Sihlabelelo 88

₁Simakadze,

Nkulunkulu wensindziso yami.

Ngikhala kuwe imini nebusuku.

₂Shangatsi umkhuleko wami ungefikela kuwe,

beka indlebe yakho,

uve kukhala kwami.

₃Ngobe umphefumulo wami ugcwele tinsizi,

nekuphila kwami sekusondzele ethuneni.

₄Ngibalwa kanye nalabacondze emgodzini,

nginjengendvodza lete emandla.

₅Sengibalelwa kulabafile njengalababulewe,

lese balala emathuneni,

bona labo longasabakhumbuli,

yebo, lese bancunywa kuwe.

₆Ungifake emgodzini lojule kunayo yonkhe,

etindzaweni letimnyama nasetingungwini.

₇Lulaka lwakho luyangisindza.

Emagagasi akho ayangicindzetela. Cabanga.

₈Bangani bami ubakhweshisile kimi,

wangenta ngaba sinengiso kubo.

Ngivalelekile, angikhoni kuphuma.

₉Liso lami liyafa ngenca yelusizi,

ngikhala kuwe, Simakadze,

imini nebusuku

ngiphakamisa tandla tami,

ngikhuleka kuwe.

₁₀Labafile uyabentela yini timanga?

Bayavuka yini emathuneni bakudvumise? Cabanga.

₁₁Umusa wakho

kungakhulunywa yini ngawo ethuneni?

Kwetsembeka kwakho

kungakhulunywa yini ngako ekubhujisweni?

₁₂Timangaliso takho

tingatiwa yini ebumnyameni?

Kulunga kwakho

kuyatiwa yini eveni

lalabo labangasakhumbuli?

₁₃Kodvwa mine, Simakadze,

ngikhala kuwe, ngicela lusito,

kutsi kusa

ube uhlangabetana nemkhuleko wami.

₁₄Awu, Simakadze!

Ungilahlelani?

Ungifihlelelani buso bakho?

₁₅Ngihlupheke kakhulu ngabasengotini yekufa,

kwasebusheni bami;

ngashaywa luvalo, ngasangana.

₁₆Lulaka lwakho loluvutsako lungehlele,

kwesabisa kwakho kungicedzile.

₁₇Kungitungeleta njengemanti onkhe emalanga,

kungitungeleta kanyekanye.

₁₈Sihlobo sami nemngani wami

ubacoshile, bakhashane nami;

bumnyama sebungumngani wami.