Sihlabelelo 119

₁Babusisiwe

labo labatindlela tabo timsulwa,

labo labahamba

ngemitsetfo yaNkulunkulu.

₂Babusisiwe labo labagcina

imiyalo yaSimakadze,

bamfunisise ngayo yonkhe

inhlitiyo yabo.

₃Labo-ke abakwenti lokungakalungi,

kodvwa bahamba ngetindlela takhe.

₄Wena, Simakadze,

usinike imiyalo yakho,

wasiyala kutsi siyitfobele ngenhlonipho.

₅Shangatsi tindlela tami

tingacondza njalo

ekutigcineni timiso takho.

₆Nangingayigcina yonkhe imiyalo yakho,

ngingeke ngihlazeke.

₇Ngiyawukudvumisa ngenhlitiyo lecotfo

ngesikhatsi ngifundza

tehlulelo takho letilungile.

₈Timiso takho ngitawutilalela;

ungangishiyi nakancane.

₉Umuntfu lomusha angayigcina kanjani

imphilo yakhe ihlantekile?

Ngekucaphela kuhamba ngelivi lakho.

₁₀Ngikufuna ngayo yonkhe inhlitiyo yami,

shangatsi ngingete ngaphambuka

emiyalweni yakho.

₁₁Livi lakho ngililondvolote

enhlitiyweni yami,

kuze ngingoni kuwe.

₁₂Awubongwe, Simakadze!

Ngifundzise timiso takho.

₁₃Ngimemetela ngemlomo wami

tonkhe tehlulelo takho

letiphuma emlonyeni wakho.

₁₄Ngijabulela kuhamba ngemiyalo yakho,

kunekutsi ngibe nebunjinga bonkhe.

₁₅Ngiyawuzindla ngemiyalo yakho,

emehlo ami ngingawesusi

etindleleni takho.

₁₆Ngiyawutfokota ngetimiso takho;

ngingeke ngilikhohlwe livi lakho.

₁₇Mine, sisebenti sakho,

ngicela ungiphatse ngebubele,

kuze ngitewuphila

ngekunakekela livi lakho.

₁₈Vula emehlo ami,

kuze ngibone timangaliso

letisemtsetfweni wakho.

₁₉Ngisihambi lapha emhlabeni,

ungangifihleli imiyalo yakho.

₂₀Umphefumulo wami

sewufile kulangatelela

kwati imitsetfo yakho,

ngato tonkhe tikhatsi.

₂₁Uyabatsetsisa labatidlako;

bacalekisiwe labedukile

emiyalweni yakho.

₂₂Ngikhulule etinhlambeni

nasekungedzeleleni kwabo,

ngobe imiyalo yakho ngiyigcinile.

₂₃Nome emakhosi asahlangene ngami,

mine, sikhonti sakho,

ngiyawuzindla ngetimiso takho.

₂₄Timfundziso takho tikujabula kwami,

ngito letibeluleki bami.

₂₅Ngilahleke phansi elutfulini.

Vuselela kuphila kwami

njengekwelivi lakho.

₂₆Tonkhe tindlela tami ngateneka kuwe,

wena wangiphendvula,

ngako-ke ngifundzise timiso takho.

₂₇Ngente ngiticondzisise timiso takho,

kuze ngikhulume ngetimangaliso takho.

₂₈Lusizi selungicedze emandla,

ngicinise, njengelivi lakho.

₂₉Tindlela temacebo tikhweshise kimi,

ungifundzise umtsetfo wakho ngemusa.

₃₀Ngitikhetsele indlela yeliciniso.

Tehlulelo takho

ngitibeke embikwami njalo.

₃₁Ngibambelele emiyalweni yakho, Nkulunkulu,

ungangijabhisi, ungidlise ngemahloni.

₃₂Ngiyawugijima ngendlela yemiyalo yakho,

ngobe nguwe lotakwandzisa kucondza kwami.

₃₃Ngifundzise, Simakadze,

kuhamba ngetimiso takho,

khona ngiyawuhamba ngato,

kuze kubesekupheleni.

₃₄Ngiphe ingcondvo yekwati umtsetfo wakho,

kuze ngiwugcine kahle,

ngiwulalele ngenhlitiyo yami yonkhe.

₃₅Ngiholele endleleni yemiyalo yakho,

ngobe lendlela iyinjabulo yami.

₃₆Condzisa inhlitiyo yami

ekutfobeleni timiso takho,

ingalitjatiswa yingcebo.

₃₇Fulatselisa emehlo ami

ekubukeni tintfo letingenamsebenti;

ngiphe kuphila ngekwelivi lakho.

₃₈Gcina setsembiso sakho,

lowanginika sona, mine nceku yakho.

Lesetsembiso salabo labakwesabako.

₃₉Ngiphephise ehlazweni lengilesabako,

ngobe timiso takho tilungile.

₄₀Maye, ngiyatilangatelela timiso takho!

Hlumelelisa kuphila kwami

ngekulunga kwakho.

₄₁Shangatsi ungangiphatsa

ngemusa wakho, Simakadze;

ungigone ngensindziso yakho

njengekwesetsembiso sakho.

₄₂Khona-ke ngiyawukwati kubaphendvula

labo labangetfukako,

ngobe livi lakho ngiyaletsemba.

₄₃Ngiphe emandla ekukhuluma liciniso,

ngobe litsemba lami

ngilibeke etimisweni takho.

₄₄Umtsetfo wakho ngiyakuwugcina

phakadze naphakadze.

₄₅Ngiyawuhamba ngekukhululeka,

ngobe ngetamile

kuhlonipha imitsetfo yakho.

₄₆Imiyalo yakho, Nkulunkulu,

ngiyawuyimemetela nasembikwemakhosi,

ngingeke ngibe nemahloni ngayo.

₄₇Ngiyatfokota ngemiyalo yakho,

ngobe ngiyayitsandza.

₄₈Imiyalo yakho ngiyayihlonipha

ngiyitsandze futsi;

ngiyawuhlala ngizindla ngetimiso takho.

₄₉Khumbula setsembiso sakho

lowasenta kimi, mine nceku yakho,

ngobe ngiso lesinginike litsemba.

₅₀Indvudvuto yami

ekuhluphekeni kwami

kutsi setsembiso sakho

singinika kuphila.

₅₁Labatigcabhako bangihleka bulima;

kepha ngingeke ngiphambuke

emtsetfweni wakho.

₅₂Awu, Simakadze, ngiyayikhumbula

imitsetfo yakho yasendvulo,

bese ngiyadvudvuteka ngayo.

₅₃Nangibona tikhohlakali

tephula umtsetfo wakho ngemabomu,

ngitfukutsela ngigcwale kokana.

₅₄Timiso takho tingumgogodla

wetingoma lengitihlabelako,

nome kukuphi lapha ngihlala khona.

₅₅Ebusuku ngikhumbula

libito lakho, Simakadze,

ngizindle ngemtsetfo wakho.

₅₆Nguloku bengikwenta:

Kulalela timiso takho.

₅₇Simakadze usabelo lesilifa lami,

ngetsembisa kuwagcina emavi akho.

₅₈Buso bakho ngibufune

ngayo yonkhe inhlitiyo yami.

Bani nemusa kimi

ngekwesetsembiso sakho.

₅₉Nangicabanga ngetindlela tami,

ngijikisa tinyatselo tami,

ngiticondzise etimisweni takho.

₆₀Angicitsi sikhatsi,

ngivele ngiphutfume,

ngigcine imiyalo yakho.

₆₁Nome lababi banginkinka ngetintsambo,

ngingeke ngiwukhohlwe umtsetfo wakho.

₆₂Ekhatsi nebusuku ngiyavuka ngikubonge,

ngobe imitsetfo yakho ilungile.

₆₃Ngingumngani wabo bonkhe labakwesabako,

labahamba ngetimiso takho.

₆₄Simakadze,

umhlaba ugcwele umusa wakho;

ngifundzise timiso takho.

₆₅Yentele lokuhle inceku yakho, Simakadze,

kuye ngekwelivi lakho.

₆₆Ngifundzise umcondvo lomuhle nekwati,

ngobe litsemba lami

lisemiyalweni yakho.

₆₇Lokwa ngisengakahlupheki

ngenca yekushaywa kwami,

ngangivamise kweduka,

manje sengiyaligcina livi lakho.

₆₈Wena umuhle,

konkhe lokwentako kuhle,

ngifundzise timiso takho.

₆₉Labatigabatisako

bakhuluma emanga ngami;

kodvwa mine,

ngitfobela imitsetfo yakho

ngenhlitiyo yami yonkhe.

₇₀Inhlitiyo yabo ilukhunisa kwelitje,

kepha mine ngitfokotiswa ngumtsetfo wakho.

₇₁Kwaba kuhle kutsi ngihlushwe

kuze ngifundze timiso takho.

₇₂Umtsetfo lophuma emlonyeni wakho

muhle kunemali yonkhe yemhlaba.

₇₃Tandla takho tangidala tangibumba;

ngiphe ingcondvo

yekufundza imiyalo yakho.

₇₄Labesaba wena

bayawutsi nabangibona bajabule,

ngobe mine ngetsemba livi lakho.

₇₅Ngiyati, Nkulunkulu, kutsi

tehlulelo takho tilungile,

nekutsi ungijezise

njengobe kungifanele.

₇₆Umusa wakho

awube yindvudvuto yami

ngekwesetsembiso sakho kimi,

mine, nceku yakho.

₇₇Shangatsi sihawu sakho singehlela kimi,

khona ngiyawuphila,

ngobe umtsetfo wakho uyinjabulo yami.

₇₈Shangatsi labatigabatisako bangahlazeka,

ngobe bangicindzetela

ngaphandle kwesizatfu;

kepha mine ngiyawuzindla

ngetimiso takho.

₇₉Shangatsi labakwesabako

bangagucukela ngakimi,

bona labo labati imitsetfo yakho.

₈₀Shangatsi inhlitiyo yami

ingagcina timiso takho,

kuze ngingehlelwa ngemahloni,

ngihlazeke.

₈₁Umphefumulo wami

ulambele insindziso yakho,

litsemba lami ngilibeke evini lakho.

₈₂Sengigolotele sekuze kubuhlungu emehlo,

solomane ngilindzele setsembiso sakho;

solomane ngiyatibuta namanje, ngitsi:

“Uyawungidvudvuta nini?”

₈₃Kambe mine ngisewani nje?

Sengifanana neludzengelo lolusetaleni,

noko imiyalo yakho angikayikhohlwa.

₈₄Inceku yakho iyawulindzela

kuze kube ngunini?

Uyawubehlulela nini

laba labangitingelela kungihlupha?

₈₅Labatigabatisako bangimbela imigodzi,

ngisho bona kanye

labaphambene nemtsetfo wakho.

₈₆Imiyalo yakho yonkhe yetsembekile.

Ngisite, ngobe bantfu bangitingela

ngaphandle kwesono.

₈₇Bacishe bangibulala,

kepha mine angiphambukanga

emiyalweni yakho.

₈₈Londvolota imphilo yami

ngekwemusa wakho,

kuze ngigcine timiso takho.

₈₉Yebo, Simakadze, livi lakho lime

kuze kube phakadze,

lime licinile ezulwini.

₉₀Kuyawendlula titukulwane netitukulwane,

kodvwa kwetsembeka kwakho

kungeke kugucuke,

wamisa umhlaba, nanyalo usemile.

₉₁Seloku kwema mhlazana kumiswa nguwe,

ngobe konkhe kufanele kukhonte wena.

₉₂Kube umtsetfo wakho

bewungesiyo injabulo yami,

ngabe sengabhubhela ekuhluphekeni kwami.

₉₃Ngingeke ngitikhohlwe timiso takho,

ngobe ungiphilise ngato.

₉₄Ngingewakho, ngisindzise, Nkulunkulu,

ngobe ngifuna kugcina timiso takho.

₉₅Lababi bahlose kungibulala,

kodvwa mine ngiyawucaphela

timiso takho.

₉₆Ngifundze kutsi:

Yonkhe intfo,

nome iyinhle kanganani, inemkhawulo;

kodvwa imiyalo yakho

ite umkhawulo.

₉₇Maye, ngiyawutsandza umtsetfo wakho!

Ngizindla ngawo imini yonkhe.

₉₈Imiyalo yakho ingenta ngihlakaniphe

kwengca titsa tami,

ngobe ihlala kimi njalo.

₉₉Ngicondza kancono

kunabo bonkhe labangifundzisako,

ngobe ngihlala ngizindla

ngetimiso takho.

₁₀₀Lwati lwami lwendlula lwalabadzala kunami,

ngobe ngigcina timiso takho.

₁₀₁Ngiyatincandza tinyawo tami

etindleleni letimbi,

ngobe ngifuna kugcina livi lakho.

₁₀₂Angikaphambuki emtsetfweni wakho,

ngobe nguwe longifundzisile.

₁₀₃Maye, timnandzi tetsembiso takho kimi!

Tinongotela kwengca luju lwetinyosi

emlonyeni wami.

₁₀₄Ngetimiso takho ngitfola kucondza,

ngako-ke ngiyatitondza tindlela temanga.

₁₀₅Livi lakho lisibane etinyaweni tami,

likukhanya endleleni yami.

₁₀₆Ngifungile ngafungisisa kutsi

ngiyawuyilalela imitsetfo yakho yekulunga.

₁₀₇Simakadze,

kuhlupheka kwami kumatima,

ngihlumelelise ngelivi lakho.

₁₀₈Simakadze,

yemukela iminikelo yami yekukudvumisa,

ungifundzise imitsetfo yakho.

₁₀₉Imphilo yami isengotini njalo,

noko angiwukhohlwa umtsetfo wakho.

₁₁₀Lababi bangibekele lugibe,

kodvwa mine ngingeke ngeduke

emtsetfweni wakho.

₁₁₁Timiso takho tilifa lami laphakadze,

yebo, tiyinjabulo yenhlitiyo yami.

₁₁₂Inhlitiyo yami ngiyitfobisele kutsi

yente timiso takho ngize ngife.

₁₁₃Ngiyabatondza bantfu labamphacambili,

kodvwa umtsetfo wakho ngiyawutsandza.

₁₁₄Wena, Nkulunkulu,

usiphephelo sami nesihlangu sami,

litsemba lami ngilibeke evini lakho.

₁₁₅Sukani kimi, nine lababi,

kuze ngigcine imiyalo yaNkulunkulu wami.

₁₁₆Ngisimise ngelivi lakho, kuze ngiphile,

ungangijabhisi ngelitsemba lami.

₁₁₇Ngisekele, kuze ngisindziswe,

ngiyawubheka timiso takho njalonjalo.

₁₁₈Uyabadzela bonkhe

labeduka etimisweni takho,

yebo, bucili babo bulite.

₁₁₉Bonkhe lababi bemhlaba

ubacitsa njengetibi,

kungako ngitsandza timiso takho nje.

₁₂₀Umtimba wami uyatfutfumela

ngenca yekwesaba wena,

netehlulelo takho ngiyatesaba.

₁₂₁Sengikwentile lokulungile nalokucotfo,

ungangiyekeleli kulabangicindzetelako.

₁₂₂Yetsembisa kutsi utayisita inceku yakho,

labatigabatisako

bangete bangicindzetela.

₁₂₃Emehlo ami asacundzekile,

ngifunana nensindziso yakho,

nekugcwaliseka kwesetsembiso sakho.

₁₂₄Phatsa inceku yakho ngemusa wakho,

ungifundzise timiso takho.

₁₂₅Mine ngiyinceku yakho,

ngiphe ingcondvo yekwati

timfundziso takho.

₁₂₆Simakadze, sesikhatsi sakho

sekutsi utsatse tinyatselo,

ngobe umtsetfo wakho uyephulwa.

₁₂₇Imiyalo yakho ngiyitsandza kakhulu,

kwendlula igolide,

ngisho igolide lecengeke kakhulu.

₁₂₈Ngako-ke tinyatselo tami

ngiticondzisa ngato tonkhe timiso takho;

ngiyatitondza tindlela letimbi.

₁₂₉Timiso takho tiyamangalisa,

ngako ngiyatilalela.

₁₃₀Kwembuleka kwemavi akho

kuveta kukhanya,

kuletse kuhlakanipha

kulabangenakucondza.

₁₃₁Ngimita ematse ngilangatelela

kufundza imiyalo yakho.

₁₃₂Ase ugucukele ngakimi,

ube nemusa kimi,

njengobe wenta kubo bonkhe labakutsandzako.

₁₃₃Condzisa tinyatselo tami evini lakho,

angingabuswa ngisho

nangulobuncane bubi.

₁₃₄Ngihlenge ekucindzetelweni bantfu,

kuze ngitewugcina timiso takho.

₁₃₅Ngikhanyise ngebuso bakho

mine, nceku yakho;

ungifundzise timiso takho.

₁₃₆Emehlo ami ageleta tinyembeti,

ngobe bantfu abawugcini umtsetfo wakho.

₁₃₇Wena, Simakadze, ulungile,

nemitsetfo yakho ilungile.

₁₃₈Timiso takho tetsembekile,

tetsembeke kakhulukati.

₁₃₉Kushisekela kwami kungicedzile,

ngobe titsa tami tiwakhohliwe emavi akho.

₁₄₀Tetsembiso takho

tihlanteke ngalokuphelele,

nenceku yakho iyatitsandza.

₁₄₁Nome ngimncane, ngedzelelekile,

noko angiyikhohlwa imiyalo yakho.

₁₄₂Kulunga kwakho kukulunga kwaphakadze,

nemtsetfo wakho uliciniso.

₁₄₃Nome kuhlupheka nelusizi kungehlela,

kodvwa imiyalo yakho ikujabula kwami.

₁₄₄Timiso takho tiliciniso

phakadze naphakadze;

ngifundzise tona ngitewuphila ngato.

₁₄₅Ngikhala kuwe

ngayo yonkhe inhlitiyo yami,

ngiphendvule, Simakadze;

ngiyawutigcina timiso takho.

₁₄₆Ngikhala kuwe ngitsi: “Ngisindzise,

khona ngitawugcina umtsetfo wakho.”

₁₄₇Ngivuka lokwa kuseluvivi,

ngicele lusito,

litsemba lami libambelele evini lakho.

₁₄₈Ebusuku ngiyacwasha ngingalali,

kuze ngizindle ngetetsembiso takho.

₁₄₉Vani livi lami ngemusa wakho;

Simakadze, londvolota imphilo yami

ngekwehlulela kwakho.

₁₅₀Bayasondzela labo labangitondzako,

labanemacebo ebubi,

kodvwa bakhashane nemtsetfo wakho.

₁₅₁Kodvwa wena, Simakadze,

usedvute nami,

nemiyalo yakho iliciniso sibili.

₁₅₂Timiso takho ngatifundza kadzeni,

watimisa ingunaphakadze.

₁₅₃Buka kuhlupheka kwami ungikhulule,

ngobe angikawukhohlwa umtsetfo wakho.

₁₅₄Mela indzaba yami, ungikhulule,

hlumelelisa kuphila kwami

njengekwetsembisa kwakho.

₁₅₅Insindziso ikhashane nalababi,

ngobe abatifuni timiso takho.

₁₅₆Sihawu sakho sikhulu, Simakadze,

hlumelelisa kuphila kwami

ngekwehlulela kwakho.

₁₅₇Banyenti labangitingelako

nalabamelene nami,

kodvwa ngingeke ngikhweshe

etimisweni takho.

₁₅₈Nangibuka tihlubuki,

ngifikelwa kumangala,

ngobe atiyigcini imiyalo yakho.

₁₅₉Nawe, Simakadze, uyatibonela

kutsi timiso takho ngititsandza kanganani.

Londvolota kuphila kwami

ngemusa wakho.

₁₆₀Umgomo welivi lakho liciniso sibili;

tonkhe timiso takho letilungile

tiyawuma kuze kube phakadze.

₁₆₁Tikhulu tingitingela ngaphandle kwesizatfu,

kodvwa livi lakho liyangitfutfumelisa.

₁₆₂Livi lakho ngiyalijabulela,

ngijabule njengemuntfu lotfole umcebo.

₁₆₃Emanga ngiyawatondza ngiwenyanye,

kodvwa ngitsandza umtsetfo wakho.

₁₆₄Ngiyakudvumisa kasikhombisa ngelilanga

ngenca yetehlulelo takho tekulunga.

₁₆₅Bantfu labatsandza umtsetfo wakho

banekuthula lokuphelele,

kute lokuyawubakhuba endleleni.

₁₆₆Yebo, Simakadze,

ngetsemba insindziso yakho,

ngiyayenta imiyalo yakho.

₁₆₇Ngigcina timfundziso takho,

ngobe ngititsandza ngenhlitiyo yami yonkhe.

₁₆₈Ngigcina timiso takho nemiyalo yakho,

ngobe tonkhe tindlela tami tisembikwakho.

₁₆₉Kukhala kwami akufike kuwe, Simakadze,

ngiphe kucondza njengekwelivi lakho.

₁₇₀Kuncusa kwami akute kuwe,

ungikhulule njengekwelivi lakho.

₁₇₁Ngiyawukudvumisa ngaso sonkhe sikhatsi,

ngobe ungifundzisa timiso takho.

₁₇₂Ngiyawuhlabela ngelivi lakho,

ngobe imiyalo yakho yonkhe ilungile.

₁₇₃Shangatsi sandla sakho

singahlala silungele kungisita,

ngobe ngitikhetsele kugcina timiso takho.

₁₇₄Ngomele insindziso yakho, Simakadze,

nemtsetfo wakho ukujabula kwami.

₁₇₅Ase ungiphe kuphila,

khona ngitewukudvumisa;

shangatsi nemiyalo yakho ingangisimisa.

₁₇₆Ngedukile, njengemvu lelahlekile.

Ngifune, mine nceku yakho,

ngobe imiyalo yakho angikayikhohlwa.