Pawulo a bvumbha ta masiku ya makumu.
1U nga tiva mhaka leyi, leswaku emasikwini ya makumu, ku ta humelela mikarhi yo nonon'hwa. 2Hikuva vanhu va ta va lava tirhandzelaka, lava rhandzaka mali, lava tibombisaka, lava tikurisaka, lava hlevaka, lava nga yingisiki vatswari va vona, va nga tivi ku khensa, vasandzi, 3lava pfumalaka rirhandzu, lava nga tshembekiki, valumbeti; lava nga tiviki ku tikhoma, lava nga tiviki musa, lava vengaka lavanene, 4vaxengi, vakarihi, lava tikurisaka, lava rhandzaka ku tsaka, xi nga ri Xikwembu, 5va ni nghohe ya vukhongeri, kambe va arile matimba ya byona. Na vona, u va fularhela.
6Exikarhi ka vona ku ni van'wana lava tinghenisaka etindlwini va titekela mimoya ya vavasati lava tikeriweke hi swidyoho, lava fambisiwaka hi ku navela ka tinxakaxaka, 7va dyondza hi masiku hinkwawo, kambe va nga swi koti ku fika eku tiveni ka ntiyiso.
8Hilaha Yani na Yambri va aleleke Muxe hakona, hi sweswo, na vona, va ala swa ntiyiso, va nga vanhu lava boleke eku anakanyeni ka vona va nga riki na ku khensiwa hitlhelo ra vupfumeri. 9Kambe va nga ka va nga engeti va ya emahlweni, hikuva vuphukuphuku bya vona byi ta vonaka emahlweni ka hinkwavo, kukotisa bya volavaya.
Timotiya u fanele ku tiya edyondzweni leyinene.
10Kambe loko u ri wena, u ndzi landzile eku dyondziseni, ni le ku hanyeni, ni le makungwini ni le ku pfumeleni, ni le ku yingiseleni, ni le rirhandzwini, ni le ku tiyiseleni, 11ni le ku xanisekeni, ni le makhombyeni lama ndzi humeleleke eAntiyoka, ni le Ikoniya, ni le Listra; kunene ndzi rhwarile ku vaviseka loku, kutani Hosi yi ndzi lwele eka hinkwaswo. 12Kambe hinkwavo lava rhandzaka ku hanya hi vukhongeri lebyi nga eka Yesu Kriste, va ta xanisiwa. 13Kambe vanhu lavo biha ni vakanganyisi va ta hundzela emahlweni eku biheni, va ri karhi va kanganyisa, na vona va kanganyisiwa.
14Kambe wena, tiya etimhakeni leti u ti dyondzeke, leti u vekeriweke tona, u ri karhi u tiva loyi u ti dyondzeke eka yena; 15ku suka evutsongwaneni bya wena, u tiva Matsalwa layo kwetsima, wona ma nga ku nyika vutlhari bya ku kuma ku hlayiseka hi ku pfumela eka Yesu Kriste.
16Matsalwa hinkwawo lama huhutiweke hi Xikwembu, ma pfuna ku dyondzisa, ni ku khorwisa, ni ku ololoxa, ni ku kurisa eku lulameni; 17leswaku munhu wa Xikwembu a ta hetiseka, a ta lunghiseriwa ntirho wun'wana ni wun'wana lowunene.
