EKSODA 21

₁“Hi yona milawu leyi u nga ta va lerisa yona:

₂“Kutakuloko u xave khumbi ra Muheveru, ri ta ku tirhela malembe ya ntlhanu na rin'we, kambe hi lembe ra ntlhanu na mambirhi, ri ta tshunxeka ntsena, ri nga rihanga ha nchumu. ₃Loko ri fikile eka wena ri ri roxe, ri ta muka ri ri roxe; loko a ri ri ni nsati, ri ta suka ni nsati wa rona. ₄Loko n'wini wa rona a ri nyikile nsati, kutani nsati loyi loko a ri velekele vana, wansati ni vana va rona va ta va va n'wini wa rona, kambe rona ri ta huma ri ri roxe. ₅Kutakuloko khumbi ri ku: ‘Ndzi rhandza n'wini wa mina, ndzi rhandza ni nsati wa mina ni vana vanga, ndzi nga ka ndzi nga suki,’ ₆n'wini wa rona u ta ri tisa emahlweni ka Xikwembu, a ri tshinetela kusuhi ni rivanti erimbeni ra rona, kutani n'wini wa rona u ta ri boxa ndleve hi risungunhu, kutani ri ta n'wi tirhela masiku hinkwawo.

₇“Loko munhu a xavisile n'wana wa yena wa wanhwana, a n'wi endle khumbi, a nga ka a nga humi kukota makhumbi. ₈Loko a nga tsakisi mahlo ya n'wini wa yena la rhandzeke ku n'wi teka, u ta kutsuriwa; a nga ka a nga n'wi xavisi etikweni rin'wana, hikuva u n'wi kanganyisile. ₉Loko a rhandza ku n'wi tekanisa ni n'wana wa yena, u ta n'wi endla hilaha ku endliwaka eka vana. ₁₀Loko a teke nsati un'wana, a nga tshuki a hunguta nchumu eka swakudya, ni tinguvu, ni le ka timfanelo ta vukati. ₁₁Loko a nga n'wi endleli swilo leswinharhu, u ta tshunxeka ntsena, a nga rihi ha nchumu.

₁₂“Loko munhu a dlaye un'wana, na yena, u ta fanela ku dlawa kunene. ₁₃Loko a nga n'wi dlayanga ha vomu, kambe Xikwembu xi n'wi dlele hi voko ra yena, ndzi ta ku lavela xivandla laha a nga ta balekela kona. ₁₄Loko un'wana a pfukele un'wana hi matimba ku n'wi dlaya ha vomu u ta n'wi khoma ku n'wi dlaya, hambi a balekele egandzelweni.

₁₅“La beke tata wa yena kumbe mana wa yena, u ta dlawa.

₁₆“Loko un'wana a yive munhu ku n'wi xavisa, kutani a kumiwa emavokweni ya yena, muyivi u ta dlawa.

₁₇“La rhukaneke tata wa yena kumbe mana wa yena, u ta dlawa.

₁₈“Loko vanhu va kanetana hi mhaka, kutani un'wana a ba un'wana hi ribye, kumbe hi xibakela, kutani a nga fi, kambe a etlele emasangwini; ₁₉loko a pfuka a xongotela hi nhonga, la n'wi beke u ta pfumala nandzu; ntsena u ta riha ku tshama ka yena, a n'wi ongola a kondza a hanya swinene.

₂₀“Loko munhu a ba nandza wa yena wa wanuna, kumbe wa wansati hi nhonga, kutani a fela emavokweni ya yena, u ta rihiwa. ₂₁Kambe loko a hanya siku rin'we kumbe mambirhi, a nga ka a nga rihiwi hikuva i mali ya yena.

₂₂“Loko vanhu va lwa, kutani va wisa wansati la tikeke, loko a humeriwa hi khwiri, kambe a nga fi, u ta rihiwa hi hakelo leyi nga ta vekiwa hi nuna wa yena; u ta rihiwa emahlweni ka vaavanyisi. ₂₃Kambe loko wansati a fa, u ta riha vutomi hi vutomi, ₂₄tihlo hi tihlo, tino hi tino, voko hi voko, nenge hi nenge, ₂₅ku tshwa hi ku tshwa, mbanga hi mbanga, mimpfembeti hi mimpfembeti.

₂₆“Loko munhu a be tihlo ra nandza wa yena wa wanuna, kumbe wa wansati, a ri lamata, u ta n'wi tshunxa a tifambela hikwalaho ka tihlo ra yena. ₂₇Loko a tshove tino ra nandza wa yena wa wanuna kumbe wa wansati, u ta n'wi tshunxa hikwalaho ka tino ra yena.

₂₈“Loko homu yi tlhava hi timhondzo wanuna kumbe wansati, kutani a fa, homu leyi, yi ta khandliwa hi maribye; nyama ya yona yi nga tshuki yi dyiwa; loko a ri n'wini wa homu, yena a nga na nandzu. ₂₉Kambe homu leyi, loko yi tolovele ku tlhava hi timhondzo, kutani n'wini wa yona a tsundzuxiwa, kambe a nga yi hlayisanga; kutakuloko yi dlaya wanuna, kumbe wansati, yi ta khandliwa hi maribye, na yena n'wini wa yona u ta dlawa. ₃₀Loko a rihisiwa, u ta humesa hakelo ya vutomi bya yena, hilaha va nga ta n'wi lerisa hakona. ₃₁Loko homu leyi, yi tlhave jaha kumbe wanhwana, yi ta endliwa hi nawu lowo. ₃₂Loko yi tlhave khumbi ra wanuna kumbe ra wansati, n'wini wa rona u ta riheriwa hi mali ya makume manharhu ya tixikele, kutani homu yi ta khandliwa hi maribye.

₃₃“Loko munhu a cerile rindzi kumbe khele, kutani a nga ri seleteri kutani homu kumbe mbhongolo yi wela kona, ₃₄n'wini wa rindzi u ta rihela n'wini wa xifuwo hi mali ya xona, kambe nyama ya xona yi ta va ya yena.

₃₅“Kutakuloko homu ya munhu yi tlhave homu ya un'wana, kutani yi fa, va ta xavisa homu leyi hanyaka va ta hungulelana mali ya yona, va pambulelana ni homu leyi nga fa. ₃₆Kambe loko homu leyi, yi tiviwa leswaku yi tolovele ku tlhava ni khale kutani n'wini wa yona a nga yi languteri, u ta riha homu hi homu, kambe leyi nga fa yi ta va ya yena.”