Sihlabelelo 18

₁Ngiyakutsandza, Simakadze,

wena, longemandla ami.

₂Simakadze, ulidvwala lami,

nenqaba yami, neMkhululi wami.

Nkulunkulu wami, ulidvwala lami

lengiphephela kulo.

Usihlangu sami sekungivikela

nemandla ensindziso yami.

Yena ungumgedze wami wekubhaca.

₃Ngikhala kuSimakadze,

bese uyangephula etitseni tami.

Akadvunyiswe Simakadze!

₄Tintsambo tekufa tangitungeleta,

tikhukhula tembhubhiso tangigabudzela.

₅Tintsambo telithuna tatingitsandzele,

tingibe tekufa tangitfonya.

₆Ngakhala kuSimakadze

ngisekudzangaleni kwami,

ngacela lusito kuNkulunkulu wami.

Waliva livi lami asendlini yakhe,

kuncusa kwami, nekukhala kwami, nekuthandaza kwami

kwangena etindlebeni takhe.

₇Umhlaba watfutfumela, watamatama,

netisekelo tetintsaba tatfutfumela, tatamatama,

ngobe Somandla abesatfukutsele.

₈Emakhala akhe akhafula intfutfu,

umlomo wakhe wakheputa umlilo locotfulako

kuwo kwakhehleka emalahle labovu.

₉Wabhobosa emazulu, wehlela phansi.

Emafu lamnyama abengaphansi kwetinyawo takhe.

₁₀Wagibela likherubhi, wandiza,

wantjuza asetikwemaphiko emoya.

₁₁Wenta bumnyama baba yingubo yakhe,

watungeletwa ngemafu lahlomile, lamnyama.

₁₂Ebukhatikhatini bebukhona bakhe kwaphambana imibane,

kwavela emafu lamnyama lahlomile,

kwehla sangcotfo nemalahle lavutsako.

₁₃Simakadze wabhavumula asezulwini.

Losetikwako Konkhe walivakalisa livi lakhe,

kwehla sangcotfo nemalahle lavutsako.

₁₄Wajijimeta ngemicibisholo yakhe,

kwasakateka titsa,

watigalela ngemibane,

watidzidzitelisa, tasiphuka.

₁₅Kujula kwetilwandle kwenekeka ebaleni,

tisekelo temhlaba tembuleka,

ngenca yekutsetsa kwakho, Simakadze,

nangenca yekufutsa kwemakhala akho.

₁₆Welula ingalo yakhe akulelisetulu,

wayehlisela phansi, wangibamba,

wangenyula ekujuleni kwemanti.

₁₇Wangephula esitseni sami lesinemandla,

wangephula nakulabangitondzako,

ngobe babenemandla kakhulu kunami.

₁₈Bangidvumela

ngesikhatsi ngehlelwa sehlakalo,

kodvwa Simakadze waba sihlangu sami.

₁₉Wangikhiphela endzaweni lebanti;

wangephula, ngobe abejabula ngami.

₂₀Simakadze wangiphatsa njengekulunga kwami,

wangivuza njengebumsulwa betandla tami,

₂₁ngobe imiyalo yaSimakadze ngiyigcinile.

Angikenti lutfo lolubi;

angikamfulatseli Nkulunkulu wami.

₂₂Yonkhe imiyalo yaNkulunkulu isembikwami,

angikatikhweshisi kimi timiso takhe.

₂₃Bengisolo ngite sici embikwakhe,

ngitigcinile ngangete ngona.

₂₄Ngako-ke Simakadze

ungivuze njengekulunga kwami,

ngobe uyati kutsi

tandla tami timsulwa.

₂₅Kulowetsembekile

wena utibonakalisa wetsembekile,

kulongenacala

wena utibonakalisa ucotfo,

₂₆kulohlantekile

wena utibonakalisa uhlantekile,

kodvwa kulosigwegwe

wena utibonakalisa ulukhuni.

₂₇Wena, losindzisa labatfobekile,

uyabatfobisa labatigabatisako.

₂₈Nguwe lowokhela sibane sami,

Simakadze, Nkulunkulu wami;

ugucula bumnyama bami

abente bube kukhanya.

₂₉Ngawe ngisengayidvungulula imphi;

ngaloNkulunkulu wami

ngisengagalaja lubondza lwetitsa.

₃₀Indlela yaNkulunkulu ilungile,

livi laSimakadze letsembekile.

Yena usihlangu sabo bonkhe

labaphephela kuye.

₃₁Kambe nje ngubani longuNkulunkulu,

ngaphandle kwaSimakadze?

Ngubani lolidvwala,

ngaphandle kwaloNkulunkulu wetfu?

₃₂Nguye loNkulunkulu

longihlomisa ngemandla,

ente indlela yami icondze,

ibe msulwa.

₃₃Wenta tinyawo tami

tibe lula njengetenyamatane,

angente ngiphephele ekuphakameni.

₃₄Yena wenta tandla tami

tifundzele kulwa,

kuze imikhono yami yetayele

kugoba butjoki belitfusi.

₃₅Ungihlomisa ngesihlangu sensindziso yakho.

Sandla sakho sangesekudla sangisimisa,

utehlisa wena kuze uphakamise mine.

₃₆Wentele tinyatselo tami indzawo lebanti

kuze emacakala ami angabhinyiliki.

₃₇Titsa tami ngaticosha,

ngaze ngatikhandza, ngativimbetela,

angizange ngincandzeke ngingakaticedzi.

₃₈Ngatiphahlata taze tehluleka kuvuka,

tawela ngaphansi kwetinyawo tami.

₃₉Wangihlomisa ngemandla ekulwa imphi.

Titsa tami watitfobisa ngaphansi kwami.

₄₀Titsa tami watidvungulula, tabaleka,

ngabacedza bonkhe labangitondzako.

₄₁Bakhala, bacela lusito,

kodvwa kwabate lobasindzisako;

bahlaba inyandzaleyo kuSimakadze,

kodvwa akazange abaphendvule.

₄₂Ngabagaya baba njengelutfuli

lolupheshulwa ngumoya,

ngabasaphata njengeludzaka lwendlela.

₄₃Wangisindzisa embangweni wesive sakitsi,

wangibeka ngaba yinhloko yetive.

Sive lengingazange sengisati sitangikhotsama.

₄₄Betive batsi bangangiva, bangihlonipha masinyane,

beta kimi bakhasa.

₄₅Bonkhe baphelelwa ngemandla,

beta bachachatela

baphuma emigedzeni yabo.

₄₆Simakadze uyaphila!

Alidvunyiswe lidvwala lami!

Akaphakanyiswe Nkulunkulu

loyinsindziso yami!

₄₇UnguNkulunkulu longiphindziselelako,

lotsambisa tive ngaphansi kwami.

₄₈Wangikhulula etitseni tami,

wangiphakamisa ngaba ngetulu

kwalabo labamelene nami,

wangephula kubantfu belutfutfuva.

₄₉Ngako-ke ngiyawukudvumisa wena, Simakadze,

emkhatsini wetive,

ngikugambute ngetibongelelo teLibito lakho.

₅₀Nguwe, Nkhosi, umenti wankhulu,

inkhosi yakho uyiphe

kuncoba timphi ngetimphi,

wentele logcotjiwe wakho

umusa wakho longapheli,

yebo, Davide netitukulwane takhe,

phakadze naphakadze.