2 VATESALONIKA 1

₁Pawulo, na Silvano, na Timotiya, eka Kereke ya Vatesalonika leyi nga eka Xikwembu Tatana, ni le ka Hosi Yesu Kriste;

₂Tintswalo ni ku rhula a swi ve na n'wina, swi huma eka Xikwembu Tata wa hina, ni le ka Hosi Yesu Kriste.

₃Hi fanele ku khensa Xikwembu hi masiku hikwalaho ka n'wina vamakwerhu, hilaha swi lulameke hakona, hikuva ku pfumela ka n'wina ku karhi ku kula ngopfu, ni ku rhandzana ka n'wina ku engeteleka; ₄hi kona hi tidzunisaka ha n'wina etikerekeni ta Xikwembu hikwalaho ka ku tiyisela ka n'wina, ni ku pfumela ka n'wina eku xanisekeni hinkwako, ni le maxangwini lawa mi ma yingiselaka, ₅hi kona ku kombisa ka ku avanyisa loku lulameke ka Xikwembu, ku va leswaku mi endliwa lava lulameleke ku fuma ka Xikwembu, xolexo mi twisiwaka ku vaviseka hikwalaho ka xona.

₆Hikuva swi lulamile loko Xikwembu xi tlherisela lava mi xanisaka ku xaniseka, kasi n'wina mi xanisiwaka mi ta nyikiwa ku wisa na hina, ₇siku Hosi Yesu a vonakalaka, a huma etilweni ni tintsumi ta yena leta matimba, ₈hi ndzilo lowu pfurhaka, ku rihisa lava nga tiviki Xikwembu, ni lava nga yingisiki Evhangeli ya Yesu Kriste, Hosi ya hina. ₉Valavo va ta biwa hi ku onhaka loku nga heriki, hi ku humelela eka Hosi, ni matimba layo kwetsima ya yona; ₁₀loko a ta ta ku ta dzunisiwa enkarhini wolowo hi vakwetsimi va yena, ni ku tlangeriwa hi hinkwavo lava pfumeleke; hikuva vumbhoni bya hina exikarhi ka n'wina byi amukeriwile.

₁₁Hikwalaho ha mi khongelela hi mikarhi, leswaku Xikwembu xa hina xi mi veka lava lulamelaka rivitano ra xona, xi hetisa makungu ya xona lamanene, ni mitirho hinkwayo ya ku pfumela; ₁₂leswaku vito ra Hosi ya hina, Yesu Kriste, ri dzunisiwa eka n'wina, na n'wina mi dzunisiwa eka yena, hi tintswalo ta Xikwembu xa hina ni ta Hosi Yesu Kriste.