EKLESIASTA 4

₁Ndzi engeta kambe ndzi tsundzuka maxangu hinkwawo lama humelelaka ehansi ka dyambu, ndzi vona mihloti ya lava xanisiwaka, kambe ku nga ri na loyi a va miyetaka. Tlhelo ra vaxanisi va vona, ndzi vona ku nonon'hwa, kambe ku nga ri na mumiyeti wa vona. ₂Ndzi va ndzi ku: “Vafi lava feke khale va katekile ku tlula vahanyi, lava nga karhi va hanyaka.” ₃Kutani ndzi ku: “La katekeke ngopfu ku tlula hinkwavo, hi loyi a nga siki vaka kona, la nga siki vonaka ku endla ku biha loku endliwaka ehansi ka dyambu.”

₄Kambe ndzi tsundzukile ntirho hinkwawo ni ntirho wihi ni wihi lowu nga ni vutlhari, kutani ndzi vonile leswaku munhu un'wana u ni mona eka un'wana. Na swona i swahava ni ku landza mheho. ₅Xiphukuphuku xi phutsa mavoko, xi dya nyama ya xiviri xa xona. ₆Xandla xi ri xin'we lexi teleke hi ku wisa, xi sasekile ku tlula swandla swimbirhi leswi teleke hi ku karhala ni ku landza mheho.

₇Ndzi engeta ndzi vona vuhava byin'wana lebyi nga kona ehansi ka dyambu. ₈I munhu la tshameke a ri swakwe, a nga riki na wa vumbirhi, la pfumalaka n'wana kumbe makwavo; hambiswiritano, ntirho wa yena a wu na makumu, na wona mahlo ya yena a ma xurhi rifuwo. Xana ndzi tikarhatela mani, ndzi tsona moya wa mina ku kateka hikwalaho ka mani? Xolexo, na xona, i vuhava, i mhaka leyi nga humeseriki nchumu.

₉Vambirhi va tlula un'we, hikuva va ni hakelo leyinene ya ntirho wa vona. ₁₀Hambi va wa, un'wana u ta pfuxa nakulobye; kasi la nga swakwe u ni khombo, loko a wa, a nga na wa vumbirhi la n'wi pfuxaka. ₁₁Na swona, loko vambirhi va etlela kun'we va kufumela, kambe la nga swakwe a nga kufumerisa ku yini xana? ₁₂Hambi un'wana a nga ta pfukela la nga swakwe matimba, loko va ri vambirhi va nga n'wi hlula; na rona ringhole ra miluko minharhu a ri hatlisi ku tsemeka.

₁₃N'wana la tlhariheke wa xisiwana u tlula hosi leyi dyuhaleke ya xiphukuphuku, leyi nga riki na ku tsundzuxiwa. ₁₄Hikuva a nga fuma a humile endlwini ya vabohiwa kumbe xi ri xisiwana eku fumeni ka yena. ₁₅Ndzi vonile hinkwavo lava hanyaka ehansi ka dyambu loko va landzela n'wana la fanelaka ku tlhandlama hosi evuhosini. ₁₆A ku nga ri na ku hela ka vanhu valavo, hambi ku ri eka hinkwavo lava a va ri emahlweni ka vona. Hambiswiritano, lava nga ta ta endzhaku, va nga ka va nga n'wi tsakeri. Swoleswo, na swona, i vuhava ni ku landza mheho.