Sihlabelelo 90

₁Yebo, Simakadze!

Wena ube siphephelo setfu

etitukulwaneni nasetitukulwaneni.

₂Ngaphambi kwekudalwa kwetintsaba,

yebo, ungakawudali nemhlaba,

kusukela phakadze

kuze kube phakadze,

wena Nkulunkulu ukhona.

₃Umuntfu umbuyisela elutfulini utsi:

“Buyelani nine bantfwana bebantfu

nibe lutfuli lenabunjwa ngalo.”

₄Ngobe inkhulungwane yeminyaka

kuwe ingangelilanga linye,

injengelilanga layitolo nase lendlulile,

yimfishane, ingangemlindvo wasebusuku.

₅Bantfu ubakhukhula njengesihlambi semanti,

baphele njengebutfongo,

ekuseni bakhula njengeluhlata:

₆nome ekuseni luyahluma luchakaze,

kodvwa entsambama luyasikwa lubune.

₇Intfukutselo yakho isicedza emandla,

lulaka lwakho luyasesabisa.

₈Bubi betfu busembikwakho,

tono tetfu letifihlakele

tisekukhanyeni kwebuso bakho.

₉Onkhe emalanga etfu ekuphila

endlula ngaphansi kwelulaka lwakho,

iminyaka yetfu iyefika

ibuye yendlule,

sincane sesibibitfwane sesikhashana.

₁₀Iminyaka yekuphila kwetfu

ingiminyaka lengemashumi lasikhombisa,

nangabe sisacinile

iba ngiminyaka lengemashumi lasiphohlongo;

noko linyenti laleyo minyaka

seliphetse kuhlupheka nelusizi.

Kuphila kwetfu kwendlula ngekushesha,

yebo, siyandiza sihambe.

₁₁Ngubani lowati emandla entfukutselo yakho,

yebo, nelulaka lwakho,

kuze akwesabe ngalokufanele?

₁₂Sifundzise kutsi

sikwati kubala emalanga etfu,

kuze sibe nenhlitiyo lehlakaniphile.

₁₃Buya, Simakadze!

Kuyawudzimate kube ngunini

solomane usifulatsela?

Hawukela tinceku takho.

₁₄Senelise ngemusa wakho

njalo ekuseni,

kuze sijabule sitfokote

onkhe emalanga etfu letako.

₁₅Siphe emalanga ekujabula,

langangemalanga ekusihlupha kwakho;

akabe ngangeminyaka

yekuhlupheka kwetfu.

₁₆Shangatsi tinceku takho

tingake tikubone usebenta,

nemandla akho ebukhosi

abonakale nasetitukulwaneni tato.

₁₇Shangatsi lutsandvo lweNkhosi

lenguNkulunkulu wetfu, lungabasetikwetfu.

Shangatsi ungawubusisa

umsebenti wetandla tetfu;

yebo, phumelelisa umsebenti wetandla tetfu.