Sihlabelelo 135

₁Haleluya, dvumisani Simakadze!

Dvumisani libito laSimakadze!

Mdvumiseni Simakadze,

nine tinceku takhe,

₂nine lenikhonta endlini yaSimakadze

nasemabaleni endlu yaNkulunkulu wetfu.

₃Dvumisani Simakadze,

ngobe yena muhle.

Hlabelani nidvumise libito lakhe,

ngobe yena unelutsandvo.

₄Ngobe Simakadze utikhetsele Jakobe

kutsi abe wakhe,

ukhetse Israyeli

kutsi abe lifa lakhe.

₅Ngiyati kutsi mkhulu Simakadze,

nekutsi Simakadze wetfu

ungetulu kunabo bonkhe bonkulunkulu.

₆Konkhe Simakadze lakutsandzako uyakwenta

emazulwini nasemhlabeni,

etilwandle kanye nasekujuleni konkhe.

₇Nguye lokhuphula tinkhungu

emikhawulweni yemhlaba.

Wenta imibane ilandzelwe yimvula.

Ukhipha imimoya etingosini takhe.

₈Nguye lowashaya ematubulo aseGibhithe,

ebantfu kanye newetilwane.

₉Watfumela tibonakaliso netimangaliso,

emkhatsini wakho, wena Gibhithe,

wamelana naFaro

kanye netinceku takhe tonkhe.

₁₀Washaya tive letinyenti,

wabulala emakhosi lanemandla.

₁₁Wabulala Sihoni, inkhosi yema-Amori.

Wabulala Ogi, inkhosi yaseBhashani,

kanye nawo onkhe emakhosi aseKhenani.

₁₂Wenta live lawo laba lifa,

walenta lifa laka-Israyeli, sive sakhe.

₁₃Simakadze, libito lakho lime

kuze kube phakadze.

Nkhosi, titukulwane ngetitukulwane

tiyawuhlala tikukhumbula.

₁₄Simakadze uyawubavikela bantfu bakhe,

ahawukele tinceku takhe.

₁₅Tithico tebetive tiyigolide nesiliva,

tingumsebenti wetandla temuntfu.

₁₆Tinemilomo, kodvwa atikhulumi,

tinemehlo, kodvwa atiboni,

₁₇tinetindlebe, kodvwa ativa,

atikwati ngisho nekuphefumula imbala.

₁₈Labo labatentako

bayawufanana nato,

nabo bonkhe labetsembele kuto.

₁₉Dvumisani Simakadze,

nine mndeni waka-Israyeli!

Dvumisani Simakadze,

nani mndeni waka-Aroni!

₂₀Dvumisani Simakadze,

nine mndeni wakaLevi,

nani nonkhe, lenesaba Simakadze,

mdvumiseni!

₂₁Akabongwe Simakadze eSiyoni,

yena lohlala eJerusalema.

Akabongwe Simakadze.