Sihlabelelo 138

₁Ngiyakubonga, wena Simakadze,

ngayo yonkhe inhlitiyo yami;

ngikunika ludvumo

embikwabo bonkhe bonkulunkulu.

₂Ngiyawukhuleka

embikwelithempeli lakho lelingcwele,

ngibonge libito lakho

ngenca yemusa wakho

nekwetsembeka kwakho.

Ngobe libito lakho nelivi lakho

uliphakamisele ngetulu kwako konkhe.

₃Ngatsi nangikhala kuwe,

wangiva wangiphendvula,

wanginika sibindzi ngekungicinisa.

₄Onkhe emakhosi emhlaba

ayawukubonga wena, Simakadze,

ngobe awevile emavi akho.

₅Ayawuhlabelela wena, Simakadze,

ngobe bukhulu bukhosi baSimakadze.

₆Nome Simakadze aphakeme kangaka,

uyabanakekela labatitfobako;

kodvwa labatiphakamisako

ubabukela khashane.

₇Nome sengitungeletwe tinhlupheko,

wena, Simakadze,

uyayiphephisa imphilo yami,

ungivikele elulakeni lwetitsa tami,

unginyomule ngesandla sakho sekudla.

₈Simakadze uyawusifeza kimi

setsembiso sakhe;

umusa waSimakadze ume

kuze kube phakadze.

Cedzela lomsebenti wakho lowawusungula,

ungawukhohlwa umsebenti

wetandla takho.