Ta Yowahazi na Yowasi, tihosi ta Israele.
1Hi lembe ra 23 ra Yowasi, n'wana Ahaziya, hosi ya Yuda, Yowahazi, n'wana Yehu, a sungula ku fuma etikweni ra Israele eSamariya; a fuma hi malembe ya 17. 2A endla leswo biha emahlweni ka Yehovha; a landza swidyoho swa Yerobuwamu, n'wana Nebati, la dyohiseke Israele, a nga swi fularhelanga. 3Vukari bya Yehovha byi pfurhela Israele, kutani a va nyiketa Hazaele, hosi ya Siriya, na Bene-Hadada, n'wana Hazaele, emikarhini yoleyo hinkwayo. 4Kutani Yowahazi a khongela Yehovha, Yehovha a n'wi yingisa, hikuva a a vonile ku xaniseka ka Vaisraele hilaha hosi ya Siriya yi va xaniseke hakona. 5Yehovha a nyika Vaisraele mulamuleri. Kutani Vaisraele va tshunxiwa emavokweni ya Vasiriya; kavaloko vana va Israele va aka emitsongeni ya vona kukotisa khale. 6Hambiswiritano, a va fularhelanga swidyoho swa yindlu ya Yerobuwamu la nga dyohisa Israele va tinyiketa eka swona, na xona xifaniso xa Axera xi sala xi yimile eSamariya. 7Hikuva Yehovha a a siyele Yowahazi nyimpi ya ntlhanu wa makume wa vakhandziyi va tihanci ntsena, ni tigolonyi ta khume, ni vavanuna lava fambaka hi milenge va 10 000; hikuva hosi ya Siriya a yi herisile Vaisraele, yi va endlile kukotisa ntshuri lowu kandziyeriwaka.
8Leswi seleke swa timhaka ta Yowahazi, ni hinkwaswo leswi a swi endleke, ni vunhenha bya yena, timhaka leti a ti tsariwanga ebukwini ya Tikronika ta tihosi ta Israele xana? 9Yowahazi a etlela ni vatata wa yena, kutani va n'wi lahla eSamariya; Yowasi, n'wana wa yena, a fuma ematshan'weni ya yena.
10Hi lembe ra 37 ra Yowasi, hosi ya Yuda, Yowasi, n'wana Yowahazi, a sungula ku fuma etikweni ra Israele, eSamariya; a fuma hi malembe ya 16. 11A endla leswo biha emahlweni ka Yehovha, a nga fularhelanga swidyoho hinkwaswo swa Yerobuwamu, n'wana Nebati, la dyohiseke Israele; a tinyiketa swona.
12Leswi seleke swa timhaka ta Yowasi, ni hinkwaswo leswi a swi endleke, ni vunhenha bya yena, loko a lwa na Amasiya, hosi ya Yuda, xana a swi tsariwanga ebukwini ya Tikronika ta tihosi ta Israele xana? 13Yowasi a etlela ni vatata wa yena kutani Yerobuwamu a tshamisa exiluvelweni xa yena. Yowasi a lahliwa eSamariya ni tihosi ta Israele.
Ta ku fa ka Elixa.
14Elixa a a vabya hi vuvabyi lebyi a feke ha byona, kutani Yowasi, hosi ya Israele, a ngirimela eka yena, a rila emombyeni wa yena, a ku: “Tatana! Tatana! Golonyi ya Israele ni vakhandziyi va yona!” 15Elixa a ku eka yena: “Teka vurha ni miseve.” Kutani a teka vurha ni miseve. 16Elixa a ku eka hosi ya Israele: “Khoma vurha hi voko ra wena.” Kuteloko a tamerile vurha, Elixa a tlhandlekisa mavoko ya yena emavokweni ya hosi, 17kutani a ku: “Pfula fasitere hitlhelo ra vuxa!” Kuteloko a ri pfurhile, Elixa a ku: “Copa!” A copa, kutani Elixa a ku: “I nseve wa ku ponisa ka Yehovha! I nseve wa ku ponisiwa emavokweni ya Vasiriya, u ta lwa ni Vasiriya eAfeke, u ko u va heta.” 18A engeta a ku: “Teka miseve,” kutani a teka; kavaloko Elixa a ku eka hosi ya Israele: “Gongondza ehansi.” A gongondza kanharhu kutani a yima. 19Munhu wa Xikwembu a n'wi holovela, a ku: “Ingi loko u gongondzile kantlhanu, kumbe kantlhanu na kan'we; a u ta hlula Vasiriya u ko u va heta; kambe sweswi, u ta hlula Vasiriya kanharhu.”
20Kutani Elixa a fa; va n'wi lahla. Hi lembe leri tlhandlamaka, eku sunguleni ka rona, mavandla ya Vamowabu ma nghena etikweni. 21Kakuloko va lahla munhu, va vona vandla rin'wana ri ta, kutani va cukumeta mufi esirheni ra Elixa. Mufi a ya kumba marhambu ya Elixa, kutani a pfuka a hanyile, a yima emilengeni ya yena.
22Hazaele, hosi ya Siriya, a a xanisile Israele eku fumeni hinkwako ka Yowahazi. 23Kambe Yehovha a twela Vaisraele vusiwana, a va endla hi tintswalo, a va hundzukela hi mombo, hikwalaho ka ntwanano wa yena na Abrahama, na Isaka, na Yakobo a nga rhandzangi ku va heta, ni ku fika sweswi a nga va cukumetangi ekule ni mombo wa yena.
24Hazaele, hosi ya Siriya, a fa, kutani Bene-Hadada, n'wana wa yena, a fuma, ematshan'weni ya yena. 25Yowasi, n'wana Yowahazi, a tlhela a teka emavokweni ya Bene-Hadada, n'wana Hazaele, miti leyi a yi tekeke enyimpini, emavokweni ya Yowahazi, tata wa yena. Yowasi a n'wi hlula kanharhu, kutani a tlhela a kuma miti ya Israele.
