Zefaniya 3

₁Nako kulelo dolobha lebacindzeteli,

labahlubukako nalabangcolile!

₂Alihloniphi muntfu,

alivumi kucondziswa.

Aletsembeli kuSimakadze.

alisondzeli kuNkulunkulu walo.

₃Tiphatsimandla talo tingemabhubesi labhodlako,

tikhulu talo titimphisi takusihlwa,

letingashiyi lutfo lwangakusasa ekuseni.

₄Baphrofethi balo bayatigcabha;

bangemadvodza labotulujane.

Baphristi balo bahlazisa indzawo lengcwele,

bephule umtsetfo waNkulunkulu.

₅Simakadze ulungile ekhatsi kwalelidolobha;

akenti lutfo lolungakalungi.

Kusa ngekusa bantfu bakhe ubaphatsa ngekungakhetsi,

kulelo nakulelo langa lelisha

akayekeli kwehlulela ngebucotfo,

noko labangakalungi abalati lihlazo.

₆“Tive ngiticedzile,

tinqaba tato tibhidlitiwe.

Titaladi tato ngitishiye tikhala libhungane,

kute namunye lowendlula ngato.

Emadolobha ato abhujisiwe;

kute namunye lotawusala kulo,

kute namunye.

₇Ngakhuluma kulelidolobha, ngatsi:

‘Impela, uyawungesaba uvume kucondziswa!’

Lendzawo yalo-ke ingeke icitfwe,

kantsi netijeziso tami tonkhe

tingeke tehliselwe etikwalo.

Kodvwa babesolo banenshisekelo

yekukwenta ngebubi konkhe labakwentako.”

“Ngako-ke ngimeleni,

ngalelo langa ngiyawuma ngifakaze.

Ngincume kuhlanganisa tive,

ngibutsele ndzawonye imibuso,

bese ngitfululela lulaka lwami etikwato,

yonkhe intfukutselo yami leyesabekako.

Umhlaba wonkhe uyawubhujiswa

ngemlilo wekukhweleta kwentfukutselo yami.

₉“Tindzebe tetive ngiyawube sengiyatihlambulula-ke,

kuze kutsi bonkhe lababite

libito laSimakadze, bacela lusito kuye,

bamkhonte bahlangene lihlombe ngelihlombe.

₁₀“Kusukela ngesheya kwemifula yaseKushe tikhonti tami,

bantfu bami labasakatekile,

bayawungiletsela iminikelo.

₁₁Ngalelo langa ungeke udliwe ngemahloni

ngako konkhe lokubi lokwentile kimi,

ngobe kulelidolobha ngiyawubesusa

labo labajabula ngeligcabho labo.

Ungeke uphindze utigcabhe

etikwaleligcuma lami lelingcwele.

₁₂Kodvwa ngiyawushiya ekhatsi kuwe

labamnene nalabatfobekile,

labetsembele kulo libito laSimakadze.

₁₃“Imisalela yaka-Israyeli ingeke ikwente lokubi;

ingeke iwakhulume emanga,

nenkhohlakalo ingeke itfolakale emilonyeni yayo.

Lemisalela iyakudla, icambalale phansi,

kute futsi umuntfu loyakuyesabisa.”

₁₄Hlabela, Ndvodzakati yaseSiyoni;

memeta kakhulu, wena Israyeli!

Jabula utfokote ngayo yonkhe inhlitiyo yakho,

Ndvodzakati yaseJerusalema!

₁₅Simakadze usisusile sijeziso sakho,

watincandzekisa netitsa takho.

Simakadze, iNkhosi yaka-Israyeli, inawe;

ungeke uphindze wesabe nome nguyiphi ingoti.

₁₆Ngalelo langa bayawusho kuyo iJerusalema, batsi:

“Ungesabi, Siyoni,

netandla takho ungatiyeketsisi.

₁₇Simakadze Nkulunkulu wakho unawe,

unemandla ekusindzisa.

Uyawukujabulela kakhulu wena,

uyawukupha kuthula ngelutsandvo lwakhe;

uyawukujabulela ngekuhlabela.”

₁₈“Tinsizi temadzili labekiwe

ngiyakutisusa kuwe;

tingumtfwalo nelihlazo kuwe.

₁₉Ngaleso sikhatsi ngiyawubajezisa

bonkhe labo lababekucindzetela;

labachutako ngiyawubaphephisa,

ngibabutse bonkhe labo labebasakatiwe.

Ngiyawubadvumisa ngibatisise emhlabeni wonkhe

lapho bebahlazeke khona.

₂₀Ngaleso sikhatsi ngiyawunibutsa;

ngaleso sikhatsi ngiyawunibuyisela ekhaya.

Ngiyawuninika kuhlonipheka neludvumo

emkhatsini wato tonkhe tive temhlaba,

nase nginibuyisela tinhlanhla tenu

embikwemehlo enu nibuka,” kusho Simakadze.