Sihlabelelo 41

₁Ubusisiwe umuntfu lonakekela lobutsakatsaka,

Simakadze uyawumsindzisa

ngelilanga lekuhlupheka.

₂Simakadze uyawumlondvolotela imphilo yakhe;

uyawumenta abe ngulonenhlanhla emhlabeni,

angeke amnikele entsandvweni yetitsa takhe.

₃Simakadze uyawumcinisa nakagula,

amphilise nakubo bonkhe butsakatsaka bakhe.

₄Mine-ke ngatsi:

“Awu, Simakadze, ngihawukele,

ungiphilisele umphefumulo wami,

ngobe ngonile kuwe.”

₅Titsa tami tikhuluma kabi ngami,

titsi: “Kantsi yena uyawufa nini

libito lakhe litewuphela?”

₆Nakukhona lotengihlola

ufike atentise angitsatse ematfoko,

kantsi enhlitiyweni yakhe

ugaya tiboti ngami,

utsi angesuka lapho

ayifafate lonkhe live.

₇Bonkhe labangitondzako

bahlebelana ngami,

basonge lokubi kakhulu ngami.

₈Batsi: “Ubanjwe sifo lesesabekako,

angeke aphindze avuke.”

₉Ngisho nemngani wami lengangimetsemba,

nalengangidla esitjeni sinye naye,

sewungidlangele ngebunyoka nebumbulu.

₁₀Kepha wena, Simakadze,

ngihawukele ungiphilise,

kuze ngitiphindzisele kubo.

₁₁Ngati kahle kamhlophe

kutsi wena uyangitsandza,

ngobe sitsa sami awukasivumeli

kutsi sitigabatise ngekungehlula.

₁₂Yebo, ungisimisa ngebucotfo bami

ungimise ebukhoneni bakho,

phakadze naphakadze.

₁₃Akabongwe Simakadze,

Nkulunkulu wema-Israyeli,

kusukela phakadze

kuze kube phakadze.

Amen! Yebo, Amen!