Sihlabelelo 50

₁Nkulunkulu wabonkulunkulu

unguSimakadze lokhulumako.

Umemetela emhlabeni wonkhe,

kusukela emphumalanga

kuye enshonalanga.

₂ESiyoni lenebuhle lobuphelele,

kulapho Nkulunkulu akhatimula khona.

₃Nkulunkulu wetfu uyeta,

angeke abindze.

Embikwakhe kunemlilo locotfulako,

utungeletwe sivunguvungu lesesabekako.

₄Ubita emazulu ngetulu kanye nemhlaba,

kutsi atekwehlulela bantfu bakhe, atsi:

₅“Baletseni la bonkhe labangcwele bami

labenta nami sivumelwane ngemhlatjelo!”

₆Emazulu amemetela kulunga kwakhe,

ngobe Nkulunkulu ungumehluleli. Cabanga.

₇“Lalelani-ke, sive sami, nginitjele.

Ye Israyeli, nginibeka licala!

Ngimi Nkulunkulu, longuNkulunkulu wenu.

₈Anginitsetsiseli imihlatjelo yenu,

yebo, umhlatjelo loshiswa wonkhe

uhlala usembikwami sonkhe sikhatsi.

₉Angidzingi kutsatsa tinkunzi emitini yenu,

angidzingi ngisho netiphongo

etibayeni tenu imbala,

₁₀ngobe tonkhe tilwane tesiganga tami,

ngisho netinkhomo leteluke emagcumeni

latinkhulungwane ngetinkhulungwane,

₁₁ngati tonkhe tinyoni tesiganga,

konkhe lokuphilako kwesiganga kwami.

₁₂“Kube bengilambile,

bengingeke nginitjele,

ngobe umhlaba nako konkhe lokukuwo kwami.

₁₃Kantsi mine ngiyayidla yini

inyama yetinkunzi,

nome ngiyayinatsa yini ingati yetiphongo?

₁₄Nikela kuNkulunkulu umnikelo wekubonga,

ugcine tetsembiso takho

kuLosetikwako Konkhe.

₁₅Khala kimi ngetikhatsi tekuhlupheka,

ngiyawukukhulula, bese uyangidvumisa.”

₁₆Kodvwa kulomubi Nkulunkulu utsi:

“Unalungelo lini lekukhuluma ngetimiso tami

uphatse sivumelwane sami ngemlomo wakho?

₁₇Ngobe wena uyakutondza kuyalwa,

emavi ami uwengca ngetulu.

₁₈Utsi ungabona lisela,

ube ngematse nelulwimi nalo,

umdzibi ndzawonye netiphingi.

₁₉“Umlomo wakho ulula ekukhulumeni lokubi,

lulwimi lwakho

lubumba emacebo nenkhohliso.

₂₀Uhlala ngekuhleba umnakenu,

unyembenye indvodzana yenyoko.

₂₁Loko ukwentile,

kodvwa mine ngathula;

wenta shangatsi mine ngifanana nawe.

Kodvwa sengitakwekhuta,

ngitawubeka licala emehlweni akho ubuka.

₂₂“Caphelani loku

nine lenedzelela Nkulunkulu,

funa nginiklebhuklebhule,

kubete nalongahle aniphephise.

₂₃Lowo lonikela umnikelo wekubonga,

uyangidvumisa.

Utiphendlela indlela,

kutsi ngimkhombise

insindziso yaNkulunkulu.”