TIMHAKA 14

₁Pawulo na Barnaba, loko va ri eIkoniya, va nghena kun'we esinagogeni ya Vayuda, va dyondzisa kona, kutani ku pfumela vunyingi lebyikulu bya Vayuda ni bya Vagriki. ₂Kambe Vayuda lava nga pfumelangiki va pfuxa vamatiko leswaku timbilu ta vona ti ta karihela vamakwavo. ₃Hambiswiritano, va xwa kona masiku layo tala, va vulavula va tshembile Hosi; kambe a yi ri karhi yi tiyisa rito ra tintswalo ta yona hi ku endla swikombiso ni masingita hi mavoko ya vona. ₄Kambe vanhu va muti va hambana: Van'wana va yimela Vayuda, van'wana va yimela vaapostola. ₅Kakuloko dzolonga ri pfuxiwa hi vamatiko, ni Vayuda, ni tindhuna ta vona ku va endla swo biha, ni ku va khandla, ₆vona, loko va twa sweswo, va tsutsumela emitini yin'wana ya Likawoniya, yi nga Listra, na Derbe, ni le matikweni ya kona. ₇Kutani va vula Evhangeli kona.

₈Kambe munhu a a ri kona eListra ka hari mpfhuka a hume ekhwirini ra mana wa yena a lamele milenge, a nga tivi ku famba. ₉A a yingisa leswi vuriwaka hi Pawulo. Yena a n'wi honolela, kutani loko a vona leswaku u ni ku pfumela ka ku hanyisiwa, ₁₀a tlakusa rito, a ku eka yena: “Suka u yima hi milenge ya wena.” ₁₁Kutani a tlula a famba. Vunyingi, loko byi vona leswi endliweke hi Pawulo, byi sungula ku huwelela hi ririmi ra Valikawoniya, va ku: “Swikwembu swi tekile tinghohe ta vanhu, swi xikele eka hina.” ₁₂Kutani Barnaba, a va n'wi vula Zewusi; Pawulo, yena, va ku, i Hermesi, hikuva a a ri yena n'wini wa marito. ₁₃Na yena muprista wa Zewusi, loyi tempele ya yena a yi ri emahlweni ka muti wa vona, a ta ni tihavi ti rhwele tihari ta swikombiso, a ti yisa enyangweni ya muti, a rhandza ku va tlhavela mhamba a ri ni vunyingi. ₁₄Kambe vaapostola Barnaba na Pawulo, loko va twa sweswo, va handzula tinguvu ta vona, va tihoxa exikarhi ka vanhu, va huwelela, va ku:

₁₅“Vavanuna, mi endlisela yini sweswo xana? Kasi na hina hi vanhu lava fanaka na n'wina hi ntumbuluko; kutani ho mi byela leswaku mi tshika timhaka leti ta swahava, ni leswaku mi hundzukela eka Xikwembu lexi hanyaka, lexi nga endla tilo ni misava, ni lwandle, ni swilo hinkwaswo leswi nga eka swona; ₁₆etinxakeni leti hundzeke, xi tshikile matiko hinkwawo, leswaku ma famba hi tindlela ta wona. ₁₇Hambiswiritano, a xi tipfumatanga vumbhoni, hi ku endlela vanhu swinene, ni ku hi nyika timpfula ta tilo ni tinguva ta ndzalo, xi hi andzisela ni swakudya, xi tata timbilu ta hina hi ku tsaka.” ₁₈Kambe, hambi va vula sweswo, va lava ku tsandzeka ku sivela vanhu ku va tlhavela mhamba.

₁₉Kutani ku fika Vayuda lava pfaka hi le Antiyoka na Ikoniya, va kucetela tiko, va khandla Pawulo hi maribye, kutani va n'wi kokela ehandle ka muti, va anakanya leswaku u file. ₂₀Kambe kuteloko vadyondzisiwa va n'wi rhendzele, a pfuka, a nghena emutini wa vona; kutani hi siku leri tlhandlamaka a tifambela eDerbe a ri na Barnaba.

₂₁Kuteloko va vurile Evhangeli emutini lowo, ni ku endla vadyondzisiwa lavo talanyana, va tlhelela eListra na Ikoniya na Antiyoka, ₂₂va tiyisa timbilu ta vadyondzisiwa, va va khongotela ku tiyisela eku pfumeleni, va ri karhi va va ringanisela leswaku hi fanele ku nghena eku fumeni ka Xikwembu hi maxangu layo tala.

₂₃Kutani va va vekela vakulukumba ekerekeni yin'wana ni yin'wana, hi ku khongela ni ku titsona swakudya; kutani va va veka eka Hosi leyi va pfumeleke eka yona.

₂₄Kavaloko va tsemakanya ePisidiya, va ya ePamfiliya. ₂₅Kutani va vula rito ePerge, kutani va rhelela eAtaliya. ₂₆Va suka kona va tlhelela eAntiyoka hi byatso, ku nga laha ingi va nyiketiwile etintswalweni ta Xikwembu, ku ya entirhweni lowu va wu heteke.

₂₇Kuteloko va fikile va hlengeleta kereke va vula hinkwaswo leswi Xikwembu xi swi endleke ha vona, ni hilaha xi nga pfulela matiko hakona nyangwa ya ku pfumela. ₂₈Kutani va xwa kona nkarhi lowo leha ni vadyondzisiwa.