2 TIHOSI 14

₁Hi lembe ra vumbirhi ra Yowasi, n'wana Yowahazi, hosi ya Israele, Amasiya, n'wana Yowasi, hosi ya Yuda, a sungula ku fuma. ₂A a ri wa malembe ya 25 loko a sungula ku fuma, kutani a fuma hi malembe ya 29 eYerusalema, Vito ra mana wa yena a a ri Yowadana, wa Yerusalema. ₃A endla leswo lulama emahlweni ka Yehovha, ntsena ku nga ri kukotisa Davhida, tata wa yena; a endla hinkwaswo hi laha Yowasi, tata wa yena a endleke hakona. ₄Kambe switsunga a swi susiwanga, tiko ri tshama ri hisa mirhi ya risuna eswitsungeni.

₅Kuteloko vuhosi byi tiyile emavokweni ya yena, a dlaya malandza ya yena lama dlayeke hosi, tata wa yena. ₆Kambe a nga dlayanga vana va vadlayi hilaha ku tsariweke hakona ebukwini ya nawu wa Muxe, laha Yehovha a leriseke, a ku: “Vatatana va nga tshuki va dlayeriwa vana, ni vana va nga tshuki va dlayeriwa vatatana, hikuva un'wana ni un'wana u ta dlayeriwa swidyoho swakwe.”

₇A dlaya vavanuna va 10 000 Vaedomu enkoveni wa Munyu, enyimpini yoleyo a teka Sela, a wu thya Yokitele; wu hlayisile vito leri ku fika namuntlha.

₈Kavaloko Amasiya a rhumela Yowasi, n'wana Yowahazi, n'wana Yehu, hosi ya Israele tintsumi a ku eka yena: “Tana, hi vonana!” ₉Yowasi, hosi ya Israele, a rhuma eka Amasiya hosi ya Yuda, a ku: “Mutwa lowu nga eLebanoni wu rhumile eka murhi wa kedari lowu nga eLebanoni, wu ku: ‘Nyika n'wana wa mina, n'wana wa wena a va nsati wa yena.’ Kambe swiharhi swa nhova leswi nga eLebanoni, swi hundza, swi kandziyela mutwa. ₁₀U hlurile Edomu, kutani mbilu ya wena yi ku kukumuxile: tsakela ku twala ka wena, u sala ekaya! U pfuxela yini khombo leswaku u hluriwa wena, ni va Yuda na wena?” ₁₁Kambe Amasiya a nga n'wi yingisanga, kutani Yowasi, hosi ya Israele, a tlhandluka, kutani va vonana, yena na Amasiya, hosi ya Yuda eBeta-Xemexe lowu nga wa Yuda. ₁₂Yuda a hluriwa emahlweni ka Israele, kutani va baleka un'wana ni un'wana entsongeni wa yena. ₁₃Yowasi, hosi ya Israele, a khoma Amasiya hosi ya Yuda, n'wana Yowasi, n'wana Ahaziya, eBeta-Xemexe; kutani a ta eYerusalema, a mbundzuxa rirhangu ra Yerusalema, ku suka enyangweni ya Efrayimi, ku fika enyangweni ya yinhla, swi ri swisungunhu swa mune wa madzana. ₁₄A teka nsuku hinkwawo, ni silivhere hinkwayo, ni swingolongondzwana hinkwaswo leswi ngi swi ri endlwini ya Yehovha, ni le vuhlayiselweni bya yindlu ya hosi; a khoma ni vanhu van'wana, a tlhelela eSamariya.

₁₅Leswi seleke swa timhaka ta Yowasi, leswi a swi endleke, ni vunhenha bya yena, ni ku lwa ka yena na Amasiya, hosi ya Yuda, timhaka leti a ti tsariwanga ebukwini ya Tikronika ta tihosi ta Israele xana? ₁₆Yowasi a etlela ni vatata wa yena, kutani a lahliwa eSamariya ni tihosi ta Israele, Yerobuwamu, n'wana wa yena, a fuma ematshan'weni ya yena.

₁₇Amasiya, n'wana Yowasi, hosi ya Yuda, a hanya malembe ya khume na ntlhanu endzhaku ka rifu ra Yowasi, n'wana Yowahazi, hosi ya Israele. ₁₈Leswi seleke swa timhaka ta Amasiya a swi tsariwanga ebukwini ya Tikronika ta tihosi ta Yuda xana?

₁₉Va endla makungu eYerusalema, ku n'wi xandzukela, kambe a tsutsumela eLakixi; va n'wi landza eLakixi, kutani va n'wi dlaya kona. ₂₀Va n'wi rhwala hi tihanci, kutani a lahliwa ni vatata wa yena eYerusalema, emutini wa Davhida. ₂₁Tiko hinkwaro ra Yuda ri teka Azariya, la nga ri wa malembe ya 16 va n'wi veka hosi ematshan'weni ya Amasiya, tata wa yena. ₂₂A pfuxa Elata, a wu tlherisela evuhosini bya Yuda, ku ri loko hosi yi etlerile ni vatata wa yena.

₂₃Hi lembe ra khume na ntlhanu ra Amasiya, n'wana Yowasi, hosi ya Yuda, Yerobuwamu, n'wana Yowasi, hosi ya Israele, a sungula ku fuma eSamariya; a fuma hi malembe ya 41. ₂₄A endla leswo biha emahlweni ka Yehovha, a nga hundzukelanga eswidyohweni hinkwaswo swa Yerobuwamu, n'wana Nebati, la dyohiseke Israele. ₂₅A pfuxa ndzilakana wa Israele ku sungula enyangweni ya ndlela ya Hamata, ku fika eLwandle ra Rivala hilaha Yehovha, Xikwembu xa Israele, a nga vula hakona hi nandza wa yena Yonasi, n'wana Amitayi, muprofeta loyi ngi a ri wa Gati-Hefere. ₂₆Hikuva Yehovha a a vonile khombo lerikulu ngopfu ra Israele, ni leswaku va herile hinkwavo, hambi va ri va matimba, hambi lavatsongo, a ku nga ri na munhu la pfunaka Israele. ₂₇Kambe Yehovha a nga vulanga leswaku u ta herisa vito ra Israele ehansi ka matilo; kutani a va kutsula ha Yerobuwamu, n'wana Yowasi.

₂₈Leswi seleke swa timhaka ta Yerobuwamu, ni hinkwaswo leswi a swi endleke, ni vunhenha bya yena enyimpini, ni laha a tlheriseke Israele eDamaska na Hamata wa Yuda, timhaka leti, a ti tsariwanga ebukwini ya Tikronika ta tihosi ta Israele xana? ₂₉Yerobuwamu a etlela ni vatata wa yena, tihosi ta Israele, kutani Zakariya, n'wana wa yena, a fuma ematshan'weni ya yena.