EZEKIELE 12

₁Rito ra Yehovha ri humelela eka mina, ri ku: ₂“N'wana wa munhu u tshamile exikarhi ka yindlu ya vatiarisi lava nga ni mahlo ku vona, kasi a va voni, va ni tindleve ku yingisa kasi a va yingisi, hikuva i va yindlu yo tiarisa. ₃Hikwalaho, n'wana wa munhu, u tilunghisela nhundzu ya ku rhurha, u rhurha ni nhlekanhi emahlweni ka vona; u ta suka halenu, u ya kun'wana emahlweni ka vona. Kumbe va ta swi vona leswaku i va yindlu ya ku tiarisa. ₄Humesa nhundzu ya wena yo rhurha ninhlekanhi, emahlweni ka vona; kambe wena, huma nimadyambu emahlweni ka vona, hilaha vakhomiwa va sukaka hakona. ₅U ta boxa khumbi emahlweni ka vona, u humesa nhundzu ya wena hi mbhovo. ₆Emahlweni ka vona u ta yi rhwexa emakatleni, u yi humesa nivusiku, u karhi u tifunengeta mombo leswaku u nga voni misava; hikuva ndzi ku vekile ku va xikombiso eka yindlu ya Israele.”

₇Ndzi endla hilaha ndzi lerisiweke hakona: Ninhlekanhi, ndzi humesa nhundzu ya mina, nhundzu ya ku rhurha, nimadyambu, ndzi boxa khumbi hi mavoko ya mina; loko byi ri vusiku, ndzi humesa nhundzu ya mina, ndzi tirhwexa emakatleni emahlweni ka vona.

₈Ni mixo, rito ra Yehovha ri humelela eka mina, ri ku: ₉“N'wana wa munhu, xana yindlu ya Israele, yindlu ya vatiarisi, yi ku vutisile lexi u xi endleke xana? ₁₀U va byela, u ku: ‘Ku vula Hosi Yehovha: Vuprofeta lebyi, byi komba hosana leyi nga eYerusalema, ni yindlu hinkwayo ya Israele leyi nga exikarhi ka wona.’

₁₁“U ku: ‘Ndzi xikombiso eka n'wina; hilaha ndzi nga endla hakona, ku ta endliwa ni ka vona, va ta suka ku ya evukhumbini.’ ₁₂Hosana leyi nga exikarhi ka vona yi ta rhwala nhundzu ya yona ekhatleni, emunyameni, kutani yi ta huma. Va ta boxa khumbi ku n'wi humesela ehandle, u ta funengeta mombo wa yena leswaku a nga voni misava hi mahlo ya yena. ₁₃Ndzi ta andlala rikoka ehenhla ka yena, u ta phasiwa hi rona, ndzi ta n'wi yisa eBabilona, etikweni ra Vakalediya; kambe a nga ka a nga ri voni, kambe u ta fela kona. ₁₄Hinkwavo lava n'wi rhendzelaka, lava n'wi pfunaka, ni mavandla ya yena hinkwawo, ndzi ta va hangalasa ematlhelweni hinkwawo, ndzi va hlasela hi fumu. ₁₅Loko ndzi va hangalasile exikarhi ka matiko, va ta tiva leswaku hi mina Yehovha. ₁₆Kambe ndzi ta siya van'wana va vona, lava nga ta pona fumu, hambi ndlala, ni ntungu, leswaku va hlaya manyala ya vona ematikweni lawa va nga ta ya kona. Va ta tiva leswaku hi mina Yehovha.”

₁₇Rito ra Yehovha ri ndzi humelela, ri ku: ₁₈“N'wana wa munhu u ta dya vuswa bya wena hi ku rhurhumela, u ta nwa mati ya wena hi ku chava, ni gome. ₁₉U ta byela vanhu va tiko u ku: Ku vula Yehovha Xikwembu eka vanhu va Yerusalema, etikweni ra Israele, a ku: Va ta dya vuswa bya vona hi gome va ta nwa mati ya vona hi ku hlunama; hikuva tiko ri ta phangiwa hikwalaho ka ku homboloka ka vaaki hinkwavo va rona.” ₂₀Miti leyi teleke hi vanhu, yi ta lovisiwa, tiko ri ta hundzuka mananga, mi ta tiva hakona leswaku hi mina Yehovha.

₂₁Rito ra Yehovha ri humelela eka mina, ri ku: ₂₂“N'wana wa munhu, xivuriso xa n'wina xi lo yini lexi nge: ‘Masiku ma hundza, kasi vuprofeta a byi humeleri’? ₂₃Hikwalaho, u ku eka vona: ‘Yehovha Xikwembu u ri: Ndzi ta mi tshikisa xivuriso lexi; a xi nga ha twakali etikweni ra Israele.’ Kambe u va byela, u ku: Nkarhi wu kusuhi, vuprofeta hinkwabyo byi ta humelela. ₂₄Hikuva a ku nga ha vi na vuprofeta bya hava, ni ku bvumbha loku kanganyisaka endlwini ya Israele. ₂₅Hikuva mina Yehovha, ndzi ta vulavula, ndzi va ndzi tiyisa leswaku leswi ndzi swi vulaka ndzi swi vurile, swi ta hatla ku humelela, sweswisweswi, wena, yindlu ya vatiarisi, ndzi ta humesa rito, ndzi ri hetisa kan'we, ku vula Yehovha Xikwembu!”

₂₆Rito ra Yehovha ri engeta ri ku eka mina: ₂₇“N'wana wa munhu, va yindlu ya Israele va ri: ‘Xivono lexi munhu loyi a xi vonaka, xi ta teka masiku yo leha ku humelela; u profetile swa nkarhi lowu nga ekule.’ ₂₈Kwalaho u ku eka vona: Hosi Yehovha u ri: A ku na rito, hambi ri ri rin'we ra mina leri nga ta hlwela ku humelela; rito leri ndzi ri vulaka ri ta endleka, ku vula Hosi Yehovha.”