1Kutani Davhida a ku Yindlu ya Yehovha Xikwembu yi ta va kwalaho ni alitari ya tiholokosta ta Israele yi ta va kwala na yona.Ta Davhida loko a lunghisa mitirho ya ku aka tempele.
2Davhida a hlengeleta valuveri lava ngi va ri etikweni ra Israele, kutani a lerisa vavatli va maribye ku vatla maribye ya ku aka yindlu ya Xikwembu. 3Davhida a lunghisa ni tinsimbhi ta ku tala ta swipikiri, ni ta marimba ya timbanti, ni ta timhingu, ni koporo ya ku tala ngopfu, yi nga ri na mpimo, 4ni mirhi ya kedari leyi nga hlayiwiki hikuva Vasidoni ni Vatiri, a va tisile eka Davhida mirhi ya kedari leyi teleke ngopfu. 5Hikuva Davhida a a ku: “N'wana wa mina, Solomoni, wa ha ri lontshwa, a pfumala matimba, kutani yindlu leyi fanelaka ku akeriwa Yehovha, yi fanele ku tlakuka ngopfu hi ku twala ni ku dzunisiwa ematikweni hinkwawo; ndzi rhandza ku n'wi lunghisela mitirho.” Kutani Davhida a lunghisa leswo tala, a nga si fa.
6Kavaloko a vitana Solomoni n'wana wa yena a n'wi lerisa ku akela Yehovha, Xikwembu xa Israele, yindlu. 7Davhida a byela Solomoni, n'wana wa yena a ku: “Loko ndzi ri mina, a ndzi rhandzile ku akela vito ra Yehovha, Xikwembu xanga, yindlu. 8Kambe rito ra Yehovha ri tile eka mina ri te: ‘U halatile ngati ya ku tala, u lwile tinyimpi letikulu; u nga ka u nga akeli vito ra mina yindlu, hikuva u halatile ngati ya ku tala emisaveni emahlweni ka mina. 9Waswivo, u ta velekeriwa n'wana; u ta va munhu wo rhula; ndzi ta n'wi nyika ku rhula eka valala hinkwavo va yena va matlhelo hinkwawo; hikuva vito ra yena a ta va Solomoni (wa ku rhula), kutani ndzi ta nyika Israele ku rhula, ni ku tsaka eku hanyeni ka yena. 10Hi yena la nga ta akela vito ra mina yindlu; u ta va n'wana wa mina, mina ndzi va tata wa yena; ndzi ta tiyisa xiluvelo xa vuhosi bya yena ehenhla ka Israele hi masiku.’
11“Sweswi, n'wananga, Yehovha a a ve na wena, u va u kateka kutani u aka yindlu ya Yehovha, Xikwembu xa wena, hilaha a vuleke hakona ehenhla ka wena. 12Ntsena Yehovha a a ku nyike vutlhari ni ku twisisa, a a ku fumise ehenhla ka Israele, a a ku nyike ku hlayisa nawu wa Yehovha, Xikwembu xa wena. 13Hi kona u nga ta kateka loko u chivirika ku hlayisa milawu ni ku lerisa loku Yehovha a ku leriseleke Israele ha Muxe. Tiyisa mbilu u tiya! U nga chavi, u nga heli mbilu! 14Waswivo, hi ku tirha ka mina, ndzi lunghisele yindlu ya Yehovha titalenta ta nsuku ta 100 000, ni titalenta ta silivhere ta 1 000 000, ni koporo ni tinsimbhi, swi ri leswi nga pimiwiki exikalweni hikuva swi tele ngopfu. Ndzi lunghisile ni mirhi, ni maribye, u ta swi engetela kambe. 15U ni vatirhi lavo tala: vavatli va maribye, ni vaaki, ni vavatli va mapulangi, ni tinxaka hinkwato ta vanhu lava tlhariheke emitirhweni yihi ni yihi. 16Loko wu ri nsuku ni silivhere, ni koporo ni nhumbu, a swi hlayiwi. Pfuka u tirha! Yehovha a a ve na wena!”
17Kutani Davhida a lerisa tindhuna hinkwato eka va Israele ku pfuna Solomoni, n'wana wa yena; 18a ku eka tona: “Xana Yehovha, Xikwembu xa n'wina, u na n'wina-ke; a nga mi nyikangi ku wisa ematlhelweni hinkwawo xana? Hikuva u nyiketile emavokweni ya mina vaaki va tiko kutani tiko ri rhula emahlweni ka Yehovha ni le mahlweni ka tiko ra yena. 19Sweswi lavani Yehovha, Xikwembu xa n'wina, hi timbilu hinkwato ta n'wina ni mimoya hinkwayo ya n'wina; pfukani, mi aka vukwetsimelo bya Yehovha Xikwembu, mi ta tisa areka ya ntwanano wa Yehovha, ni swigotso leswi hlawuriweke swa Xikwembu, endlwini leyi nga ta akeriwa vito ra Yehovha.”
