1Hi lembe ra vunharhu ra ku fuma ka hosi Belxatsara, mina, Daniele, ndzi humeleriwa hi xivono, endzhaku ka lexo sungula. 2Kuteloko ndzi languta, swi va tanihi loko ndzi ri eXuxani, emutini wa le hosini wa tiko ra Elamu; ndzi vona xivono ndzi tshamile eribuwini ra nambu wa Ulayi.
3Ndzi tlakusa mahlo ndzi languta, kutani vonani, khuna a ri yimile emahlweni ka nambu, ri ri ni timhondzo timbirhi, timhondzo leti a ti lehile, rin'wana ri hundza rin'wana hi ku leha kutani rona ri kula endzhaku. 4Ndzi vona khuna ri paletela vupeladyambu, ni le n'walungwini, ni le dzongeni, ku nga ri na xiharhi lexi nga ri tiyelaka, ku nga ri na munhu la nga lamulelaka ematimbeni ya rona; kutani ri endla hilaha ri rhandzaka hakona, ri ri karhi ri tinyika matimba. 5Kutani mina, loko ndza ha ri karhi ndzi hlalela, ndzi vona xiphongo xi tsemakanya hi ku anama ka misava, xi huma evupeladyambu, xi nga kandziyi ehansi, xiphongo lexi a xi ri ni rimhondzo lerikulu emaharini ya mahlo ya xona. 6Kutani xi fika eka khuna leri nga ni timhondzo timbirhi, rolero ndzi ri voneke ri yimile emahlweni ka nambu, kutani xi tiwisela ehenhla ka rona hi matimba ya vukari bya xona. 7Kutani ndzi xi vona xi ba khuna erihlangutini xi ri karihela, kutani xi ba khuna xi tshova timhondzo timbirhi ta rona kambe khuna a ri pfumala matimba ya ku lwa na xona; kutani xi ri wisela ehansi, xi ri kandziyela, ku nga ri na munhu la lamulelaka khuna ematimbeni ya xona. 8Xiphongo xi va ni matimba hi ku tlurisa, kutani kuteloko xi fike ematimbeni ya xona, rimhondzo lero leha ri tshoveka, kutani ematshan'weni ya rona ku mila timhondzo ta mune to leha, ti kula tlhelo ra timheho ta mune ta le tilweni.
9Eka rin'wana ra tona, ku mile rimhondzwana leri lehelaka tlhelo ra dzonga, ni le vuxeni, ni le tikweni lerinene; 10kutani ri leha ku ya fika emavandleni ya le tilweni, kutani ri wisela ehansi mavandla man'wana ya tinyeleti, ri ti kandziyela. 11Kutani ri tlakuka ku yisa endhuneni ya mavandla, ri yi tekela gandzelo ra masiku, kutani yindlu ya vukwetsimelo bya yona yi mbundzuxiwa.
12Mavandla ma nyiketiwile rona, ni gandzelo ra masiku hikwalaho ka swidyoho, kutani rimhondzo ri cukumeta switiyiso ehansi, ri endla, ri kuma mikateko emitirhweni ya rona. 13Kutani ndzi yingisa un'wana wa vahlawuriwa a vulavula; kutani muhlawuriwa un'wana a hlamula la nga sungula ku vulavula, a ku: “I mangani masiku lama hlayiweke eka xivono lexi ematshan'weni ya gandzelo ra masiku, ni le matshan'weni ya xidyoho lexi onhaka xana? Xikwetsimisiso ni mavandla swi ta hluriwa swi kandziyeriwa ku yisa kwihi?” 14A ku eka mina: “Ma ta va masiku ya 2 300, loko ku hlayiwa madyambu ni mixo; kutani xikwetsimisiso xi ta basisiwa.”
15Mina, Daniele, kakuloko ndza ha languta xivono lexi, ndzi ri karhi ndzi lava ku twisisa, ndzi vona ku yima emahlweni ka mina un'wana la nga ni xivumbeko xa munhu. 16Kutani ndzi twa rito ra munhu leri sukaka exikarhi ka nambu wa Ulayi, ri huwelela, ri ku: “Gabriele, n'wi hlavutelele leswi a swi voneke.” 17Kutani a tshinelela laha ndzi yimeke kona, kakuloko a ta, ndzi rhurhumela, ndzi wa hi mombo ehansi, kutani a ku eka mina: “Xiyaxiya, n'wana wa munhu, ku vona loku ku ta hetiseka eminkarhini ya makumu.” 18Kakuloko a ha vulavula na mina, ndzi sele ndzi ri ehansi hi mombo, ndzi titivala kambe a ndzi khumba, kutani a ndzi yimisa laha ndzi yimeke kona. 19Kutani a ku eka mina: “Languta, ndzi ta ku kombisa leswi nga ta humelela emakun'wini ya vukari, hikuva wu kona nkarhi lowu vekeriweke makumu.
20“Khuna rolero u ri voneke ri ri ni timhondzo timbirhi, i tihosi ta Vameda ni Vaperesi, 21xiphongo i hosi ya Yavhani; kutani rimhondzo lero leha leri nge maaveni ya mahlo ya xona, i hosi yo sungula. 22Rimhondzo leri loko ri tshovekile, kutani timhondzo ta mune ti mila ematshan'weni ya rona, hileswaku ku fuma ka mune ku ta huma etikweni lero, kambe ku nga ka ku nga vi na matimba ya rona. 23Emakun'wini ya ku fuma loku, loko vadyohi va tatile mpimo, ku ta humelela hosi ya mombo wa tihanyi ni ya vutlhari byo hlavutela swihundla. 24Ma tsimba ya yona ma ta engeteleka, kambe ma nga ri matimba ya yona, yi ta onha hi mukhuva lowu hlamarisaka, yi kateka, yi va yi hetisisa, yi lovisa tinhenha ni tiko ra vahlawuriwa. 25Kutani hikwalaho ka ku tlhariha ka yena, mano ma ta kateka emavokweni ya yona, kutani yi ta tikurisa embilwini ya yona, yi va yi dlaya lavo tala lava tshameke hi ku tsaka, kutani yi ta pfukela Hosi ya tihosi matimba, kambe yi ta tshoviwa ku nga ri hi voko ra munhu. 26Kutani xivono xa madyambu ni xa mixo lexi vuriweke, hi swona kunene. Loko u ri wena, funengeta xivono xolexo, hikuva xi langutele mikarhi leya ha riki ekule ngopfu.”
27Kutani mina, Daniele, ndzi wa ndzi titivala, ndzi vabya masikunyana, kutani ndzi pfuka, ndzi khoma ntirho wa hosi, ndzi ri karhi ndzi hlamala hi xivono xolexo; kambe a ku nga ri na munhu loyi ngi a xi tiva.
