2 TIHOSI 23

₁Hosi yi lerisa leswaku vakulukumba hinkwavo va Yuda ni va Yerusalema, va hlengeletana eka yena. ₂Kutani hosi yi tlhandluka endlwini ya Yehovha swin'we ni vanhu hinkwavo va Yuda, ni vaaki hinkwavo va Yerusalema, ni vaprista, ni vaprofeta, ni tiko hinkwaro, ku suka eka lontsongo, ku fika eka lonkulu; kutani a va hlayela marito hinkwawo ya buku ya ntwanano leyi kumiweke endlwini ya Yehovha. ₃Hosi yi yima exiyimisweni, kutani yi tiboha emahlweni ka Yehovha ku landza Yehovha, ni ku hlayisisa milawu ya yena, ni marito ya yena, ni ku lerisa ka yena hi mbilu hinkwayo ya yona ni moya hinkwawo wa yona, ni ku chivirika hi marito ya ntwanano lowu, lama tsariweke ebukwini leyi. Kutani tiko hinkwaro ri nghena entwananweni lowu.

₄Kavaloko hosi yi lerisa Hilkiya, muprista lonkulu, ni vaprista lavatsongo, ni valanguteri va nyangwa ku humesa etempeleni ya Yehovha swibya hinkwaswo leswi endleriweke Baali na Axera, ni vandla hinkwaro ra matilo, kutani a swi hisa ehandle ka Yerusalema, enhoveni ya Kedroni, a yisa ntshuri wa swona eBetele. ₅A susa vaprista va mavunwa lava tihosi ta Yuda ti va vekeke ku hisa mirhi ya risuna eswitsungeni, ni le mitini ya Yuda, ni le handle ka Yerusalema, ni lava humeselaka Baali, ni dyambu, ni n'weti, ni xirimela, ni vandla hinkwaro ra matilo, mirhi ya risuna. ₆A humesa xifaniso xa Axera endlwini ya Yehovha, a xi yisa ehandle ka Yerusalema, enkoveni wa Kedroni, a xi endla ntshuri, a cukumeta ntshuri wa xona emasirheni ya vanhu va tiko. ₇A mbundzuxa tindlu ta vanhu lava tinyiketeke vuoswi, lava tshameke endlwini ya Yehovha, ingi laha vavasati va lukelaka Axera matende. ₈A vitana vaprista hinkwavo lava tshameke emitini ya Yuda, a onha switsunga laha vaprista va hiselaka mirhi ya risuna, ku suka eGeba ku fika eBerexeba; a mbundzuxa switsunga swa tinyangwa leswi nga endleleni ya nyangwa ya Yoxuwa, ndhuna ya muti, tlhelo ra ximatsi loko munhu a nghena enyangweni ya muti. ₉Ntsena vaprista va switsunga a va ha khandziyanga ealitarini ya Yehovha, eYerusalema, kambe a va dya swinkwa leswo kala comela exikarhi ka varikwavo. ₁₀Hosi yi nyamisa Tofete lowu nga enkoveni wa vana va Hinomu, leswaku ku nga tshuki ku va na munhu la hiselaka Moloko n'wana wa yena wa xinuna kumbe wa xisati endzilweni. ₁₁A nga ha pfumelanga leswaku tihanci leti tihosi ta Yuda ti ti hlawuleleke dyambu, ti tisiwa endlwini ya Yehovha, ekusuhi ni yindlu ya Natani-Meleke, mutsheniwa, la akeke exivaveni xa le ndzhaku; kutani a hisa tigolonyi ta dyambu. ₁₂A mbundzuxa tialitari leti nga elwangwini ra yindlu leyi tlakukeke ya Akazi, leti endliweke hi tihosi ta Yuda; ni tialitari leti Manase a ti endleke eswivaveni swimbirhi swa yindlu ya Yehovha; hosi yi ti hlanhla, yi ti hoxa ehansi, kutani yi cukumeta ntshuri wa tona exinambyaneni xa Kedroni. ₁₃A nyamisa ni switsunga leswi langutaneke na Yerusalema evokweni ra ximatsi ra ntshava ya ku Lova, leswi Solomoni, hosi ya Israele, a swi akeleke Astarte, ma nga manyala ya Vasidoni, na Kemoxi, manyala ya Vamowabu, na Milikomo, manyala ya vana va Amoni. ₁₄A faya swifaniso, a tsema swifaniso swa Axera, kutani a tata ndhawu ya swona hi marhambu ya vanhu.

₁₅Hambi yi ri alitari leyi nga eBetele, ni xitsunga lexi endliweke! Yerobuwamu, n'wana Nebati, la dyohiseke Israele, a mbundzuxa alitari yoleyo ni xitsunga; a hisa yindlu ya xitsunga, a yi endla ntshuri, a hisa ni xifaniso xa Axera. ₁₆Yosiya a hundzula, a vona masirha lama nga entshaveni, kutani a humesa marhambu ya masirha lawa, a ma hisa ealitarini a yi nyamisa, hilaha Yehovha a nga vula hakona hi munhu wa Xikwembu loyi a vuleke timhaka leti. ₁₇Kutani hosi yi ku: “Xitsundzuxo lexi ndzi xi vonaka, i xa yini?” Vanhu va muti va hlamula, va ku eka yena: “I sirha ra munhu wa Xikwembu la nga suka eYuda, a ta huwelela emahlweni ka alitari ya Betele swilo leswi u swi endleke.” ₁₈Kutani a ku: “N'wi tshikeni a rhula! Ku nga tshuki ku va na munhu la khumbaka marhambu ya yena.” Kutani va tshika marhambu ya yena ni marhambu ya muprofeta la humeke eSamariya. ₁₉Yosiya a susa ni tindlu hinkwato ta switsunga leti ngi ti ri emitini ya tiko ra Samariya, leti endliweke hi tihosi ta Israele ku pfuka Yehovha; a endla ha tona hinkwaswo leswi a swi endleke eBetele. ₂₀A dlaya etialitarini vaprista hinkwavo va switsunga lava ngi va ri kona; a hisa marhambu ya vanhu kona; kavaloko a tlhelela eYerusalema.

₂₁Kutani hosi yi lerisa tiko hinkwaro, yi ku: “Endlelani Yehovha, Xikwembu xa n'wina, Paseka hilaha ku tsariweke hakona ebukwini leyi ya ntwanano.” ₂₂Hikuva a ku endliwanga Paseka kukotisa leyi, ku suka emasikwini ya vaavanyisi lava avanyiseke Israele, ni masiku hinkwawo ya tihosi ta Israele ni ya tihosi ta Yuda. ₂₃Kambe hi lembe ra 18 ra hosi Yosiya, Paseka leyi, yi endleriwe Yehovha eYerusalema.

₂₄Yosiya a susa ni vangoma, ni vabvumbi, ni “titerafi” ni swifaniso swa swikwembu, ni manyala hinkwawo lama voniweke etikweni ra Yuda na Yerusalema, leswaku ku endliwa hi marito ya nawu lama tsariweke ebukwini leyi Hilkiya, muprista, a yi kumeke endlwini ya Yehovha. ₂₅Emahlweni ka yena a ku vanga na hosi kukotisa yena, leyi tlheleke eka Yehovha hi mbilu hinkwayo ya yona, ni moya hinkwawo wa yona, ni matimba hinkwawo wa yona hi nawu wa Muxe; endzhaku ka yena a ku humelelanga yin'wana leyi fanaka na yena. ₂₆Hambiswiritano Yehovha a a nga tlhelangi evukarini lebyikulu bya yena, hikuva vukari bya yena a byi pfurhela Yuda hikwalaho ka timhaka hinkwato leti Manase a n'wi pfukeke ha tona. ₂₇Hikuva Yehovha a a ku: “Ndzi ta susa na yena Yuda emahlweni ka mina, hilaha ndzi suseke Israele hakona, ndzi ta cukumeta muti lowu ndzi wu hlawuleke, Yerusalema, ni yindlu leyi ndzi nga vula ehenhla ka yona, ndzi ku: ‘Vito ra mina ri ta va kona.’ ”

₂₈Leswi seleke swa timhaka ta Yosiya ni hinkwaswo leswi a swi endleke, a swi tsariwanga ebukwini ya Tikronika ta tihosi ta Yuda xana?

₂₉Enkarhini wa yena, Faro Neko, hosi ya Egipta, a tlhandluka ku ya lwa ni hosi ya Asiriya, enambyeni wa Yufrata; hosi Yosiya a ya hlangana na yena, kutani Faro Neko, kakuloko a n'wi vona, a n'wi dlaya eMegido. ₃₀Malandza ya yena ma suka eMegido, ma n'wi rhwele hi golonyi, ma n'wi yisa eYerusalema, kutani ma n'wi lahla esirheni ra yena. Kwalaho vanhu va tiko va teka Yowahazi, n'wana Yosiya, va n'wi chela hi mafurha, va n'wi veka hosi ematshan'weni ya tata wa yena.

₃₁Yowahazi a a ri wa malembe ya 23 loko a sungula ku fuma, a fuma tin'hweti tinharhu eYerusalema. Vito ra mana wa yena a a ri Hamutala n'wana Yeremiya, wa Libina. ₃₂A endla leswo biha emahlweni ka Yehovha, hinkwaswo hilaha vatata wa yena va endleke hakona. ₃₃Faro Neko a n'wi khotsa eRibila, etikweni ra Hamata leswaku a nga ha fumi eYerusalema, kutani a lerisa etikweni ra Yuda ndzuvo wa titalenta ta silivhere ta dzana, ni talenta ya nsuku. ₃₄Faro Neko a veka Eliyakimi, n'wana Yosiya, ku va hosi ematshan'weni ya Yosiya tata wa yena, kutani a hundzuluxa vito ra yena, a va Yoyakimi, loko a ri Yowahazi a n'wi teka a famba na yena eEgipta, laha a nga fela kona. ₃₅Yoyakimi a nyika Faro silivhere ni nsuku; kambe a lerisa tiko ku humesa ndzuvo wa mali leyi, hilaha Faro a leriseke hakona, a endla hi matimba leswaku vanhu va tiko va humesa silivhere ni nsuku, un'wana ni un'wana hi ku ringanisa ka yena, ku swi nyika Faro Neko.

₃₆Yoyakimi a a ri wa malembe ya 25 loko a sungula ku fuma, a fuma malembe ya khume na rin'we eYerusalema. Vito ra mana wa yena a a ri Zebuda, n'wana Pedaya, wa Rhuma. ₃₇A endla leswo biha emahlweni ka Yehovha, hinkwaswo hilaha vatata wa yena va endleke hakona.