Ta ku lunghisa ntirho wa Xikwembu.
1Kuteloko va tisile areka ya Xikwembu, va yi veka eTabernakeleni leyi Davhida a yi akeleke yona, kutani va humesa tiholokosta ni magandzelo ya ku khensa emahlweni ka Xikwembu. 2Kuteloko Davhida a hetile ku humesa tiholokosta ni magandzelo ya ku khensa, a katekisa tiko hi vito ra Yehovha. 3Kutani a avela Vaisraele hinkwavo, vavanuna ni vavasati, un'wana ni un'wana xinkwa, ni nhluvi wa nyama ni buwu ra mihandzu ya vhinya.
4A veka Valevhi van'wana emahlweni ka areka ya Yehovha ku tirha ntirho ni ku twarisa, ni ku dzunisa, ni ku vonga Yehovha, Xikwembu xa Israele: 5Asafa a a ri hosana, na Zakariya wa vumbirhi, endzhaku ka yena; na Yaaziele, na Xemiramoto, na Yehiele, na Matitiya na Eliyabu, na Benaya, na Obede-Edomu, na Yehiele. Va ri ni magubu ni tiharipa, Asafa, yena, a a pfumisa swiphambati. 6Vaprista Benaya na Yahaziele a va fanele ku yima hi masiku emahlweni ka areka ya ntwanano wa Xikwembu, va tamele tinanga.
Risimu.
7Siku lero, Davhida a sungula ku lerisa Asafa ni vamakwavo ku dzunisa Yehovha va ku:
8“Dzunisani Yehovha, khongelani vito ra yena!
Tivisani exikarhi ka matiko, mitirho leyikulu ya yena!
9Yimbelelani, mi tlangela vito ra yena!
Anakanyani masingita hinkwavo ya yena!
10Mi tidzunisa hi vito lero kwetsima ra yena!
Timbilu ta lava lavaka Yehovha a ti tsake!
11Lavani Yehovha ni matimba ya yena!
Lavisisani mombo wa yena hi masiku!
12Anakanyani masingita lawa a ma endleke,
Mahlori ni ku avanyisa ka nomu wa yena,
13Wena, rixaka ra Israele, nandza wa yena,
Na n'wina, vana va Yakobo, vahlawuriwa va yena!
14Yena Yehovha i Xikwembu xa hina;
Ku avanyisa ka yena ku kona emisaveni hinkwayo.
15Tsundzukani ntwanano wa yena hi masiku,
Ni ku lerisa ka yena etinxakeni ta khume ra madzana.
16Ni ntwanano lowu a wu endleke na Abrahama,
Ni lowu a wu hlambanyeleke Isaka;
17U swi vekile kukotisa nawu eka Yakobo,
Kukotisa ntwanano lowu nga heriki eka Israele,
18A ku: ‘Ndzi ta ku nyika tiko ra Kanana,
Ri va ra wena kukotisa ndzhaka.’
19Enkarhini lowu mi nga riki vangani,
Mi ri van'wana ntsena lava luveleke etikweni,
20A mi sukela etikweni rin'wana ku ya etikweni rin'wanyana,
Ni ku fuma kun'wana ku ya eku fumeni kun'wanyana;
21A nga pfumelelanga munhu ku va xanisa,
A bile tihosi hikwalaho ka vona, a ku:
22‘Mi nga khumbi vahlawuriwa va mina,
Mi nga vavisi vaprofeta va mina!’
23Yimbelelani Yehovha, n'wina va misava hinkwayo!
Tivisani ku hlayiseka ka yena hi masiku;
24Vulani xidzumo xa yena exikarhi ka matiko,
Ni masingita ya yena exikarhi ka vanhu hinkwavo!
25Hikuva Yehovha u nkulukumba, u fanele ku dzunisiwa,
Wa chavisa ku tlurisa swikwembu hinkwaswo;
26Hikuva swikwembu hinkwaswo swa vamatiko i swifaniso ntsena,
Kambe Yehovha u endlile matilo.
27Vukulu ni ku kwetsima swi le mahlweni ka yena,
Matimba ni ku tsaka swi le vuakweni bya yena.
28Tlheriselani Yehovha, n'wina vamatiko,
Tlheriselani Yehovha ku twala ni matimba!
29Tlheriselani Yehovha ku twala ka vito ra yena!
Tlakulani, mihlengo mi ta emahlweni ka yena,
Khinsamelani Yehovha hi swibombiso leswi hlawuriweke!
30Rhurhumelani emahlweni ka yena, n'wina va misava hinkwayo!
Misava yi tiyile yi nga ka yi nga tsekatseki.
31A ku tsake matilo, ni misava a yi tsakisise!
A va vule exikarhi ka matiko, va ku: ‘Ku fuma Yehovha!’
32A ku huwelele elwandle ni leswi teleke eka rona.
A ku tsake switsunga ni hinkwaswo leswi nga eka swona!
33Kavaloko mirhi hinkwayo ya swihlahla
Yi ta huwelela hi ku tsaka emahlweni ka Yehovha!
Hikuva wa ta ku avanyisa misava!
34Dzunisani Yehovha, hikuva u lulamile,
Hikuva tintswalo ta yena ti kona hi masiku!
35Mi ku: ‘Oho! Xikwembu xa ku hlayiseka ka hina hi ponise!
Hi hlengelete, hi kutsule exikarhi ka vamatiko,
Leswaku hi tlangela vito ra wena lero kwetsima,
Hi va hi tidzunisa hi xidzumo xa wena!’
36A ku khensiwe Yehovha, Xikwembu xa Israele!
Hi masiku lama nga heriki!”
Kutani tiko hinkwaro ri ku: “Amen!”
Tlangelani Yehovha.
37Davhida a siya kona emahlweni ka areka ya ntwanano wa Yehovha, yena Asafa ni vamakwavo, leswaku va khoma ntirho hi masiku emahlweni ka areka, hilaha swi fanelaka hi siku rin'wana ni rin'wana. 38A nghenisa entirhweni Obede-Edomu ni vamakwavo, va ri 68, a veka Obede-Edomu, n'wana Yedutuni, na Hosa, valanguteri va nyangwa. 39A veka Sadoki, muprista, ni vamakwavo vaprista, emahlweni ka yindlu ya Yehovha, exitsungeni lexi ngi xi ri eGibiyoni, 40ku humesela Yehovha hi masiku tiholokosta ealitarini ya tiholokosta, nimixo ni madyambu, ni ku endla hinkwaswo hilaha ku tsariweke hakona enawini wa Yehovha, lowu a wu leriseke Israele. 41Hemani a a ri na vona, na Yedutuni ni van'wana lava hlawuriweke lava vitaniweke hi mavito ya vona ku dzunisa Yehovha; hikuva tintswalo ta yena ti tshama hi masiku. 42Hemani na Yedutuni a va ri na vona, va ri ni tinanga, ni swiphambati swa vayimbeleri, ni timbila ta ku yimbelela tinsimu ta Xikwembu, vana va Yedutuni a va ri etinyangweni.
43Kutani tiko hinkwaro ri muka, un'wana ni un'wana a ya ekaya ka yena; na yena Davhida a muka ku ya katekisa yindlu ya yena.
