EZEKIELE 15

₁Rito ra Yehovha ri ta eka mina, ri ku: ₂“N'wana wa munhu, rikunyi ra vhinya ri tlula ha yini tihunyi tin'wana xana? Ndzi vula rhavi ra vhinya leri nga exikarhi ka mirhi ya xihlahla? ₃Xana ra pfuna mitirho ya muvatli? Xana ku vatliwa mhingu ha rona ku hayeka xilo? ₄Vona, ri hoxiwa endzilweni, ndzilo wu sungula hi matlhelo, wu hetisa ni le xikarhi. Xana ri ta tirha yini-ke? ₅Vona, loko ri nga si tshwa, a ri nga ri na ntirho, ni sweswi leswi ri tshweke, xana va ta kota ku tirha ha rona xana?

₆“Hikwalaho, ku vula Hosi Yehovha a ku: Hilaha, rikunyi ra vhinya ri nga kona exikarhi ka mirhi ya xihlahla, ri hoxiwa endzilweni ku tshwa, hi mukhuva lowo, ndzi ta nyiketa vaaki va Yerusalema. ₇Ndzi ta va holovela; va ponile ndzilo, hambiswiritano, va ta hela hi ndzilo; kutani mi ta tiva leswaku hi mina Yehovha loko ndzi ta va holovela. ₈Ndzi ta endla tiko emananga hikuva va ndzi fularhele, ku vula Hosi Yehovha.”