Sihlabelelo 68

₁Nkulunkulu nakasukuma,

titsa takhe tiyasakateka,

labamtondzako babaleke embikwakhe.

₂Bayaphephuka

njengekupheshulwa kwentfutfu,

bayancibilika njengemtfwebeba

nawuseceleni kwemlilo.

Bacitfwa kanjalo-ke lababi

embikwaNkulunkulu.

₃Kepha labalungile bayajabula

betsabe embikwaNkulunkulu,

bajabula nekujabula.

₄Hlabelani kuNkulunkulu,

nidvumise libito lakhe.

Nimlungiselele umgwaco,

yena lodzabula ematsafa elugwadvule;

nguSimakadze libito lakhe,

nihlabele ngenjabulo embikwakhe!

₅Nguye uyise wetintsandzane,

nemlondvoloti webafelokati,

unguNkulunkulu

losendzaweni yakhe lengcwele.

₆Nkulunkulu upha imihambima emakhaya

lapho ingahlala khona,

lababoshiwe abaholele ekubuseni,

kodvwa labaphika inkhani

ubahlalisa ehlane.

₇Nkulunkulu!

Ekuphumeni kwakho

nawuhola sive sakho,

udzabula naso ehlane, Cabanga.

₈umhlaba watamatama,

emazulu antfontsa imvula,

embikwaNkulunkulu,

entsabeni yaseSinayi,

ngesikhatsi kuta wena, Nkulunkulu,

Nkulunkulu wema-Israyeli.

₉Wanisa imvula lenkhulu, Nkulunkulu,

wahlumisa live lakho lelase ligagadzekile.

₁₀Sive sakho sakha emakhaya aso kulo,

ngebuhle bakho, Nkulunkulu,

uyabalungisela labeswele.

₁₁Simakadze wakhipha umyalo wakhe.

Sicumbi lesikhulu salabasikati

saphuma salilitela satsi:

₁₂“Emakhosi etimphi ayabaleka nekubaleka.”

Labasikati emakhaya

bebasehlukaniselana imphango,

₁₃ngesikhatsi emadvodza asaphumula etibayeni.

Imphango bekulituba lelinetimphiko tesiliva,

tinsiba tiyigolide lecwebetelako.

₁₄Ngesikhatsi Somandla advungulula emakhosi

lalikhitsika entsabeni iSalmoni.

₁₅Uyintsaba yaSomandla,

wena ntsaba yaseBhashani!

Uyintsaba leneticongo letinyenti,

wena ntsaba yaseBhashani!

₁₆Wena ntsaba leneticongo letinyenti,

uyibukelani ngeliso lelibi lemona,

lentsaba lekhetfwe nguNkulunkulu,

watsandza kutsi ibe likhaya lakhe?

Simakadze uyawuhlala kulo

kuze kube phakadze.

₁₇Tincola taNkulunkulu

titinkhulungwane letingemashumi

netinkhulungwane ngetinkhulungwane,

Simakadze usemkhatsini wato

ngebukhosi bakhe

lobunjengebungcwele baseSinayi.

₁₈Wena, Simakadze,

wenyukela entsabeni lendze,

watfumba labanyenti labatfunjiwe,

wemukele tipho kubantfu,

watemukela ngisho nakubo

labamelene nawe,

kuze uhlale khona wena, Simakadze.

₁₉Akadvunyiswe Simakadze,

ngobe usitfwalela imitfwalo yetfu

onkhe emalanga,

nguNkulunkulu loyinsindziso yetfu. Cabanga.

₂₀Nkulunkulu,

longuNkulunkulu wetfu,

unguNkulunkulu wensindziso,

emandla ekubalekela kufa

ngewaSimakadze iNkhosi.

₂₁Empeleni, Nkulunkulu uyawutiphohlota,

tinhloko tetitsa takhe,

aphihlite netinkhakhayi

talabaphikelela etonweni.

₂₂Simakadze wakhuluma watsi:

“Titsa takho ngiyawutibuyisa naseBhashani,

ngibuyise naletisekujuleni kwelwandle,

₂₃kuze tinyawo takho tibhocote

engatini yetitsa tenu,

netinja takho tibe nesabelo

ekudleni lengati yetitsa takho.”

₂₄Yebo, Nkulunkulu!

Tibonwa ngibo bonkhe letindvwendvwe takho,

ticondze endlini lengcwele,

tindvwendvwe taNkulunkulu wami,

iNkhosi yami.

₂₅Tiholwa ngulabahlabelako,

emuva kugcine labashaya tingubhu

letinetintsambo,

emkhatsini wabo kuhamba tintfombi,

letishaya bokhencekhence, titsi:

₂₆“Bongani Nkulunkulu emikhambatsini

nidvumise Simakadze,

nine beluhlanga lwaka-Israyeli.”

₂₇Nango Bhenjamini litfunjana, abahola,

tikhulu takaJuda tiyincumbi,

nati netikhulu takaZebuloni netakaNaftali.

₂₈Veta emandla akho, Nkulunkulu!

Sibonise emandla akho, Nkulunkulu,

lawo mandla lowawabonakalisa kitsi

₂₉ngesikhatsi usethempelini lakho, eJerusalema,

emakhosi atakuletsela tipho takho khona.

₃₀Sekhute lesilwane semhlanga, iGibhithe,

uwekhute nalomhlambi wetinkunzi

losemkhatsini wematfole etive.

Bayagcobagcobana, babange imali,

basakate leto tive,

bajatjuliswe kususa lutfutfuva lwemphi.

₃₁Emancusa ayawuvela eGibhithe,

naKushe atinikele kuNkulunkulu.

₃₂Hlabelani kuNkulunkulu,

nine mibuso yemhlaba,

hlabelani nidvumise Simakadze. Cabanga.

₃₃Simakadze ugibela emazulu,

wona lawo mazulu asendvulo.

Yena uvakalisa liphimbo lelivi lakhe,

lona liliphimbo lelinemandla.

₃₄Memetelani emandla aNkulunkulu,

bukhosi bakhe bengamele sive saka-Israyeli,

nemandla akhe asetulu esibhakabhakeni.

₃₅Uyesabeka, Nkulunkulu,

endzaweni yakho lengcwele.

Nkulunkulu wema-Israyeli,

nguwe lonika bantfu emandla nekucina.

Akadvunyiswe Nkulunkulu!