2 SAMIELE 2

₁Endzhaku ka swona, Davhida a vutisa Yehovha, a ku: “Xana ndzi ta khandziyela emutini wun'wana wa Yuda xana?” Yehovha a ku eka yena: “Khandziya.” Davhida a ku: “Ndzi ta khandziyela kwihi xana?” Yehovha a ku: “EHebroni.” ₂Kavaloko Davhida a ya kona, a ri ni vasati va yena vambirhi, Ahinowama wa Yizriele, na Abigayele, nkata Nabala, wa Karmele. ₃Davhida a tlhandlukisa ni vanhu lava ngi a ri na vona, un'wana ni un'wana ni yindlu ya yena; va ya aka emitini ya Hebroni. ₄Vanhu va Yuda va ta kona, kutani va chela Davhida hi mafurha leswaku a va hosi ya yindlu ya Yuda.

Kavaloko va ya byela Davhida mahungu, va ku: “I vanhu va Yabexe wa Giliyadi lava nga lahla Sawulo.” ₅Kutani Davhida a rhuma tintsumi eka vanhu va Yabexe wa Giliyadi, a ku eka vona: “A mi katekisiwe hi Yehovha, n'wina mi nga kombisa tintswalo eka hosi ya n'wina, Sawulo, mi va mi n'wi lahla. ₆Sweswi, Yehovha a a mi kombise tintswalo ni vunene! Na mina ndzi ta mi endlela leswinene hikuva mi endlile swona. ₇Sweswi, mavoko ya n'wina a ma tinyike matimba, mi va tinhenha, hikuva hosi ya n'wina, Sawulo, u file, kutani yindlu ya Yuda yi ndzi cherile ku ndzi veka hosi ehenhla ka yona.”

₈Kambe Abinere, n'wana Neri, ndhuna ya nyimpi ya Sawulo, a teka Ixi-Boxete, n'wana Sawulo, a n'wi yisa eMahanayimi, ₉kutani a n'wi veka hosi ya Giliyadi ni ya Vaaxuri, ni ya Yizriele, ni ya Efrayimi, ni ya Benjamini, ni le henhla ka Vaisraele hinkwavo. ₁₀Ixi-Boxete, n'wana Sawulo, a a ri munhu wa malembe ya mune wa makume loko a fuma Vaisraele, kutani a fuma malembe mambirhi. Yindlu ya Yuda ntsena yi landza Davhida. ₁₁Masiku ya Davhida loko a fuma yindlu ya Yuda eHebroni, a ma ri malembe ya ntlhanu na mambirhi, ni tin'hweti ta ntlhanu na yin'we.

₁₂Kutani Abinere, n'wana Neri, a huma eMahanayimi ni malandza ya Ixi-Boxete, n'wana Sawulo va ya eGibiyoni; ₁₃kambe Yowabu, n'wana Seruya, ni malandza ya Davhida, va huma, na vona. Kutani va ya hlangana kusuhi ni tiva ra Gibiyoni; kavaloko va tshamisa, van'wana va ri tlhelo rin'wana ra tiva, van'wana tlhelo rin'wana ra tiva. ₁₄Abinere a ku eka Yowabu: “A ku pfuke majaha ma ta tlanga emahlweni ka hina!” Yowabu a ku: “A ma pfuke!” ₁₅Kutani va pfuka va tshinelela hi ku ringanisana, va ri khume na vambirhi va Benjamini, ni va Ixi-Boxete, n'wana Sawulo, ni khume na vambirhi va malandza ya Davhida; ₁₆kutani un'wana ni un'wana a khoma nala wa yena enhlokweni, a n'wi tlhava tsheve hi banga ra yena, kutani va wa swin'we. Kavaloko va thya xivandla lexi Helikathatsurimi (nsimu ya mafumu), ku ri Gibiyoni. ₁₇Ku lwa a ku ri loko nonon'hwa ngopfu siku leri; Abinere ni vanhu va yena va hluriwa hi vanhu va Davhida.

₁₈Vana va Seruya lavanharhu a va ri kona; a a ri Yowabu, na Abixayi, na Asahele; Asahele a a kota ku tsutsuma kukotisa mhunti ya nhova. ₁₉Kutani Asahele a landzela Abinere, a nga n'wi hambukeri exineneni hambi eximatsini. ₂₀Kutani Abinere a languta endzhaku ka yena, a ku: “Hi wena Asahele xana?” A ku: “Hi mina.” ₂₁Kutani Abinere a ku eka yena: “Hambuka exineneni hambi eximatsini, u khoma rin'wana ra majaha, u teka swiambalo swa yena.” Kambe Asahele a ala ku n'wi hambukela. ₂₂Abinere a engeta a ku eka Asahele: “Ndzi hambukele! Ndzi ta ku tlhavela yini u wela ehansi? Kutani ndzi ta tlakusa mombo wa mina hi mukhuva wihi emahlweni ka Yowabu makwenu xana?” ₂₃Kambe a ala ku hambuka, kutani Abinere a n'wi tlhava khwiri hi tlhari ra yena, tlhari ri va ri huma endzhaku, kutani a wa, a fa kwalaho. Kutani hinkwavo lava fikaka laha Asahele a weke kona a fa, a va yima kona.

₂₄Kambe Yowabu na Abixayi va landzela Abinere, kutani kakuloko ri pela, va fika exitsungeni xa Ama, lexi langutaneke na Giya, endleleni ya mananga ya Gibiyoni. ₂₅Vana va Benjamini va hlengeletana ku landza Abinere, va endla vandla, kutani va yima enhlohlorhini ya xitsunga. ₂₆Kavaloko Abinere a huwelela eka Yowabu, a ku: “Xana tlhari ri ta tshama ri heta vanhu xana? A ku swi tivi leswaku mbitsi yi ta va kona emakumo xana? U ta hlwela ku fika rini ku byela tiko va tshika ku hlongorisa vamakwavo xana?” ₂₇Yowabu a ku: “Xikwembu xa hanya! Loko ngi u nga vulanga nchumu, tiko a ri nga ti tshika ku landzela vamakwavo ku fika nimixo.” ₂₈Kavaloko Yowabu a yimba nanga, kutani tiko hinkwaro ri yima, ri tshika ku hlongorisa Israele va tshika ni ku lwa.

₂₉Abinere ni vanhu va yena va famba erivaleni vusiku hinkwabyo lebyi, kutani va pela Yordani, va tsemakanya tiko ra Bitironi hinkwaro, va ya fika eMahanayimi. ₃₀Kutani Yowabu a tlhela eku landzeleni ka Abinere, a hlengeleta tiko hinkwaro kutani ku pfumariwa vanhu va khume na ntlhanu na mune va malandza ya Davhida, na Asahele. ₃₁Malandza ya Davhida a ma dlayile vanhu va 360 va Benjamini ni va vanhu va Abinere. ₃₂Kutani va tlakula Asahele va ya n'wi lahla esirheni ra tata wa yena eBetlehema. Yowabu ni vanhu va yena va famba vusiku hinkwabyo, kutani ri sungula ku xa loko va fika eHebroni.