1 TIHOSI 22

₁Tiko ri etlela hi malembe manharhu, ku nga ri na ku lwa exikarhi ka Vasiriya na Israele. ₂Hi lembe ra vunharhu, Yoxafati, hosi ya Yuda, a ngirimela eka hosi ya Israele. ₃Hosi ya Israele yi ku eka malandza ya yena: “Xana a mi tivi leswaku Ramoto wa Giliyadi i wa hina xana? Kambe a hi endli nchumu ku wu teka emavokweni ya hosi ya Siriya!” ₄Kutani a ku eka Yoxafati: “Xana u nga huma nyimpi na mina ku ya hlasela Ramoto wa Giliyadi xana?” Yoxafati a hlamula a ku eka hosi ya Israele: “Mina, ndzi fana na wena; tiko ra mina ri fana ni tiko ra wena, ni tihanci ta mina ti fana ni tihanci ta wena.”

₅Kambe Yoxafati a ku eka hosi ya Israele: “Wa nga rhanga ku vutisa rito ra Yehovha.” ₆Kavaloko hosi ya Israele yi hlengeleta vaprofeta, va lava ku va mune wa madzana, kutani a ku eka vona: “Xana ndzi nga ya hlasela Ramoto wa Giliyadi, kumbe ndzi nga yi xana?” Kutani va ku: “Tlhandluka, Yehovha u ta wu nyiketa emavokweni ya hosi.” ₇Yoxafati a engeta a ku: “Xana a ka ha ri na muprofeta un'wana wa Yehovha leswaku hi n'wi vutisa ha yena-ke?” ₈Hosi ya Israele yi ku eka Yoxafati: “Ka ha sele munhu un'we loyi hi nga vutisaka Yehovha ha yena; kambe ndza n'wi venga hikuva a nga ndzi bvumbheri swo saseka, kambe leswo biha: I Mikaya, n'wana Imila.” Yoxafati a ku: “Hosi yi nga tshuki yi vula sweswo!” ₉Kavaloko hosi ya Israele yi vitana nandza, yi ku eka yena: “Ndzi vitanele sweswi Mikaya, n'wana Imila.”

₁₀Hosi ya Israele na Yoxafati, hosi ya Yuda, a va tshamisile, un'wana ni un'wana exiluvelweni xa yena, va ambarile tinguvu ta vuhosi, va ri exivuyeni, enyangweni ya Samariya, kutani vaprofeta hinkwavo a va bvumbha emahlweni ka vona. ₁₁Sedekiyasi, n'wana Kenana, a a tiendlele timhondzo ta nsimbhi, a ku: “Yehovha u vula sweswo, u ri: ‘Hi timhondzo leti, u ta lwa ni Vasiriya, u ko u va heta.’ ” ₁₂Kutani vaprofeta hinkwavo a va bvumbha sweswo, va ku: “Tlhandlukela eRamoto wa Giliyadi, u ta hlula, Yehovha u ta wu nyiketa emavokweni ya hosi.”

₁₃Nandza la fambeke ku ya vitana Mikaya a ku eka yena: “Waswivo, vaprofeta va ve nomu wun'we ku bvumbhela hosi leswo saseka. Rito ra wena a ri fane ni rito ra un'wana wa vona, u vula swo saseka!” ₁₄Mikaya a hlamula, a ku: “Yehovha wa hanya, lexi Yehovha a nga ta ndzi byela xona, ndzi ta xi vula.”

₁₅Kuteloko a fikile ehosini, hosi yi ku eka yena: “Wee Mikaya, xana hi nga ya hlasela Ramoto wa Giliyadi kumbe hi nga yi-ke?” A hlamula a ku eka yena: “Tlhandluka, u hlula, kutani Yehovha u ta wu nyiketa emavokweni ya hosi.” ₁₆Hosi yi ku eka yena: “Ndzi ta ku hlambanyisa kangani leswaku u ndzi byela ntsena leswi tiyeke hi vito ra Yehovha xana?” ₁₇Kutani Mikaya a ku: “Ndzi vonile Vaisraele hinkwavo va hangalakile etintshaveni kukotisa tinyimpfu leti nga riki na murisi. Kutani Yehovha a ku: ‘Vanhu lava, a va na n'wini, un'wana ni un'wana a a tlhele hi ku rhula endlwini ya yena.’ ” ₁₈Kutani hosi ya Israele yi ku eka Yoxafati: “A ndzi ku byelanga xana? A nga ndzi bvumbheli swo saseka kambe a ndzi bvumbhela leswo biha ntsena.”

₁₉Kutani Mikaya a ku: “Hikwalaho, yingisa rito ra Yehovha: Ndzi vonile Yehovha a tshamisile exiluvelweni xa yena, a ri ni vandla hinkwaro ra matilo ekusuhi na yena exineneni ni le ximatsini. ₂₀Kutani Yehovha a ku: ‘I mani la nga ta kanganyisa Akabu leswaku a tlhandlukela eRamoto wa Giliyadi a ya fa kona?’ Kutani un'wana a vula swo karhi; un'wana a vula swo karhi. ₂₁Kavaloko moya wun'wana wu huma, wu yima emahlweni ka Yehovha, wu ku: ‘Mina ndzi ta ya, ndzi n'wi kanganyisa.’ Yehovha a ku eka yena: ‘Hi mukhuva wihi xana?’ ₂₂Wu ku: ‘Ndzi ta huma ndzi va moya wa vunwa emilon'wini ya vaprofeta va yena hinkwavo.’ Yehovha a ku: ‘U ta n'wi kanganyisa, u n'wi hlula: Huma, u ya endlisa sweswo.’ ₂₃Sweswi, waswivo, Yehovha u nghenisile moya wa vunwa emilon'wini ya vaprofeta va wena hinkwavo lava. Kambe Yehovha u vurile leswo biha ehenhla ka wena.”

₂₄Kavaloko Sedekiyasi, n'wana Kenana, a tshinelela Mikaya a n'wi phakata rhama, a ku: “Xana moya wa Yehovha wu humise ku yini eka mina wu vulavula na wena-ke?” ₂₅Kutani Mikaya a ku: “U ta swi vona siku leri u nga ta huma ekamareni yin'wana ku ya tumbela ekamareni yin'wana.”

₂₆Kutani hosi ya Israele yi ku eka nandza un'wana: “Khoma Mikaya, u n'wi yisa eka Amoni, ndhuna ya muti, ni ka Yowasi, n'wana wa hosi, u ku eka vona: ₂₇‘Hosi yi vurisa sweswo, yi ku: “Nghenisani munhu loyi, ekhotsweni, mi n'wi phamela vuswa ni mati ya khombo, ndzi ko ndzi vuya hi ku rhula.” ’ ” ₂₈Kutani Mikaya a ku: “Kungakuloko u vuya hi ku rhula, Yehovha a nga vulavulanga ha mina.” A engeta a ku: “N'wina, matiko, yingisani hinkwenu!”

₂₉Hosi ya Israele yi tlhandlukela eRamoto wa Giliyadi na Yoxafati, hosi ya Yuda. ₃₀Kutani hosi ya Israele yi ku eka Yoxafati: “Ndzi ta tihundzula ku ya enyimpini; kambe wena ambala mabaji ya wena ya vuhosi.” Kavaloko hosi ya Israele yi tihundzula, yi ya enyimpini.

₃₁Hosi ya Siriya a yi lerisile tindhuna ta makalichi ya yena ti ri ta makume manharhu na timbirhi, yi ku: “Mi nga tshuki mi pfuka munhu hambi lontsongo, hambi lonkulu, loko yi nga ri hosi ya Israele ntsena.” ₃₂Kuteloko tindhuna ta makalichi ti vona Yoxafati, ti ku: “Kunene i hosi ya Israele!” Kutani ti n'wi tshinelela ku n'wi dlaya kambe Yoxafati a huwelela. ₃₃Tindhuna ta makalichi, loko ti vona leswaku a yi nga ri hosi ya Israele, ti n'wi sukela ti n'wi tshika.

₃₄Kavaloko munhu a copa nseve hi vurha, a nga kongomisi munhu, kutani a tlhava hosi ya Israele, laha tinsimbhi ta xisirhelo xa yena ti hlanganaka kona. Kutani Akabu a ku eka mufambisi wa yena: “Hundzuka, u ndzi humesa enyimpini, hikuva ndzi tlhaviwile.” ₃₅Ku lwa ku va lokukulu siku lero, kutani hosi yi etlerisiwa ekalichini ya yena emahlweni ka Vasiriya, kakuloko dyambu ri pela, a fa. Ngati ya mbanga ya yena yi halakela ekalichini. ₃₆Loko dyambu ri pela, ku huweleriwa emixaxeni hinkwayo, va ku: “Un'wana ni un'wana a a ye emutini wa yena ni le tikweni ra yena.”

₃₇Hosi yi fa, kutani va n'wi yisa eSamariya, va lahla hosi eSamariya. ₃₈Va ya hlantswa kalichi etiveni ra Samariya, kutani timbyana ti ta ta nantswa ngati ya Akabu, laha tinghwavava ti hlambaka kona, hilaha Yehovha a nga vula hakona.

₃₉Leswi seleke swa timhaka ta Akabu, ni hinkwaswo leswi a swi endleke, ni yindlu ya timhondzo ta tindlopfu leyi a yi akeke, ni miti hinkwayo leyi a yi akeke, xana a swi tsariwanga ebukwini ya Tikronika ta tihosi ta Israele xana? ₄₀Akabu a tilata ni vatata wa yena; kutani Ahaziya, n'wana wa yena, a fuma ematshan'weni ya yena.

₄₁Yoxafati n'wana Asa, a sungula ku fuma etikweni ra Yuda hi lembe ra vumune ra Akabu, hosi ya Israele. ₄₂Yoxafati a a ri munhu wa malembe ya 35 loko a sungula ku fuma; a fuma hi malembe ya 25 eYerusalema; vito ra mana wa yena a a ri Azuba n'wana Xilihi. ₄₃A famba endleleni hinkwayo ya Asa, tata wa yena; a nga hambukanga, kambe a endla leswo lulama emahlweni ka Yehovha. ₄₄Ntsena tindlu ta switsunga ti nga hlanhliwanga: tiko ri tshama ri hisa mirhi ya risuna eswitsungeni. ₄₅Kambe Yoxafati a rhula ni hosi ya Israele.

₄₆Leswi seleke swa timhaka ta Yoxafati, ni mitirho ya yena, ni tinyimpi leti a ti humeke, xana a swi tsariwanga ebukwini ya Tikronika ta tihosi ta Yuda xana? ₄₇A susa etikweni ra Yuda vavanuna lava hlawuleriweke vuoswi, lava ha seleke emasikwini ya Asa, tata wa yena. ₄₈Kambe a ku nga ri na hosi etikweni ra Edomu; ku fuma mulanguteri. ₄₉Yoxafati a aka tingalava a Tarxixi ku ya lava nsuku eOfiri; kambe a va yanga kona, hikuva tingalava ti onhaka Esiyoni-Gebere. ₅₀Kavaloko Ahaziya, n'wana Akabu, a ku eka Yoxafati: “Malandza ya mina a ma fambe ni malandza ya wena etingalaveni.” Kambe Yoxafati a ala.

₅₁Yoxafati a tilata ni vatata wa yena, a lahliwa ni vatata wa yena emutini wa Davhida, tata wa yena; kutani Yoramu, n'wana wa yena, a fuma ematshan'weni ya yena.

₅₂Ahaziya, n'wana Akabu, a sungula ku fuma ehenhla ka Israele eSamariya, hi lembe ra 17 ra Yoxafati, hosi ya Yuda, a fuma ehenhla ka Israele hi malembe mambirhi.

₅₃A endla leswo biha emahlweni ka Yehovha, a famba endleleni ya tata wa yena, ni le ndleleni ya mana wa yena, ni le ndleleni ya Yerobuwamu, n'wana Nebati, la nga dyohisa Israele. ₅₄A tirhela Baali, a khinsama emahlweni ka yena, kutani a hlundzukisa Yehovha, Xikwembu xa Israele, hilaha tata wa yena a endleke hakona.