Sihlabelelo 45

₁Inhlitiyo yami itsintsekile ngalendzaba,

ngigeceta nginkentete;

ngibalisa ngetibongo enkhosini,

lulwimi lwami lunjengelutsi lwekubhala

lwalobhala ngebungcweti.

₂Awusemuhle nekadzeni,

uphuma embili,

umlomo wakho uphuphuma umusa,

ngobe Nkulunkulu ukubusise

phakadze naphakadze.

₃Hhawu, chawe lemachawe,

bophela inkemba yakho elukhalweni lwakho,

uhlome ngenkhatimulo yakho

nangebukhosi bakho.

₄Yebo, gibela ngebukhosi bakho,

uphume imphi, uyewuncoba,

umele liciniso, uvikele nekulunga;

shangatsi sandla sakho sangesekudla

singafundzisa imisebenti yakho lesabekako.

₅Imicibisholo yakho iyakhalipha,

ihlaba inhlitiyo yetitsa tenkhosi,

udle netive, utilahle ngaphansi kwakho.

₆Sihlalo sakho sebukhosi, Nkulunkulu,

saphakadze naphakadze,

kubusa kwakho kumsulwa, akukhetsi.

₇Kulunga uyakutsandza,

kodvwa uyakutondza lokubi.

Ngako-ke, Nkulunkulu,

longuNkulunkulu wakho,

ukugcobise ngemafutsa enjabulo,

wakuphakamisa ngetulu kwebangani bakho.

₈Tonkhe tingubo takho titselwe

ngemakha emure, newenhlaba, newemphepho.

Esigodlweni lesihlotjiswe

ngekwematinyo endlovu,

kuvakala tintsambo

letikhala kamnandzi naletitfokotisako.

₉Emadvodzakati emakhosi

asemkhatsini wetintfombi takho telikhetselo;

nangesandleni sakho sangesekudla

kume indlovukazi levunule tembatfo

tegolide yase-Ofiri.

₁₀Kuwe-ke, ndvodzakati yami, ngitsi:

“Vula indlebe yakho,

ulalele naku lengikushoko:

Sikhohlwe sive sakini nebakenu.

₁₁Lobuhle bakho-ke buyawuyikhanga lenkhosi;

uyitfobele, ngobe ingumyeni wakho.

₁₂Wena, ndvodzakati yaseThire,

tingcunga tiyawutincengela kuwe

ngekukuletsela tipho.”

₁₃Kucwebetela kodvwa lokusesigodlweni,

inkhosatana yembetse tingubo

letelukwe ngegolide.

₁₄Imikiswa enkhosini,

yembetse bukhatikhati,

ihamba netintfombi letitimphekeleteli,

letishuca emvakwayo, nato tiya kuyo.

₁₅Bamikiswa kuyo ngekujabula nangekutsakasa,

nabangena esigodlweni sengwenyama.

₁₆Emadvodzana akho, nkhosi,

ayawubasetikhundleni taboyise,

uyakuwabeka abe tikhulu eveni lonkhe.

₁₇Libito lakho ngiyakulenta likhunjulwe

titukulwane ngetitukulwane,

ngako-ke tive tiyawukubonga

kuze kube phakadze naphakadze.