1 TIHOSI 19

₁Akabu a byela Yezabele hinkwaswo leswi endliweke hi Eliya, hilaha a dlayeke vaprofeta hinkwavo hi tlhari. ₂Kavaloko Yezabele a rhuma munhu eka Eliya, a ku eka yena: “Swikwembu a swi ndzi endle hi matimba ni ku engetela, loko mundzuku hi nkarhi lowu ndzi nga endli hi vutomi bya wena, leswi u swi endleke hi vutomi bya un'wana wa vona.” ₃Kuteloko a swi vona, a suka a famba hikwalaho ka vutomi bya yena.

Kutani a ya fika eBerexeba wa Yuda, a siya kona nandza wa yena; ₄loko a ri yena, a famba mananga siku hinkwaro, kutani a ya tshamisa ehansi ka ximudyana, a kombela ku fa, a ku: “Swi ringene! Sweswi Yehovha, teka moya wa mina, hikuva a ndzi tluri vatatana hi vunene!” ₅Kavaloko a tilata a etlela hansi ka ximudyana. Kutani, waswivo, ntsumi yi ta, yi n'wi khumba, yi ku eka yena: “Pfuka, u dya.” ₆Kavaloko a languta, kutani a vona exiseketelweni xa yena ximbundzu lexi katingiweke henhla ka maribye lama hisaka ni khuwana ra mati: a dya, a nwa kutani a engeta a etlela. ₇Ntsumi ya Yehovha yi tlhela yi ta ra vumbirhi yi n'wi khumba, yi ku: “Pfuka, u dya hikuva ndlela ya wena yi lehile ngopfu ku tlula matimba ya wena.” ₈A pfuka, a dya, a nwa, kutani hi matimba lawa a ma kumeke eswakudyeni leswi, a famba masiku ya mune wa makume, vusiku ni nhlekanhi, a ya fika eHorebe, entshaveni ya Xikwembu.

₉Kutani a nghena ebakweni, a etlela kona. Kutani, maswivo, rito ra Yehovha ri ta eka yena, ri ku: “U endla yini kwala, wee Eliya?” ₁₀Yena a ku: “Ndzi khomiwile hi rilondzo hikwalaho ka Yehovha, Xikwembu xa mavandla; hikuva vana va Israele va tshikile ntwanano wa wena, va mbundzuxile tialitari ta wena, va dlayile vaprofeta va wena hi tlhari, ndzi sala ndzi ri swanga, kutani va lava ku ndzi dlaya!” ₁₁Yehovha a ku eka yena: “Huma u yima entshaveni emahlweni ka Yehovha.” Kutani maswivo, Yehovha a hundza; moya wa xidzedze wu handzula tintshava, wu faya maribye emahlweni ka Yehovha. Kambe Yehovha a a nga ri kona exidzedzeni. Endzhaku ka xidzedze ku va ni ku tsekatseka ka misava. Kambe Yehovha a a nga ri kona eku tsekatsekeni ka misava. ₁₂Endzhaku ka ku tsekatseka, ku huma ndzilo. Kambe Yehovha a a nga ri kona endzilweni. Endzhaku ka ndzilo ku twala mpfumawulonyana lowo nandziha. ₁₃Kuteloko Eliya a wu twa a tifunengeta mombo hi nkhancu wa yena, a huma, a yima enyangweni ya bako. Kutani, maswivo, a twa rito leri nge ka yena: “U endla yini kwala, wena Eliya?” ₁₄Yena a ku: “Ndzi khomiwile hi rilondzo hikwalaho ka Yehovha, Xikwembu xa mavandla, hikuva vana va Israele va tshikile ntwanano wa wena, va mbundzuxe tialitari ta wena, va dlayile vaprofeta va wena hi tlhari, ndzi sala ndzi ri swanga, kutani va lava ku ndzi dlaya.” ₁₅Yehovha a ku eka yena: “Tlhela, u famba hi ndlela ya wena ya mananga, u ya fika eDamaska u ta nghena, kutani u chela Hazaele hi mafurha, a ta va hosi ya Siriya, ₁₆u ta chela na Yehu, n'wana Nimxi, ku va hosi ya Israele; u ta chela na Elixa, n'wana Xafati, wa Avele-Mehola, a ta va muprofeta ematshan'weni ya wena. ₁₇Kutani la nga ta balekela ripanga ra Hazaele, Yehu u ta n'wi dlaya, ni la nga ta balekela tlhari ra Yehu, Elixa u ta n'wi dlaya. ₁₈Kambe ndzi tihlayisele vanhu va 7 000 exikarhi ka va Israele va ri hinkwavo lava nga khinsamelangiki Baali, ni ku n'wi ntswontswa.”

₁₉Eliya a suka kona, a ya kuma Elixa, n'wana Xafati, a ri karhi a rima; majoko ya tihomu ya khume na mambirhi a ma famba emahlweni ka yena; yena a a ri ni majoko ya khume na mambirhi. Eliya a hundza ekusuhi na yena, kutani a n'wi hoxela jasi ra yena. ₂₀Kavaloko Elixa a tshika tihomu ta yena, a tsutsuma endzhaku ka Eliya, a ku: “Wa nga ndzi pfumelela ku ya ntswontswa tatana na manana, kutani ndzi ta ku landza.” Eliya a ku eka yena: “Famba, u tlhela u vuya. Ntsena anakanya lexi ndzi ku endleke xona.” ₂₁Kutani a tlhela, a ya teka tihomu timbirhi, a endla gandzelo ha tona; a sweka nyama hi majoko ya tihomu, a yi nyika vanhu, va dya. Kavaloko a suka, a landza Eliya, a n'wi tirhela.