Ta ku tidzunisa ka Davhida hi ku hlayiwa ka tiko, a biwa.
1Vukari bya Yehovha byi pfurhela kambe Vaisraele, kutani a va pfuka hi Davhida loko a ku: “Yana, u hlaya Vaisraele ni va Yuda.” 2Kavaloko hosi yi byela Yowabu, ndhuna ya nyimpi, loyi ngi a ri ekusuhi na yena, yi ku eka yena: “Famba etinyimbeni hinkwato ta Israele, ku suka eDani ku fika eBerexeba, u ya hlaya vanhu va tiko, ndzi ta tiva ntsengo wa rona.” 3Yowabu a ku eka hosi: “Yehovha, Xikwembu xa wena, a xi engetele vanhu va tiko eka dzana, kutani mahlo ya hosi, n'wini wanga, a ma swi vone! Kambe hosi, n'wini wanga yi rhandzela yini ku endla sweswo xana?” 4Kambe rito ra hosi ri hlula Yowabu ni tindhuna ta nyimpi, kutani Yowabu ni tindhuna ta nyimpi ti suka emahlweni ka hosi ti ya hlaya vanhu va tiko ra Israele. 5Va pela Yordani, va ya gova eArowere, tlhelo ra xinene ra muti lowu nga exikarhi ka nkova wa Gadi, ni le kusuhi na Yazere. 6Kutani va fika eGiliyadi ni le tikweni ra Tahatimi-Hodoxi va fika eDani-Yaani, ni le kusuhi na Sidoni. 7Kutani va fika emutini wa makhokholo wa Tiri, ni le mitini hinkwayo ya Vahivhi ni ya Vakanana, va ya huma edzongeni ka Yuda, eBerexeba. 8Va famba etikweni hinkwaro ra Israele, kuteloko ku hundzile tin'hweti ta ntlhanu na mune, ni masiku ya makume mambirhi, va fika eYerusalema. 9Kutani Yowabu a yisa eka hosi ntsengo wa vanhu va tiko Vaisraele a va ri vavanuna lava humaka nyimpi va 800 000; ni va Yuda a va ri vavanuna va 500 000.
10Kuteloko Davhida a hlayile tiko, ripfalo ra yena ri n'wi tlhava. Kutani Davhida a ku eka Yehovha: “Ndzi dyohile ngopfu eku endleni ka mina! Sweswi, oho Yehovha, wanga susa ku dyoha ka nandza wa wena, hikuva kunene ndzi hungukile.”
11Siku leri tlhandlamaka, kakuloko Davhida a pfuka, rito ra Yehovha ri ya eka Gadi, muprofeta, a nga muvoni wa Davhida, ri ku: “Famba, u ya byela Davhida u ku: 12‘Yehovha u vurisa sweswo, u ri: “Ndzi ku vekela makhombo manharhu, langa rin'wana eka wona, ndzi ta ku ba ha rona.” ’ ” 13Gadi a ya eka Davhida, a n'wi tivisa mhaka, a ku eka yena: “U ta humeleriwa hi yini xana? Xana malembe ya ntlhanu na mambirhi ya ndlala ma ta va kona etikweni ra wena, kumbe u ta hlongorisiwa hi valala va wena hi tin'hweti tinharhu, kumbe ku ta va ni ntungu wa masiku manharhu etikweni ra wena xana? Sweswi ku ta tiva ni ku vona lexi ndzi nga ta hlamula a ka Loyi a ndzi rhumeke.” 14Davhida a ku eka Gadi: “Ndzi le mapfalweni lamakulu. A hi weleni emavokweni ya Yehovha, hikuva tintswalo ta yena tikulu: ndzi nga weli emavokweni ya vanhu!”
15Kutani Yehovha a rhuma ntungu lowu dlayaka vanhu etikweni ra Israele; wu va kona ku suka nimixo ku fikela nkarhi lowu vekiweke, kutani ku fa vanhu va 70 000, ku suka eDani ku fika eBerexeba. 16Kutani kakuloko ntsumi yi tshambuluta voko ra yona ehenhla ka Yerusalema ku wu heta, Yehovha a tlhela eku biheni loku, kutani a ku eka ntsumi leyi dlayaka vanhu: “Swi ringene, wisa i voko ra wena sweswi.” Ntsumi ya Yehovha a yi ri ekusuhi ni xivuya xa Arawuna, wa ka Yebusi. 17Davhida kuteloko a vonile ntsumi ya Yehovha yi dlaya vanhu exikarhi ka tiko, a vulavula na Yehovha, a ku: “Waswivo, hi mina ndzi dyoheke, hi mina loyi a endleke leswo biha; kambe tinyimpfu leti ti onhile yini xana? Voko ra wena a ri ve ehenhla ka mina ni le henhla ka yindlu ya tatana!”
18Kutani Gadi a ta eka Davhida hi siku leri, a ku eka yena: “Tlhandluka, u ya akela Yehovha alitari exivuyeni xa Arawuna, wa ka Yebusi.” 19Davhida a tlhandluka hi rito ra Gadi, hilaha Yehovha a leriseke hakona. 20Kutani Arawuna a languta a ri ehenhla, a vona hosi ni malandza ya yena lava nga ta eka yena; kutani Arawuna a huma, a ya khinsama emahlweni ka hosi. 21Arawuna a ku: “N'wini wanga, u tele yini eka nandza wa yena?” Davhida a ku: “Ndzi ta xava xivuya xa wena ku ta akela Yehovha alitari kona, leswaku khombo leri, ri susiwa etikweni.” 22Arawuna a ku eka Davhida: “Hosi, n'wini wanga, a a teke a humesa leswi lulameke emahlweni ka yena. Vona, tihomu ti ta va ta holokosta, ni tigolonyi ni majoko swi ta va tihunyi.” 23Arawuna a nyika hinkwaswo leswi, eka hosi. Kutani Arawuna a byela hosi a ku: “Yehovha, Xikwembu xa wena, a a ku tsetselele!” 24Hosi yi ku eka Arawuna: “A hi swona, kambe ndzi ta swi xava eka wena hi mali hikuva ndzi nga ka ndzi nga humeseli Yehovha, Xikwembu xa mina, magandzelo lama nga humeseriwangiki nchumu hi mina.” Kutani Davhida a xava xivuya ni tihomu hi tixikele ta silivhere ya ntlhanu wa makume. 25Kutani Davhida a aka kona alitari eka Yehovha, a humesa magandzelo lama hisiwaka, ni magandzelo ya ku khensa; kavaloko Yehovha a tsetselela tiko kutani ntungu wu tlherisiwa eka Israele.
