2 TIHOSI 20

₁Enkarhini wolowo Hezekiya a vabya ku yisa eku feni. Kutani Esaya, muprofeta, n'wana Amotsi, a ta eka yena, a n'wi byela, a ku: “Yehovha a ku: ‘Lerisa timhaka ta yindlu ya wena, hikuva u ta fa, u nga ha pfuki.’ ” ₂Kavaloko Hezekiya a hundzukela ekhumbini, a khongela Yehovha, a ku: ₃“Oho! Yehovha, wa nga anakanya leswaku ndzi fambile emahlweni ka wena hi ku lulama, ni mbilu leyi tengeke, ndzi endlile leswinene emahlweni ka wena.” Kutani Hezekiya a rila ngopfu.

₄Esaya, kakuloko a nga si fika exikarhi ka muti, rito ra Yehovha ri ta eka yena, ri ku: ₅“Tlhela ka Hezekiya, mufambisi wa tiko ra mina, u ku eka yena: Yehovha, Xikwembu xa Davhida, tata wa wena, xi ku: ‘Ndzi yingisile xikhongelo xa wena, ndzi vonile mihloti ya wena, ndzi ta ku hanyisa. Siku ra vunharhu u ta tlhandlukela endlwini ya Yehovha. ₆Na swona ndza engetela masiku ya wena hi malembe ya khume na ntlhanu, ndzi ta ku lwela evokweni ra hosi ya Asiriya, wena ni muti lowu; ndzi ta sirhelela muti lowu hikwalaho ka mina ni hikwalaho ka Davhida, nandza wa mina.’ ” ₇Kutani Esaya a ku: “Tekani buwu ra makuwa. Kutani va ri teka, va tsimba exilondzeni, kutani Hezekiya a tlhela a hanya.”

₈Hezekiya a ku eka Esaya: “Xikombiso hi xihi leswaku Yehovha u ta ndzi hanyisa, ni leswaku ndzi ta tlhandlukela endlwini ya Yehovha siku ra vunharhu xana?” ₉Esaya a hlamula, a ku: “Xikombiso lexi u xi nyikiwaka hi Yehovha, leswaku Yehovha u ta endla lexi a xi vuleke, hi lexi: Xana ndzhuti wu ta ya emahlweni hi khume ra swikhandziyo, kumbe wu ta tlhela hi khume ra swikhandziyo xana?” ₁₀Hezekiya a ku: “Swa olova eka ndzhuti ku ya emahlweni hi khume ra swikhandziyo, kambe a hi swona loko ndzhuti wu tlhela ndzhaku hi khume ra swikhandziyo.” ₁₁Kavaloko Esaya muprofeta a huwelela eka Yehovha, kutani Yehovha a tlherisa ndzhuti hi khume ra swiswikhandziyo eswikhandziyeni swa Akazi leswi wu swi hundzeke.

₁₂Enkarhini wolowo Merodaka-Baladani, n'wana Baladani, hosi ya Babilona, a rhumela Hezekiya papila ni nyiko, hikuva a swi twile leswaku Hezekiya a a vabyile. ₁₃Hezekiya a yingisa tintsumi leti, kutani a va kombisa yindlu hinkwayo ya xuma xa yena, wu ri nsuku ni silivhere, ni maakha, ni mafurha ya risima, ni matlhari ya yena hinkwawo, ni hinkwaswo leswi ngi swi ri exumeni xa yena. A ku salanga nchumu endlwini ya yena ni le ku fumeni hinkwako ka yena lowu Hezekiya a nga va kombisanga wona.

₁₄Esaya, muprofeta, a ya eka hosi Hezekiya, a ku eka yena: “Vanhu lava teke eka wena, va vula yini, va pfa kwihi xana?” Hezekiya a hlamula, a ku: “Va pfa etikweni leri nga ekule, eBabilona.” ₁₅Kutani a ku: “Va vonile yini endlwini ya wena-ke?” Hezekiya a ku: “Va vonile hinkwaswo leswi nga endlwini ya mina; a ku na nchumu exumeni xa mina lowu ndzi nga va kombisangiki wona.” ₁₆Kutani Esaya a ku eka Hezekiya: “Yingisa rito ra Yehovha! ₁₇‘Waswivo, masiku ma ta lawa hinkwaswo leswi nga endlwini ya wena, ni hinkwaswo leswi vatata wa wena va swi hlengeleteke ku fika siku leri, swi ta yisiwa eBabilona, ku nga ka ku nga sali nchumu, ku vula Yehovha. ₁₈Kutani va ta teka vana va wena lava humaka eka wena, lava u va velekeke, ma ta va malandza endlwini ya hosi ya Babilona.’ ” ₁₉Hezekiya a ku eka Esaya: “Rito ra Yehovha leri u ri vuleke, ri nene!” A engeta a ku: “Xana ku nga ka ku nga vi na ku rhula ni ku etlela ka tiko eku hanyeni ka mina-ke?”

₂₀Leswi seleke swa timhaka ta Hezekiya, ni vunhenha bya yena hinkwabyo, ni laha a endleke hakona tiva ni nkovotlo ku tisa mati emutini, timhaka leti a ti tsariwanga ebukwini ya Tikronika ta tihosi ta Yuda xana? ₂₁Kutani Hezekiya a etlela ni vatata wa yena; Manase, n'wana wa yena a fuma ematshan'weni ya yena.