Sihlabelelo 95

₁Wotani, sitewuhlabela kuSimakadze,

sihlabele ngenjabulo

kulo lidvwala lensindziso yetfu!

₂Asiye kuye ngekuhlabela,

simbonge ngetibongo nangetingoma.

₃Ngobe Simakadze nguNkulunkulu lomkhulu,

unguMbusi lomkhulu lonemandla

kunabo bonkhe bonkulunkulu.

₄Esandleni sakhe kunekujula kwemhlaba,

kanye nekuphakama kwetintsaba.

₅Lwandle lwakhe, ngobe walwenta,

nemhlaba lowomile wakhe,

ngobe wawubumba ngetandla takhe.

₆Wotani, sikhuleke, simkhotsamele,

asiguce embikwaSimakadze,

uMenti wetfu.

₇ Ngobe yena unguNkulunkulu wetfu,

tsine sitimvu telidlelo lakhe,

nesive lesisetandleni takhe.

Lamuhla shangatsi ningalilalela

livi lakhe nalitsi:

₈ “Ningatenti lukhuni tinhlitiyo tenu,

njengaseMeribha

nanjengamhlazane baseMasa,

₉lapho bangilinga khona boyihlo,

bangivivinya,

nome babeyibonile imisebenti yami.

₁₀Iminyaka lengemashumi lamane

nganengwa nguleso sive,

ngadzimate ngatsi:

‘Basive, lesinhlitiyo yaso yedukile,

abaticaphelanga tindlela tami.’

₁₁Ngako-ke ngatfukutsela

ngadzimate ngafunga ngabo ngatsi:

‘Bangeke bangene ekuphumuleni kwami.’ ”