1 TIKRONIKA 13

₁Davhida a endla makungu ni tindhuna ta khume ra madzana, ni ta dzana, ni tihosana hinkwato; ₂kutani Davhida a ku eka nhlengeletano hinkwayo ya Israele: “Loko swi ri swona eka n'wina, ni loko swi hume eka Yehovha, Xikwembu xa hina, a hi rhumeni vanhu ematlhelweni hinkwawo eka vamakwerhu lava seleke ematikweni hinkwawo ya Israele, ni ka vaprista ni Valevhi emitini ya vona ni le swimitaneni swa vona, leswaku va ta hlangana na hina, ₃hi ta vuyisela eka hina, areka ya Xikwembu xa hina, hikuva a hi vutisanga ta yona emikarhini ya Sawulo.” ₄Kutani nhlengeletano hinkwayo yi pfumela ku endlisa sweswo hikuva mhaka leyi a yi lulamile emahlweni ka tiko hinkwaro.

₅Kavaloko Davhida a hlengeleta Vaisraele hinkwavo, ku suka enambyeni wa Xihoro wa Egipta, ku fika enyangweni ya Hamata, ku ya teka areka ya Xikwembu eKiriyata-Yeyarimi. ₆Kutani Davhida ni Vaisraele hinkwavo va tlhandluka eBaala (eKiriyata-Yeyarimi), lowu nga wa Yuda ku ya teka kona areka ya Xikwembu Yehovha loyi a tshamaka exikarhi ka tikerubu, laha ku khongeriwaka vito ra yena kona. ₇Va veka areka ya Xikwembu egolonyini leyintshwa, kutani va yi susa endlwini ya Abinadaba; Uza na Ahiyo va fambisa golonyi, ₈kutani Davhida ni Vaisraele hinkwavo va ri karhi va cina emahlweni ka Xikwembu, hi matimba hinkwawo ya vona, va yimbelela, va ri ni tiharipa, ni magubu, ni madzandzana, ni swiphambati, ni tinanga.

₉Kuteloko va fikile exivuyeni xa Kidoni, Uza a tshambuluta voko ku khoma areka, hikuva tihomu a ti lava ku yi wisa. ₁₀Kavaloko vukari bya Yehovha byi pfurhela Uza, a n'wi dlaya, hikuva a tshambulutile voko ra yena ehenhla ka areka, kwalaho a fa emahlweni ka Xikwembu. ₁₁Davhida a twa ku vaviseka hi leswi Yehovha a nga ba Uza; kutani va thya ndhawu leyi Perese-Uza ku fika ni namuntlha. ₁₂Davhida a chava Xikwembu siku lero, a ku: “Ndzi ta yi nghenisisa ku yini areka ya Xikwembu endlwini ya mina xana?” ₁₃Kutani Davhida a nga rhurhelanga areka ekaya ka yena, emutini wa Davhida, kambe a yi veka endlwini ya Obede-Edomu wa Gati. ₁₄Areka ya Xikwembu yi tshame tin'hweti tinharhu emutini wa Obede-Edomu, endlwini ya yena; Yehovha a katekisa yindlu ya Obede-Edomu ni hinkwaswo leswi ngi swi ri swa yena.