1 TIHOSI 15

₁Hi lembe ra 18 ra hosi Yerobuwamu n'wana Nebati, Abiyama a fuma etikweni ra Yuda. ₂A fuma malembe manharhu eYerusalema; vito ra mana wa yena a a ri Maaka, n'wana Abixalomu.

₃A endla swidyoho hinkwaswo leswi endliweke hi tata wa yena, loko a nga si fuma; mbilu ya yena yi nga ri hinkwayo ya Yehovha, Xikwembu xa yena, kukotisa mbilu ya Davhida, tata wa yena. ₄Hambiswiritano, hikwalaho ka Davhida, Yehovha, Xikwembu xa yena, u n'wi nyikile rivoningo eYerusalema, loko a veka n'wana wa yena endzhaku ka yena, ni loko a tiyisa Yerusalema. ₅Hikuva Davhida a a endlile leswi lulameke emahlweni ka Yehovha, a nga hambukanga hi masiku hinkwawo ya ku hanya ka yena eka hinkwaswo leswi a swi lerisiweke, loko ku nga ri emhakeni ya Uriya wa Muhiti.

₆Ku lwa ku va kona exikarhi ka Rhobuwamu na Yerobuwamu hi masiku hinkwawo ya ku hanya ka Rhobuwamu.

₇Leswi seleke swa timhaka ta Abiyama, ni hinkwaswo leswi a swi endleke, xana a swi tsariwanga ebukwini ya Tikronika ta tihosi ta Yuda? Ku lwa ku va kona exikarhi ka Abiyama na Yerobuwamu.

₈Abiyama a tilata ni vatata wa yena, va n'wi lahla emutini wa Davhida, kutani Asa, n'wana wa yena, a fuma ematshan'weni ya yena.

₉Hi lembe ra makume mambirhi ra Yerobuwamu, hosi ya Israele, Asa, a fuma etikweni ra Yuda. ₁₀A fuma malembe ya 41 eYerusalema, vito ra mana wa yena a a ri Maaka, n'wana Abixalomu.

₁₁Asa a endla leswi lulameke emahlweni ka Yehovha, kukota Davhida, tata wa yena. ₁₂A susa etikweni ra Yuda vavanuna lava tinyiketeke vuoswi, a susa ni swifaniso hinkwaswo leswi endliweke hi vatata wa yena. ₁₃Hambi a ri Maaka, mana wa yena, a n'wi tekela vuhosi bya yena, hikuva a endlele Axera xifaniso. Asa a mbundzuxa xifaniso xa yena, a xi hisa exinambyaneni xa Kedroni. ₁₄Hambiswiritano, magandzelo ya switsunga a ma herisiwanga; kambe mbilu ya Asa yi va hinkwayo na Yehovha eku hanyeni ka yena hinkwako. ₁₅A veka endlwini ya Yehovha swilo leswi hlawuriweke hi tata wa yena, ni leswi a swi hlawuleke a ri yena yi ri silivhere, ni nsuku, ni swigotso.

₁₆Ku va ni tinyimpi exikarhi ka Asa na Baaxa, hosi ya Israele, hi masiku hinkwawo ya vona. ₁₇Baaxa, hosi ya Israele, a tlhandluka ku pfuka tiko ra Yuda, kutani a aka Rhama ku sivela vanhu va Asa, hosi ya Yuda, ku huma ni ku nghena. ₁₈Asa a teka silivhere hinkwayo, ni nsuku hinkwawo lowu seleke exumeni xa Yindlu ya Yehovha, ni xuma xa yindlu ya Hosi, a swi veka emavokweni ya malandza ya yena, a ma rhuma eka Bene-Hadada, n'wana Tabrimona, n'wana Heziyoni, hosi ya Siriya, la akeke eDamaska, a ku eka yena: ₁₉“Xinakulobye a xi ve kona exikarhi ka mina na wena, kukotisa exikarhi ka tata wa wena ni tata wa mina. Waswivo, ndzi ku rhumela nhlengo wa silivhere ni wa nsuku; Yana, u tintshunxa exinakulobyeni xa Baaxa, hosi ya Israele, leswaku a ndzi tshika.” ₂₀Bene-Hadada a yingisa hosi Asa, a rhuma tindhuna ta tinyimpi ta yena, ti ya hlasela miti ya Israele; a onha Iyoni na Dani, na Avele-Beta-Maaka, na Kinereta hinkwawo, ni tiko hinkwaro ra Neftali. ₂₁Kuteloko Baaxa a swi twa, a tshika ku aka Rhama, a ya tshama eTirisa. ₂₂Kavaloko hosi Asa a hlengeleta va Yuda hinkwavo, ku nga pfumaleki munhu, kutani va ya susa maribye ni mirhi, swi ri leswi Baaxa a akeke eRhama ha swona, kutani hosi Asa a aka ha swona Geba wa Benjamini na Mispa.

₂₃Leswi seleke swa timhaka hinkwato ta Asa, ni mitirho hinkwayo ya yena, ni hinkwaswo leswi a swi endleke, ni miti leyi a yi akeke xana a swi tsariwanga ebukwini ya Tikronika ta tihosi ta Yuda xana? Ntsena a a vabya hi milenge eku dyuhaleni ka yena.

₂₄Asa a tilata ni vatata wa yena, a lahliwa ni vatata wa yena emutini wa Davhida, tata wa yena, kutani Yoxafati, n'wana wa yena, a fuma ematshan'weni ya yena.

₂₅Nadabu, n'wana Yerobuwamu, a fuma etikweni ra Israele hi lembe ra vumbirhi ra Asa, hosi ya Yuda; a fuma malembe mambirhi etikweni ra Israele.

₂₆A endla leswo biha emahlweni ka Yehovha, a famba endleleni ya tata wa yena, ni le swidyohweni swa yena leswi a dyohiseke Israele ha swona. ₂₇Baaxa, n'wana Ahiya, wa yindlu ya Isakara, a endla makungu ku n'wi pfuka; kutani Baaxa a n'wi dlaya eGibetoni, lowu nga wa Vafilista loko Nadabu ni Vaisraele hinkwavo va ri karhi va rhendzela Gibetoni. ₂₈Baaxa a n'wi dlaya hi lembe ra vunharhu ra Asa, hosi ya Yuda, kutani a fuma ematshan'weni ya yena. ₂₉Kuteloko a sungula ku fuma, a dlaya vanhu hinkwavo va yindlu ya Yerobuwamu, a nga siyelanga Yerobuwamu ni munhu un'we, a heta hinkwaswo swa yena leswi hefemulaka, hilaha Yehovha a nga vula hakona, hi nandza wa yena Ahiya wa Xilo, ₃₀hikwalaho ka swidyoho swa Yerobuwamu leswi a swi endleke, ni leswi a dyohiseke Israele ha swona, a ri karhi a karihisa ha swona Yehovha, Xikwembu xa Israele.

₃₁Leswi seleke swa timhaka ta Nadabu, ni hinkwaswo leswi a swi endleke, xana a swi tsariwanga ebukwini ya Tikronika ta tihosi ta Israele xana? ₃₂Ku lwa ku va kona exikarhi ka Asa na Baaxa, hosi ya Israele, hi masiku hinkwawo ya vona.

₃₃Hi lembe ra vunharhu ra Asa, hosi ya Yuda Baaxa, n'wana Ahiya, a fuma ehenhla ka Vaisraele hinkwavo eTirisa; a fuma hi malembe ya 24.

₃₄A endla leswo biha emahlweni ka Yehovha, a famba endleleni ya Yerobuwamu, ni le swidyohweni swa yena leswi a dyohiseke Israele ha swona.