Sihlabelelo 39

₁Ngacabanga ngatsi:

“Ngiyawunakekela tindlela tami,

kuze ngingoni ngelulwimi lwami,

umlomo wami ngiyakuwufaka sifonyo,

yingci nangisesembikwalomubi.”

₂Ngaba simungulu, ngabindza,

ngangete ngasho lutfo nangalokuhle.

Tinhlungu tadlanga.

₃Inhlitiyo yami yavutsa,

yashisa ngekhatsi kwami,

ngisacabanga ngizindla ngaloko,

kwaphembeka umlilo kimi,

ngadzimate ngakhuluma ngatsi:

₄“Simakadze, ngatise sigcino sami,

ungatise nebungako bekuphila kwami,

ncono ngati kutsi

ngiyendlula lapha emhlabeni.”

₅Imihla yami ingangemphama yesandla.

Kuphila kwami kubukeka kulite kuwe.

Impela, kuphila kwemuntfu kunjengenkhungu. Cabanga.

₆Impela, kuphila kwemuntfu kunjengesitfunti.

Utihlupha ngelite nje.

Ucongelela ingcebo,

akabati labatawuyidla.

₇Manje-ke, Nkhosi, ngisalindzeleni?

Litsemba lami likuwe.

₈Ngikhulule kuto tonkhe tiphambuko tami,

ungavumi ngibe yinhlekisa yetilima.

₉Ngiyawuvala umlomo wami ngingasho lutfo,

ngobe kunguwe longente ngahlupheka.

₁₀Susa kimi umvimba wakho lobuhlungu,

sengifile tidvubule tekushaya kwakho.

₁₁Nawekhuta umuntfu,

umjezisa ngenca yekona kwakhe,

umhlikite njengendvwangu lenhle kakhulu

nayidliwa ngumvunya.

Impela, kuphila kwemuntfu kunjengenkhungu. Cabanga.

₁₂Hhawu, Simakadze!

Lalela umkhuleko wami,

ubeke indlebe yakho ekuncuseni kwami,

ungatitibi tinyembeti tekukhala kwami.

Ngobe mine ngingumfokati lokhosele kuwe,

ngisihambi njengabokhokho bami bonkhe.

₁₃Ngiyekele!

Ungabe uloku ungigolotele,

ngobe ngifuna kuphindze ngijabule,

ngingakahambi emhlabeni.