi letiphila ngekucela;

shangatsi bangakhishwa nakuto letindzala

labahlala kuto kwamanje.

₁₁Shangatsi konkhe lanako

kungadliwa ngumtjelekisi;

shangatsi titfukutfuku takhe

tingadliwa bafokatana.

₁₂Akubete loba nemusa kuye,

kubete nalohawukela tintsandzane takhe.

₁₃Shangatsi intalelwane yakhe

ingaphela nya;

libito lakhe lesulwe

esitukulwaneni lesitako.

₁₄Shangatsi Simakadze

angakhumbula bubi baboyise,

nesono senina singete sesulwa.

₁₅Shangatsi tono tabo

tingema embikwaSimakadze njalo.

Shangatsi bangete baphindze

bakhunjulwe emhlabeni.

₁₆“Ngobe lomuntfu

akazange akhumbule kwenta umusa,

kodvwa labamphofu, nalabandzindzako,

nalabanetinhlitiyo letidzabukile wabahlupha

kwaze kwabasekufeni kwabo.

₁₇Abetsandza kucalekisa.

Shangatsi leticalekiso tingehlela etikwakhe;

akazange asitsandze sibusiso,

shangatsi sibusiso singakhwesha kuye.

₁₈Abembatsa ticalekiso njengengubo,

tangena etibilinini takhe njengemanti,

nasematsanjeni akhe njengemkantja.

₁₉Shangatsi tingamembesa njengelijazi,

nanjengelibhande latibopha ngalo

elukhalweni yonkhe imihla le.”

₂₀Shangatsi Simakadze

angangiphindziselela etitseni tami,

kulabo labakhuluma kabi ngami.

₂₁Kodvwa wena, Nkulunkulu,

Nkhosi yami,

ngivikele ngenca yelibito lakho,

ungephule ngenca yemusa wakho.

₂₂Ngobe mine ngisihlupheki nalomphofu,

inhlitiyo yami idzabukile.

₂₃Ngiyanyamalala kancane kancane,

njengesitfunti nase kuhwalala;

ngiyavitsitwa njengentsetse.

₂₄Emadvolo ami ayaceka

ngenca yekuzila kudla,

umtimba wami wonkhe uyesabeka.

₂₅Ngiyinhlekisa yetitsa tami;

nabangibona, banikina tinhloko.

₂₆Ngisite, Simakadze,

Nkulunkulu wami,

ngisindzise ngelutsandvo lwakho lwaphakadze.

₂₇Shangatsi bangati kutsi

sandla sakho, Simakadze,

lesente loku.

₂₈Bona bangangicalekisa,

kodvwa wena utangibusisa.

Shangatsi labangihlaselako bangehluleka,

shangatsi mine, nceku yakho, ngingatfokota.

₂₉Shangatsi labangimangalelako bangahlazeka,

shangatsi emahloni

angabambonya njengengubo.

₃₀Ngiyawumemeta ngibonge Simakadze,

ngimdvumise esicunjini lesikhulu;

₃₁ngobe ume ngesekudla salomphofu

kutsi amsindzise kulabamgwebela intsambo.