TIMHAKA 2

₁Siku ra Pentekosta, kuteloko ri fikile, a va hlengeletanile hinkwavo exivandleni xi ri xin'we. ₂Kutani hi nomu lowu, ku twakala mpfumawulo lowu humaka etilweni, wu fana ni wa xidzedze; kutani yindlu hinkwayo leyi va tshameke eka yona yi tala wona. ₃Kutani tindzimi leti avanaka, ti fana ni malangavi ya ndzilo, ti va humelela, ti tshama ehenhla ka un'wana ni un'wana wa vona. ₄Kutani hinkwavo va tala hi Moya lowo Kwetsima, va sungula ku vulavula hi tindzimi tin'wana, hilaha Moya wu nga va vulavurisa hakona.

₅Kambe a ku ri ni Vayuda lava akeke eYerusalema, lava chavaka Xikwembu, va huma ematikweni hinkwawo lama nga ehansi ka tilo. ₆Kuteloko mpfumawulo lowu wu yingisiwa, vunyingi byi hlengeletana, byi tshuka ngopfu, hikuva un'wana ni un'wana a a va yingisa va vulavula hi ririmi leri nga ra rikwavo. ₇Kutani va hloleriwa hinkwavo, va hlamala va vutisana, va ku: “Vonani! Vanhu lava hinkwavo lava vulavulaka, a hi Vagaleliya xana? ₈Swi endlisa ku yini loko hi va yingisa va vulavula hi ririmi leri un'wana ni un'wana wa hina a tswariweke eka rona? ₉Hina Vaparta, ni Vameda, ni Vaelamu ni lava akeke eMesopotamiya, na Yudiya, na Kapadokiya, na Ponto, na Asiya, ₁₀ni le Frigiya, na Pamfiliya, na Egipta, ni matlhelo ya Libiya la nga ekusuhi na Kirene; ni lava luveleke eRhoma, Vayuda ni vaproselita, ₁₁Vakreta ni Maarabu, hinkwerhu hi va yingisisa ku yini va vulavula timhaka letikulu ta Xikwembu hi tindzimi ta hina xana?” ₁₂A va tshukile hinkwavo, va nga tivi leswi va nga ta anakanya swona va vutisana, va ku: “Mhaka leyi, yi yisa kwihi xana?” ₁₃Kambe van'wana va mona va ku: “Va xurhe vhinyo leyo tsokombela.”

₁₄Kambe Petro a yima ni va khume na un'we, a tlakusa rito, a va byela a ku: “Vavanuna va Yudiya, na n'wina hinkwenu vaaki va Yerusalema, tivani leswo, mi yingisa swinene timhaka ta mina. ₁₅Vanhu lava, a va pyopyiwanga hilaha mi anakanyaka hakona, hikuva wa ha ri nkarhi wa vunharhu. ₁₆Kambe i mhaka leyi vuriweke hi muprofeta Yuwele, loko a te: ₁₇‘Hi masiku ya makumu, ku vula Xikwembu, ndzi ta chela nyama hinkwayo hi Moya wa mina; vana va n'wina va xinuna ni va xisati va ta bvumbha, lavantshwa va n'wina va ta vona mahlori; ni swidyuhati swa n'wina swi ta lorha milorho. ₁₈Hi masiku lawa, ndzi ta chela malandza ya mina ya xinuna ni ya xisati hi Moya wa mina, kutani va ta bvumbha. ₁₉Ndzi ta endla masingita ehenhla etilweni, ni swikombiso ehansi emisaveni, ngati, ni ndzilo, ni hunguva ya musi. ₂₀Dyambu ri ta hundzuriwa munyama, ni n'weti wu ta hundzuriwa ngati, siku lerikulu ra Hosi, leri hatimaka, ri nga si ta. ₂₁Kutani ku ta humelela leswaku un'wana ni un'wana la nga ta khongela vito ra Hosi, u ta ponisiwa.’

₂₂“Vavanuna va Israele, yingisani timhaka leti: Yesu wa Nazareta wanuna loyi a kombisiweke eka n'wina hi Xikwembu hi mahlori, ni masingita, ni swikombiso leswi Xikwembu xi swi endleke ha yena exikarhi ka n'wina, hilaha mi swi tivaka hakona na n'wina, ₂₃yeloyi-ke, u nyiketiwile hi makungu lama tiyeke ya Xikwembu ni ku titivela ka xona ka khale; kutani mi n'wi dlayile hi ku n'wi vamba hi mavoko ya swidyohi; ₂₄loyi, Xikwembu xi n'wi pfuxile, xi n'wi tshunxile etinsingeni ta rifu, hikuva a ku nga ri na hilaha a nga bohiwaka hakona. ₂₅Hikuva Davhida loko a vula swa yena, u te: ‘A ndzi vona Hosi hi masiku emahlweni ka mina, hikuva u le vokweni ra mina ra xinene, leswaku ndzi nga ti tsekatsekisiwa. ₂₆Hikwalaho, mbilu ya mina yi tsakile, ni ririmi ra mina ri tsakisisa swonghasi, na yona nyama ya mina yi ta wisa hi ku tshemba; ₂₇hikuva u nga ka u nga tshiki moya wa mina exivandleni xa vafi; u nga ka u nga pfumeleri muhlawuriwa wa wena leswaku a vona ku bola. ₂₈U ndzi tivisile tindlela ta vutomi; u ta ndzi xurhisa hi ku tsaka loku humaka emahlweni ka wena.’

₂₉“Vavanuna varikwerhu, ndzi nga tiyisa ndzi mi byela leswaku mupatriarka Davhida u file, a va a lahliwa, kutani sirha ra yena ri le xikarhi ka hina, ni namuntlha. ₃₀Kambe, leswi ngi a ri muprofeta, ni ku tiva leswaku Xikwembu xi n'wi tshembisile hi ku hlambanya leswaku xi ta tshamisisa exiluvelweni xa yena un'wana wa rixaka ra yena; ₃₁hi ku tivonela loku ka khale, u vurile ku pfuka ka Kriste, a ku: Moya wa yena a wu tshikiwanga exivandleni xa vafi, ni nyama ya yena a yi vonangi ku bola. ₃₂Hi yena Yesu loyi Xikwembu xi nga n'wi pfuxa, kutani hinkwerhu hi timbhoni ta mhaka leyi. ₃₃Kakuloko a tlakusiwile hi voko ra xinene ra Xikwembu, u amukerile eka Tatana, ku tshembisa ka Moya lowo Kwetsima, kutani u chelerile leswi mi swi vonaka, ni leswi mi swi twaka. ₃₄Hikuva Davhida a nga tlhandlukelanga ematilweni, kambe hi yena la nga te: ‘Hosi yi te eka Hosi yanga: Tshamisa evokweni ra mina ra xinene, ₃₅ndzi ko ndzi endla valala va wena vunavelo bya milenge ya wena.’ ₃₆Hikwalaho, yindlu hinkwayo ya Israele yi fanele ku tiva swinene leswaku Xikwembu xi n'wi endle Hosi ni Kriste, Yesu loyi mi n'wi vambeke.”

₃₇Kuteloko va swi yingisile va tlhaveka timbilu; kutani va ku eka Petro ni ka vaapostola van'wana: “Vavanuna varikwerhu, hi ta endla yini?” ₃₈Petro a ku eka vona: “Hundzukani, kutani un'wana ni un'wana a khuvuriwa hi vito ra Yesu Kriste, eku khomeriweni ka swidyoho; kutani mi ta amukela nyiko wu nga Moya lowo Kwetsima. ₃₉Hikuva ku tshembisa loku, ku hlayeriwe n'wina ni vana va n'wina, ni hinkwavo lava nga ekule, lava va ha taka vitiwa hi Hosi, Xikwembu xa hina.” ₄₀Kutani a tiyisa vumbhoni bya yena hi marito man'wana layo tala, a va khongotela, a ku: “Tiponiseni erixakeni leri ra ku homboloka.” ₄₁Vona-ke, lava amukeleke rito ra yena hi ku tsaka, va khuvuriwa; kutani ku engeteriwa siku lero vanhu lava lavaka ku va makume manharhu ya madzana.

₄₂Kutani a va chivirika edyondzweni ya vaapostola, ni le ku hlanganeni ka vona, ni le ku phemeni ka vuswa ni le mikhongelweni. ₄₃Kambe ku chava a ku ri embilwini ya un'wana ni un'wana: Kutani mahlori layo tala ni swikombiso a swi ri karhi swi endliwa hi vaapostola. ₄₄Hinkwavo lava nga pfumela a va tshama kun'we va pfanganyeta swilo hinkwaswo swa vona; ₄₅va xavisa masimu ya vona, ni xuma xa vona, kutani va avela vanhu hinkwavo, hilaha un'wana ni un'wana a pfumaleke hakona. ₄₆Na swona a va tiyisela etempeleni hi masiku hinkwawo, va ri ni mbilu yin'we, va ri karhi va phema vuswa endlwini yin'wana ni yin'wana, va dya swakudya swa vona hi ku tsaka, ni timbilu leti tengeke, ₄₇va ri karhi va dzunisa Xikwembu, va tsakeriwa hi tiko hinkwaro. Kutani siku rin'wana ni rin'wana Hosi yi engetela kereke hi vanhu lava ponisiweke.