Ta ku aka ka tempele.
1Hi lembe ra 480 ra ku huma eka vana va Israele etikweni ra Egipta hi lembe ra vumune ra ku fuma ka Solomoni ehenhla ka Israele, hi n'hweti ya Zifi (i n'hweti ya vumbirhi), Solomoni a aka Yindlu ya Yehovha.
2Yindlu leyi hosi Solomoni a yi akeleke Yehovha, a yi ri ya swisungunhu swa 60 eku leheni ka yona ni swisungunhu swa 20 eku anameni, ni swisungunhu swa 30 eku tlakukeni ka yona. 3Ku leha ka rikupakupa leri nga emahlweni ka yindlu ya Tempele, a swi ri swisungunhu swa 20, loko ku hlayiwa ku anama ka Yindlu, ni ku anama ka rona, a swi ri swisungunhu swa khume emahlweni ka Yindlu. 4A endlela Yindlu mafasitere lama tiyisiweke hi timhandze. 5A akela ematlhelweni hinkwawo ya khumbi ra Yindlu vuako, byi longoloka ni Tempele ni vukwetsimelo bya le ndzeni, kutani a endla makamara ematlhelweni hinkwawo. 6Ku anama ka vuako bya le hansi, a swi ri swisungunhu swa ntlhanu; eka bya le xikarhi, swisungunhu swa ntlhanu na xin'we, ni ka bya vunharhu, swisungunhu swa ntlhanu na swimbirhi; hikuva a akile hi maribye lama humeseke tinhla ematlhelweni hinkwawo ya yindlu ehandle, leswaku timhandze ti nga ngheni ekhumbini ra Yindlu. 7Loko yi ri Yindlu, kakuloko yi akiwa, a va aka hi maribye lama vatliweke ematlhelweni hinkwawo, ku nga twalanga nyundzu, hambi xi ri xihloka, hambi yi ri nsimbhi ni yin'we eNdlwini loko va aka. 8Nyangwa ya makamara ya vuako bya le hansi a yi ri etlhelweni ra xinene ra Yindlu, kutani a va tlhandluka evuakweni bya le xikarhi hi swikhandziyo leswi rhendzelekaka, kutani va suka kona va tlhandluka evuakweni bya vunharhu.
9Kuteloko a hetile ku aka Yindlu, a veka timhandze a yi fulela hi mapulangi ya kedari. 10Kutani a aka tinxaxa ta makamara ematlhelweni ya Yindlu; ku tlakuka ka yin'wana ni yin'wana a swi ri swisungunhu swa ntlhanu, kutani a hlanganisa vuako eka Yindlu hi timhandze ta kedari.
11Kavaloko rito ra Yehovha ri yisiwa eka Solomoni, ri ku: 12“Loko yi ri yindlu leyi u yi akeke, kutakuloko u famba emilawini ya mina, ni loko u endla hi ku lerisa ka mina ni loko u hlayisa milawu ya mina hinkwayo ku famba ha yona, ndzi ta hetisa eka wena rito ra mina leri ndzi nga ri vula eka Davhida, tata wa wena; 13kutani ndzi ta aka exikarhi ka vana va Israele, ndzi nga tshiki tiko ra mina ra Israele.”
14Kuteloko Solomoni a hetile ku aka Yindlu, 15a bela khumbi ra yona endzeni hi mapulangi ya kedari, ku suka ehansi, ku fika elwangwini, kutani a vekela ehansi ka Yindlu, mapulangi ya kipresi. 16A akela empfungwe ka Yindlu hi mapulangi ya kedari ku suka ehansi ku fika elwangwini, swi ri swisungunhu, swa makume mambirhi; a lunghisa sweswo ku endla vukwetsimelo bya le ndzeni, xi ri xikwetsimisiso. 17Swisungunhu swa mune wa makume swa le mahlweni a yi ri Yindlu, hileswaku Tempele. 18Mapulangi ya kedari lama nga endzeni ka Yindlu, ma vatliwile ku fanisa marhakarhaka ni swiluva leswi balekeke; murhi wa kedari a wu ri kona hinkwako; maribye a ma nga vonaki. 19Exikarhi ka Yindlu, endzeni, a lunghisa vukwetsimelo bya le ndzeni ku veka kona areka ya ntwanano wa Yehovha. 20Ku leha ka vukwetsimelo bya le ndzeni a swi ri swisungunhu swa makume mambirhi emahlweni, ni ku anama ka byona, swisungunhu swa makume mambirhi, ni ku tlakuka ka byona, swisungunhu swa makume mambirhi; kutani a byi nameka hi nsuku lowo saseka. A funengeta ni alitari hi kedari. 21A nameka hi nsuku lowo saseka endzeni ka Yindlu, kutani a tiyisa xisirhelo hi tiketana letitsongo ta nsuku, emahlweni ka vukwetsimelo bya le ndzeni lebyi a byi namekeke hi nsuku. 22A nameka hi nsuku Yindlu hinkwayo; yi ri yona Yindlu hinkwayo kunene; a nameka kambe hi nsuku alitari hinkwayo leyi nga ekusuhi ni vukwetsimelo bya le ndzeni.
23Evukwetsimelweni bya le ndzeni, a endla tikerubu timbirhi hi murhi wa mutlhwari; ti ri ta swisungunhu swa khume eku leheni ka tona. 24Ku leha ka ripapa rin'wana ra kerubu a swi ri swisungunhu swa ntlhanu, ni ku leha ka ripapa rin'wana ra kerubu, swisungunhu swa ntlhanu: swi ri swisungunhu swa khume ku suka emakun'wini ya timpapa ta yona, ku yisa emakun'wini yan'wana ya timpapa ta yona. 25Kerubu yin'wana a yi ri ni swisungunhu swa khume: tikerubu timbirhi ti endliwa hi mpimo wun'we ni xifaniso xin'we. 26Ku leha ka kerubu leyo rhanga a swi ri swisungunhu swa khume, kambe a swi ri tano ni ka kerubu ya vumbirhi. 27A veka tikerubu endzeni ka Yindlu, exikarhi ka yona. Kutani va endla timpapa ta tikerubu ti tshambulutiwile leswaku ripapa ra yin'wana ri fikela ekhumbini etlhelo rin'wana, ni ripapa ra kerubu ya vumbirhi ri khoma ekhumbini etlhelo rin'wana, kambe timpapa tin'wana ta tona ti hlangana exikarhi ka Yindlu. 28Kutani a nameka tikerubu hi nsuku.
29Ematlhelweni hinkwawo ya khumbi ra Yindlu, emapulangeni, a vatla tikerubu, ni micindzu ni swiluva leswi balekeke; swi vatliwa endzeni ni le handle ka Yindlu. 30Kutani a nameka hi nsuku ehansi ka Yindlu endzeni ni le handle.
31Kutani a endla nyangwa ya vukwetsimelo bya le ndzeni hi mutlhwari wa nhova; timhandze ta yona ni xirhendzevutana xa yona a swi ringana ku avanyisa kantlhanu ka khumbi. 32Timbanti letimbirhi ti endliwa hi mutlhwari wa nhova; a vatla ehenhla ka tona tikerubu, ni micindzu, ni swiluva leswi balekeke; kutani a swi nameka hi nsuku; a nameka hi nsuku tikerubu ni micindzu. 33Hi mukhuva wolowo, a endlela nyangwa ya tempele timhandze ta mutlhwari, leswo nga ku avanyisa ka vumune ka khumbi; timbanti letimbirhi a ti ri ta murhi wa kipresi; 34timbanti letimbirhi ta nyangwa yin'wana a ti pfuleka hi matlhelo hinkwawo, ni timbanti timbirhi ta nyangwa yin'wana a ti pfuleka sweswo na tona. 35A vatla kona tikerubu, ni micindzu, ni swiluva leswi balekeke, a swi nameka hi nsuku lowu namarhelaka lomu ku vatliweke kona.
36Kutani a aka xivava xa le xikarhi hi tinxaxa tinharhu ta maribye lama vatliweke, ni rixaxa rin'we ra timhandze ta kedari.
37Masungulo ya Yindlu ya Yehovha ma sunguriwile hi lembe ra vumune ra ku fuma ka Solomoni hi n'hweti ya Zifi; 38hi lembe ra khume na rin'we, hi n'hweti ya Bulu (yi nga n'hweti ya ntlhanu na tinharhu), Yindlu yi hela hi ku lerisa hinkwako ka yona; va yi heta hi malembe ya ntlhanu na mambirhi.
