Sihlabelelo 80

₁Sive, Melusi waka-Israyeli,

wena lohola Josefa njengemhlambi wetimvu.

Wena lohlala emkhatsini wemakherubhi,

bonakala ngekukhatimula kwakho.

₂Vusa emandla akho

embikwa-Efrayimu, naBhenjamini, naManase,

ute utewusisita.

₃Sibuyisele kuwe, Nkulunkulu.

Khanyisa buso bakho bumengetele,

kuze sisindziswe.

₄Awu, Simakadze,

Nkulunkulu wemabandla!

Kutawuze kube ngunini

ucansulwa ngimithandazo yesive sakho?

₅Wabapha sinkhwa ngetinyembeti,

wabanatsisa ngetinyembeti.

₆Wenta kutsi bomakhelwane betfu basibange,

titsa tetfu tisihleke bulima.

₇Sibuyisele kuwe,

Nkulunkulu wemabandla!

Khanyisa buso bakho bumengetele,

kuze sisindziswe.

₈Wazuphuna umvini eGibhithe,

wacosha tive,

wase uwuhlanyela eveni lato.

₉Wawulungisela umhlaba wekuhlanyela,

wakhula, wajula, wenaba,

wagcwala live.

₁₀Tintsaba tambonywa ngematfunti awo,

imisedari yambonywa ngemagala awo,

₁₁enabisa emagala awo

adzimate efikela elwandle,

ahluma adzimate efika eMfuleni.

₁₂Pho, wena uludziliteleni

lolutsango loluwutungeletile lomvini?

Manje bonkhe labendlulako

bangateba kalula letitselo tawo.

₁₃Tingulube tesiganga tiyawuvukuta,

tonkhe tilwane tesiganga tiyawudla.

₁₄Awu, Nkulunkulu wemabandla!

Phendvuka futsi!

Buka phansi usetulu ezulwini,

ubone lomvini wakho, uwunakelele,

₁₅wona lowo mvini

lowawuhlanyela ngesandla sakho sangesekudla,

naleligala lotikhulisele lona.

₁₆Labawujubile bawushisa ngemlilo,

bayawubhujiswa kubhekwa buso bakho.

₁₇Kodvwa shangatsi sandla sakho

singamlondvolota,

lowo longasesandleni sakho sekudla.

Ngiyo indvodzana lotikhulisele yona.

₁₈Singeke siphindze sikuhlamuke,

siphe kuphila siphile,

tsine-ke siyawube sesikhuleka egameni lakho.

₁₉Sibuyisele kuwe,

Nkulunkulu wemabandla!

Khanyisa buso bakho bumengetele,

kuze sisindziswe.