1 SAMIELE 8

₁Samiele, kuteloko a dyuharile, a veka vana va yena va va vaavanyisi va Israele. ₂Vito ra n'wana wa wanuna wa yena wa mativula a a ri Yuwele, ni vito ra lowa vumbirhi a a ri Abiya: a va ri vaavanyisi eBerexeba. ₃Kambe vana va yena a va fambanga etindleleni ta yena, va hambuka hi ku navela mali, a va amukela ni tinyiko, va voyamisa ku lulama. ₄Kutani vakulukumba va Israele hinkwavo va hlengeletana, va ya ka Samiele eRhama, va ku eka yena: ₅“Waswivo, u dyuharile, kutani vana va wena a va fambi etindleleni ta wena. Sweswi hi vekele hosi ku hi avanyisa, kukotisa ematikweni hinkwawo.” ₆Mhaka leyi yi biha emahlweni ka Samiele, leswi va nga te: “Hi nyike hosi ku hi avanyisa.” ₇Kavaloko Samiele a khongela Yehovha; kutani Yehovha a ku eka Samiele: “Yingisa rito ra tiko etimhakeni hinkwato leti va ku byelaka tona, hikuva a hi wena va ku tshikaka, kambe va tshika mina, leswaku ndzi nga tshuki ndzi va fuma. ₈Va endla hilaha va endleke hakona ku suka siku leri ndzi va humeseke eEgipta, ku fika siku leri hilaha va ndzi tshikeke ku ya tirhela swikwembu swin'wana; va endlisa sweswo ni ka wena. ₉Sweswi yingisa rito ra vona; ntsena u va laya swinene, u va tivisa milawu ya hosi leyi nga ta va fuma.”

₁₀Samiele a byela marito walawo hinkwawo ya Yehovha eka tiko loko ri kombele hosi. A ku: ₁₁“Hi wona nawu wa hosi leyi nga ta mi fuma: U ta teka vana va n'wina, a va khandziyisa etigolonyini ta yena ni le tihancini ta yena, va ta tsutsuma emahlweni ka golonyi ya yena. ₁₂U ta va veka tindhuna ta makume ya madzana, ni tindhuna ta ntlhanu wa makume va ta n'wi rimela, ni ku n'wi tshovelela, va ta n'wi fulela matlhari ya nyimpi ni mitirho ya tigolonyi ta yena. ₁₃U ta teka vana va n'wina va vanhwana va va vahlanganisi va mirhi ya risuna ni vasweki, ni vapfuvi va swinkwa. ₁₄U ta teka masimu ya n'wina, ni tivhinya ta n'wina ni mitlhwari leyinene ya n'wina, a swi nyika malandza ya yena. ₁₅U ta teka ku avanyisa ka khume ka timbewu ta n'wina ni ka vhinyo ya n'wina a swi nyika malandza ya yena swa vatsheniwa, ni makhumbi ya yena. ₁₆U ta teka malandza ya n'wina ya vavanuna ni ya vavasati, ni majaha ya n'wina ya timburi, ni timbhongolo ta n'wina, a swi tirhisa emitirhweni ya yena. ₁₇U ta teka ku avanyisa ka khume ka mitlhambi ya n'wina kambe, na n'wina, mi ta va makhumbi ya yena. ₁₈Mi ta huwelela hi siku lero hikwalaho ka hosi ya n'wina leyi mi nga ta tihlawulela yona, kambe hi siku lero, Yehovha a nga ka a nga mi hlamuli.”

₁₉Tiko ri ala ku yingisa rito ra Samiele, kutani va ku: ₂₀“A hi swona kambe hosi yi ta va henhla ka hina na hina hi ta fana ni matiko hinkwawo: hosi ya hina yi ta hi avanyisa, yi ta huma emahlweni ka hina, yi ta tiyisa tinyimpi ta hina.” ₂₁Kuteloko Samiele a yingisile marito walawo hinkwawo ya tiko, a ma vula etindleveni ta Yehovha. ₂₂Kutani Yehovha a ku eka Samiele: “Yingisa rito ra vona, u va vekela hosi.” ₂₃Kavaloko Samiele a byela Vaisraele, a ku: “Tlhelani un'wana ni un'wana emutini wa yena.”