DEUTERONOMA 14

₁“Mi vana va Yehovha, Xikwembu xa n'wina: Mi nga tshuki mi titlhavela tinhlanga emirini, kambe mi nga tshuki mi byewula misisi emahlweni hikwalaho ka mufi. ₂Hikuva u tiko leri hlawuleriweke Yehovha, Xikwembu xa wena, kambe Yehovha u ku hlawurile leswaku u va tiko ra yena ra xiviri, exikarhi ka matiko hinkwawo lama nga ehenhla ka misava.

₃“U nga tshuki u dya xilo ni xin'we lexi yilaka. ₄Leswi hanyaka leswi mi nga ta swi dya, hi leswi: ₅homu ni nyimpfu ni mbuti, ni nhlangu, ni mhunti, ni mhitlwa, ni mhalamhala, ni nhongo, ni nyarhi, ni nhutlwa. ₆Mi ta dya swifuwo hinkwaswo leswa min'wala leyi avanyisiweke ni swa masondzo lama endlaka maharhi leswi nga ni min'wala mimbirhi, ni leswi hlampfunhaka. ₇Kambe leswi mi nga ta ka mi nga swi dyi exikarhi ka leswi hlampfunhaka, ni le xikarhi ka leswi nga ni min'wala leyi avanyisiweke, ni sondzo leri endlaka maharhi, hi leswi: kamela, ni mpfundla ni mbila, hikuva swa hlampfunha, kambe min'wala ya swona a yi avanyisiwanga, swi ta va leswi nga tengangiki eka n'wina; ₈ni nguluve, hikuva min'wala ya yona yi avanyisiwile kambe a yi hlampfunhi; yi ta va leyi nga tengangiki eka n'wina. Mi nga tshuki mi dya nyama ya swona, ni ku khumba mitsumbu ya swona.

₉“Leswi mi nga ta swi dya eka hinkwaswo leswi nga ematini hi leswi: Mi ta dya hinkwaswo leswi nga ni swicapila ni tihakatimba; ₁₀kambe hinkwaswo leswi pfumalaka swicapila ni tihakatimba, mi nga swi dyi, a swi tenganga eka n'wina.

₁₁“Mi ta dya tinyanyana hinkwato leto tenga. Kambe leti mi nga ta ka mi nga ti dyi, hi leti: ₁₂gama ni hwati, ni koti, ni rhandzala, ni tinxaka hinkwato ta swimhungu; ₁₃tinxaka hinkwato ta mawukuwuku; ₁₄yimbhu, ni nkhuhunu, ni nánána, ni tinxaka hinkwato ta tinkamane, ₁₅xikotlwane, ni n'wapekupeku, ni munyanyane, ₁₆ni muswe, ni gumba, ni mavalange; ₁₇ni ntsavila, ni tinxaka hinkwato ta nyakukolwe, ₁₈gondzo ni mangadyana. ₁₉Hinkwaswo leswitsongo leswi hanyaka leswi nga ni timpapa swi ta yila eka n'wina, mi nga xi dyi. ₂₀Mi ta dya tinyanyana hinkwato leti tengeke.

₂₁“Mi nga dyi ntsumbu ni wun'we. U ta swi nyika muluveri la akeke emitini ya wena, a swi dya; kumbe u ta swi xavisa eka wamatiko; hikuva u tiko leri hlawuleriweke Yehovha, Xikwembu xa wena.

“U nga tshuki u sweka ximbutana entswambeni wa mana wa xona.

₂₂“U ta pambula swa vukhume eka hinkwaswo leswi nga ta huma etimbewini ta wena, leswi nga ta mila ensin'wini ya wena hi lembe rin'wana ni rin'wana. ₂₃Kutani u ta dya emahlweni ka Yehovha Xikwembu xa wena exivandleni lexi a nga ta xi hlawula ku akisa vito ra yena kona, swa vukhume bya koro ya wena, ni bya vhinya ya wena, ni bya mafurha ya wena, ni mativula ya swifuwo swa wena leswikulu ni leswitsongo, u ta dyondza hakona ku chava Yehovha, Xikwembu xa wena, hi masiku hinkwawo. ₂₄Kutakuloko ndlela yi va yi lehile eka wena, kutani u tsandzeka ku rhwala swa vukhume bya wena, hikuva xivandla xi ve kule na wena, lexi Yehovha, Xikwembu xa wena, a xi hlawuleke ku akisa vito ra yena kona; ₂₅kuteloko Yehovha, Xikwembu xa wena, a ku katekisile, u ta xava mali hi xona xa vukhume kutani u ta suka u tamele mali leyi evokweni ra wena, u ya exivandleni lexi Yehovha, Xikwembu xa wena, a xi hlawuleke; ₂₆kutani u ta xava kona hinkwaswo leswi mbilu ya wena yi swi rhandzaka, hambi swi ri swifuwo leswikulu ni leswitsongo, hambi yi ri vhinyo ni byalwa ni hinkwaswo leswi mbilu ya wena yi nga ta swi rhandza; u ta dya kona emahlweni ka Yehovha, Xikwembu xa wena, u titsakela wena ni yindlu ya wena. ₂₇Kambe u nga rivali Mulevhi la nga emitini ya wena hikuva a nga na ku averiwa ndzhaka kun'we na wena.

₂₈“Kutakuloko ku hundzile malembe manharhu, u ta humesa swa vukhume hinkwaswo swa leswi u swi tshoveleke hi lembe leri, u ta swi veka emindyangwini ya wena. ₂₉Kutani Mulevhi u ta ta (hikuva a nga na ku averiwa ni ndzhaka na wena), ni muluveri, ni xisiwana ni wansati wa noni, lava nga emitini ya wena, va ta dya va xurha; hi kona Yehovha, Xikwembu xa wena a nga ta ku katekisa emitirhweni hinkwayo leyi u nga ta yi tirha hi mavoko ya wena.