Sihlabelelo 132

₁Yebo, Simakadze, khumbula Davide,

kanye nato tonkhe tinhlupheko takhe.

₂Khumbula tifungo takhe kuSimakadze,

netetsembiso latenta

kuSomandla waJakobe nakatsi:

₃“Ngingeke ngingene endlini yami,

nome ngicambalale nasembhedzeni wami,

₄nemehlo ami ngingeke ngiwanike butfongo,

netinkhophe tami kwetela,

₅ngingakamtfoleli Simakadze indzawo,

ngakhe likhaya laSomandla waJakobe.”

₆Seva ngelibhokisi lesivumelwane

ngesikhatsi siseBhetlehema,

salikhandza kulaseJeyarimu.

₇Asambe siye lapho ahlala khona,

siyewukhonta esenabelweni

setinyawo takhe.

₈Phakama, Simakadze,

uye endzaweni yakho yekuphumula,

wena nelibhokisi lesivumelwane sakho,

lelingumfanekiso wemandla akho.

₉Baphristi bakho abembatse kulunga,

labangcwele bakho bahlabele ngekwetsaba.

₁₀Ngenca yaDavide, inceku yakho,

ungamfulatseli umgcotjwa wakho.

₁₁Simakadze wafunga kuDavide,

wenta sifungo langeke ajike kuso, watsi:

“Lomunye wemadvodzana akho

ngiyawumenta abe yinkhosi emvakwakho.

₁₂Nangabe bantfwabakho

bagcina sivumelwane sami netimiso tami

lengiyawubafundzisa tona,

nebantfwababo futsi

bayawuhlala esihlalweni sakho sebukhosi,

kuze kube phakadze.”

₁₃Ngobe Simakadze uyikhetsile iSiyoni,

kutsi ibe likhaya lakhe, watsi:

₁₄“Lena yindzawo yami yekuphumula,

ngiyawuhlala kuyo phakadze naphakadze;

lena yindzawo lengifuna kuyibusa.

₁₅Ngiyawuyibusisa ngako konkhe lekudzingako;

ngesutsise timphuya tayo ngekudla.

₁₆Baphristi bayo ngiyawubembatsisa

ngensindziso,

labangcwele bayo bahlabele ngekujabula.

₁₇Ngiyawuvusa lomunye

wetitukulwane taDavide,

ngimente abe yinkhosi lenkhulu.

Umgcotjwa wami ngimlungiselele sibane,

kutsi bukhosi bakhe bukhanye njalo.

₁₈Titsa takhe ngiyawutembesa ngelihlazo,

kodvwa umbuso wakhe

uyawuphumelela uchume.”