EKSODA 8

₁Kutani Yehovha a ku eka Muxe: “Yana eka Faro, u ku eka yena: Yehovha u te: ‘Tshika tiko ra mina ri ya ndzi tirhela; ₂kambe loko u ala ku ri tshunxa ndzi ta ba tiko hinkwaro ra wena hi mitlambya: ₃Nambu wu ta tala hi yona, yi ta khandziya yi nghena endlwini ya wena, ni le byetlelweni bya wena, ni le xilawini xa wena, ni le tindlwini ta malandza ya wena, ni ta tiko ra wena, etimbiteni ni le swidyelweni swa wena. ₄Mitlambya yi ta khandziya ehenhla ka wena, ni le henhla ka tiko ra wena, ni le henhla ka malandza hinkwawo ya wena.’ ”

₅Kutani Yehovha a ku eka Muxe: “Byela Aroni, u ku: Tlakusa voko ra wena ni nhonga ya wena emilambyeni ni le migerhweni ni le mativeni, u humesela tiko ra Egipta mitlambya.” ₆Kutani Aroni a tlakusa voko ra yena ematini ya Egipta, mitlambya yi huma, yi tata tiko ra Egipta. ₇Kambe tin'anga na tona ti endlisa sweswo hi vutlhari bya tona: ti humesela tiko ra Egipta mitlambya.

₈Kutani Faro a vitana Muxe na Aroni, a ku eka vona: “Khongelani Yehovha leswaku a susa mitlambya eka mina ni le ka tiko ra mina, hi kona ndzi nga ta tshunxa tiko, ri ya gandzela Yehovha.”

₉Muxe a ku eka Faro: “U nga tidzunisa ha mina! Ndzi byele nkarhi lowu ndzi nga ta ku khongelela ha wona, wena ni malandza ya wena, ni tiko ra wena, leswaku mitlambya yi suka eka wena ni le tindlwini ta wena, yi sala enambyeni ntsena.”

₁₀Faro a ku: “Nimixo.”

Muxe a ku: “A swi ve tano, u ta tiva hakona leswaku a ku na loyi a fanaka na Yehovha, Xikwembu xa hina. ₁₁Mitlambya yi ta suka eka wena, ni le ka malandza ya wena, ni le ka tiko ra wena, yi sala enambyeni ntsena.” ₁₂Muxe na Aroni va suka emahlweni ka Faro; kutani Muxe a huwelela eka Yehovha hikwalaho ka mitlambya leyi a beke Faro ha yona. ₁₃Yehovha a endla hilaha Muxe a kombeleke hakona; mitlambya yi fa etindlwini ni le mitini ni le masin'wini; ₁₄kutani va yi hlengeleta va endla tinhulu letikulu, misava yi nun'hwa yona. ₁₅Kambe Faro loko a vona leswaku u pfuniwile, a ti nonon'hwisa mbilu, a nga va yingisanga, hilaha Yehovha a nga vula hakona.

₁₆Kutani Yehovha a ku eka Muxe: “Byela Aroni, u ku: Tlakusa nhonga ya wena, u ba ntshuri wa misava, wu ta hundzuka tin'hwala etikweni hinkwaro ra Egipta.” ₁₇Kutani va endlisa sweswo; Aroni a tlakusa voko ra yena a tamele nhonga, a ba ntshuri wa misava; wu hundzuka tin'hwala eka vanhu ni le ka swifuwo. Ntshuri hinkwawo wu hundzuka tin'hwala etikweni hinkwaro ra Egipta. ₁₈Tin'anga na tona ti endla hi vutlhari bya tona, leswaku ti humesa tin'hwala; kambe ti tsandzeka. Kutani tin'hwala ti va kona eka vanhu ni le ka swifuwo. ₁₉Kavaloko tin'anga ti ku eka Faro: “I ritiho ra Xikwembu!” Hambiswiritano, mbilu ya Faro yi nonon'hwa, a nga yingisanga hilaha Yehovha a nga vula hakona.

₂₀Kutani Yehovha a ku eka Muxe: “Pfuka wa ha ri mixo, u ya yima emahlweni ka Faro loko a ta huma ku ya enambyeni, u ku eka yena: Yehovha u te: ‘Tshunxa tiko ra mina ri ya ndzi tirhela! ₂₁Hikuva loko u ala ku tshunxa tiko ra mina, ndzi ta rhuma mabawa ehenhla ka wena, ni le henhla ka malandza ya wena ni le ka tiko ra wena, ni le tindlwini ta wena; tindlu ta Vaegipta ti ta tala hi mabawa, ni misava yi ta funengetiwa hi wona. ₂₂Kambe hi siku rero ndzi ta hlawula tiko ra Goxeni, leri tiko ranga ri tshamaka eka rona, ku nga ka ku nga tshami mabawa kona u ta tiva hakona leswaku mina Yehovha ndzi kona exikarhi ka tiko leri. ₂₃Ndzi ta veka ku avanyisa exikarhi ka tiko ra mina ni tiko ra wena; xikombiso lexi xi ta humelela mundzuku.’ ” ₂₄Kutani Yehovha a endlisa sweswo. Mabawa layo tala ma ta endlwini ya Faro, ni le tindlwini ta malandza ya yena, ni le tikweni hinkwaro ra Egipta, tiko ri onhaka hi mabawa.

₂₅Faro a vitana Muxe na Aroni, a ku eka vona: “Fambani mi ya gandzela Xikwembu xa n'wina etikweni leri.”

₂₆Kutani Muxe a ku: “A swi hi faneri ku endlisa sweswo, hikuva magandzelo lawa hi gandzelaka Yehovha, Xikwembu xa hina, ha wona, swi ta va leswi yilaka eka Vaegipta. Xana loko hi tlhava leswo yila emahlweni ka Vaegipta, xana va nga ka va nga hi khandli hi maribye xana? ₂₇Hi ta famba mpfhuka wa masiku manharhu emananga, hi kona hi nga ta gandzela Yehovha, Xikwembu xa hina, hilaha a nga ta hi byela hakona.”

₂₈Kutani Faro a ku: “Ndzi ta mi tshunxa mi ya gandzela Yehovha, Xikwembu xa n'wina emananga, kambe mi nga tshuki mi ya ekule; ndzi khongeleleni.”

₂₉Muxe a ku: “Ndzi ta suka eka wena, ndzi ya khongela Yehovha, kutani mundzuku mabawa ma ta suka eka Faro, ni le ka malandza ya yena, ni le ka tiko ra yena. Kambe Faro a nga ha engeti a hi kanganyisa, a ala ku tshunxa tiko, ri ya gandzela Yehovha.”

₃₀Kavaloko Muxe a suka emahlweni ka Faro, a ya khongela Yehovha. ₃₁Kutani Yehovha a yingisa ku khongela ka Muxe, a susa mabawa eka Faro, ni le ka malandza ya yena, ni le tikweni ra yena, ri nga sari ni rin'we. ₃₂Kambe Faro a engeta a ti nonon'hwisa mbilu, a ala ku tshunxa tiko.