1 VATESALONIKA 3

₁Kwalaho, ndzi tsandzekile ku yimela swin'wana, kambe hi tihlawulele ku tshikiwa hi ri sweru eAtena, ₂kutani hi rhumile Timotiya, makwerhu, nandza wa Xikwembu eEvhangelini ya Kriste, leswaku a ta mi tiyisa ni ku mi khongotela hikwalaho ka ku pfumela ka n'wina; ₃ku nga tsekatsekisiwi ni un'we hi ku xanisiwa kuloko; kasi ma tiva leswaku hi averiwe swona. ₄Hikuva ni loko ha ha ri na n'wina, hi tshama hi mi byela leswaku swa hi fanela ku xanisiwa hilaha swi humeleleke, na n'wina ma swi tiva. ₅Ndzi ri, hikwalaho ka ku hluriwa hi ku navela, ndzi rhumile Timotiya, a ta tiva timhaka ta ku pfumela ka n'wina; hi ku chava leswaku kumbe muringi u mi ringile, kutani mitirho ya hina yi hundzuke swahava.

₆Kambe loko Timotiya a vuyile eka hina, a pfa hi le ka n'wina, u hi hlavutele timhaka leto nandziha ta ku pfumela ka n'wina, ni ta rirhandzu ra n'wina, a ku: Ma ha hi anakanya hi masiku, mi navela ku hi vona tanihi leswi na hina hi navelaka ku mi vona. ₇Kunene vamakwerhu, hi chaveleriwile hi n'wina hi ku pfumela ka n'wina emaxangwini hinkwawo ya hina, ni le makhombyeni ya hina. ₈Hikuva sweswi, hi hanya hi leswi mi tiyeke eHosini. ₉Hi nga khensa Xikwembu hikwalaho ka n'wina, ni ku tsaka hinkwako loku hi tsakaka hakona emahlweni ka Xikwembu xa hina. ₁₀Ha xi khongela nhlekanhi ni vusiku hi ku tlurisisa leswaku hi ta tiva ku mi vona, hi ta engetela leswi pfumariwaka eku pfumeleni ka n'wina.

₁₁Kambe Xikwembu, Tata wa hina, ni Hosi ya hina Yesu Kriste, a va hi lunghisele ndlela ya ku ta eka n'wina! ₁₂Kutani Hosi a yi mi kurise, yi mi tatisela rirhandzu ro rhandzana ni ro rhandza hinkwavo, tanihi leswi hi mi rhandzaka hakona na hina, ₁₃yi va yi tiyisa timbilu ta n'wina, leswaku ti pfumala xisandzu eku kwetsimeni, emahlweni ka Xikwembu, Tata wa hina, eku humeleleni ka Hosi ya hina, Yesu Kriste, ni vakwetsimi va yena hinkwavo.