Ta Petro loko a tihlamulela emahlweni ka kereke ya Yerusalema.
1Kambe vaapostola ni vamakwavo lava akeke eYudiya va twa leswaku vamatiko na vona, va amukele rito ra Xikwembu. 2Kuteloko Petro a tlhandlukele eYerusalema, vapfumeri lava nga va ku yimba, va n'wi tengisa, va ku: 3“U nghene eka vavanuna lava nga yimbangiki, u va u dya na vona.”
4Kutani Petro a sungula ku va byela timhaka hi ku ti longoloxa, a ku: 5“A ndzi ri emutini wa Yopa ndzi khongela; kutani ndzi vona mahlori; ndzi vona xilo lexo ngi nguvu leyikulu, leyi nembelelaka hi le tilweni, yi bohiwile etinhleni ta yona ta mune, yi ta fika eka mina. 6Kuteloko ndzi yi hlometele, ndzi vona swifuwo swa misava swa mune wa milenge, ni swiharhi, ni leswi kokovaka, ni tinyanyana ta tilo. 7Kutani ndzi twa rito leri nge eka mina: ‘Yima, Petro, u tlhava, u dya.’ 8Kutani ndzi ku: ‘Swi nga tshuki swi va tano, Hosi; hikuva xilo xo yila, hambi xi ri lexi nyameke, a xi si nghena enon'wini wa mina ni siku ni rin'we.’ 9Rito ri engeta ri huma etilweni, ri ndzi hlamula, ri ku: ‘Xilo lexi basisiweke hi Xikwembu u nga tshuki u ku: “Xa yila.” ’ 10Kutani sweswo swi endliwa kanharhu. Kutani hinkwaswo swi tlhela swi tekeriwa etikweni. 11Ha wona nkarhi wolowo, ndzi tshuka ndzi vona vavanuna vanharhu lava rhumiweke eka mina, va huma eKhezariya, va humelela enyangweni ya yindlu laha ngi ndzi ri kona. 12Kutani Moya wu ndzi byela leswaku ndzi famba na vona, ndzi nga tshuki ndzi kanakana; kambe vamakwerhu lava va ntlhanu na un'we va famba na mina; kutani hi nghena eka munhu yeloyi. 13Kavaloko a hi byela hilaha a voneke ntsumi endlwini ya yena, yi n'wi humelela, yi ku eka yena: ‘Rhuma vanhu eYopa, va ya vita Simoni, loyi va nge i Petro; 14hi yena la nga ta ku byela timhaka leti u nga ta ponisiwa ha tona, wena ni va yindlu ya wena hinkwavo.’ 15Kutani, kakuloko ndzi sungula ku vulavula, Moya lowo Kwetsima wu xikela ehenhla ka vona, kukotisa leswi nga endliwa eka hina eku sunguleni. 16Kutani ndzi anakanya rito ra Hosi leri nge: ‘Kunene Yohane u khuvurile hi mati, kambe n'wina mi ta khuvuriwa hi Moya lowo Kwetsima.’ 17Kutani-ke, Xikwembu loko xi va nyikile nyiko leyi fanaka ni leya hina, lava hi pfumeleke eka Hosi Yesu Kriste, mina a ndzi ri mani ku alela Xikwembu xana?”
18Kuteloko va twile timhaka teto, va miyela; kutani va dzunisa Xikwembu, va ku: “Kunene, Xikwembu xi nyikile ni vamatiko ku hundzuka leswaku va vona vutomi!”
Ta ku sungula ka kereke ya Antiyoka.
19Loko va ri lava ingi va hangalasiwile hi ku xanisiwa loku nga humelela hikwalaho ka Stefano, va hundzela emahlweni ku ya fika eFenikiya, na Kipra, na Antiyoka, va nga byeri munhu rito loko va nga ri Vayuda ntsena. 20Hambiswiritano, van'wana eka vona, va nga vavanuna va Kipra ni va Kirene, kakuloko va nghene eAntiyoka, va hlamulana ni Vagriki, va va byela Evhangeli ya Hosi Yesu. 21Kutani voko ra Hosi ri va na vona; vanhu lavo tala va pfumela, va hundzukela eka Hosi.
22Timhaka teto, kuteloko ti fikile etindleveni ta kereke leyi nge Yerusalema, yi rhuma Barnaba leswaku a endza eAntiyoka. 23Kuteloko a fikile, a vona tintswalo ta Xikwembu a tsaka; kutani a va khongotela hinkwavo ku tiyisela eka Hosi hi timbilu leti chivirikaka. 24Hikuva a a ri wanuna wa tintswalo, la teleke Moya lowo Kwetsima ni ku pfumela; kutani ntshungu lowukulu wu namarhela Hosi.
25Kambe Barnaba a ya eTarso ku ya teka Sawulo. 26Kuteloko a n'wi kumile, a n'wi yisa eAntiyoka. Va tshamisa kona, va heta lembe rin'we va ri karhi va hlengeletana ni kereke kutani va dyondzisa vunyingi lebyikulu. Hi kona la Antiyoka vadyondzisiwa va nga sungula ku thyiwa Vakriste.
27Emasikwini lawa, vaprofeta va rhelela hi le Yerusalema, va ya Antiyoka. 28Un'wana wa vona, loyi va nge i Agabo, a yima, a profeta hi Moya leswaku ndlala leyikulu yi ta wa emisaveni hinkwayo; kunene yi humelele enkarhini wa Klawudiyo-Khezari. 29Kutani vadyondzisiwa va va ni rito rin'we ku rhumela vamakwavo lava akeke eYudiya leswaku va pfuna hilaha un'wana ni un'wana a nga humesa hakona. 30Kunene va endlisa sweswo, va swi rhumela eka vakulukumba hi mavoko ya Barnaba na Sawulo.
