EZEKIELE 28

₁Rito ra Yehovha ri ta eka mina, ri ku: ₂“N'wana wa munhu, u nge eka hosi ya Tiri, u ku: Hosi Yehovha u ri: Hikuva mbilu ya wena yi titlakusile, u vule leswaku: ‘Ndzi xikwembu, ndzi tshame exitshan'weni xa Xikwembu, exikarhi ka malwandle,’ kambe u munhu, a ku Xikwembu, hambi u veke mbilu ya wena ku fana ni mbilu ya Xikwembu. ₃Vona, u tlharihe ku tlula Daniele; a ku na vutumbelo lebyi fihliweke eka wena. ₄Hi vutlhari bya wena ni ku anakanya ka wena u tiendlele xuma, u tihlengeletele nsuku ni silivhere evuhlayiselweni bya wena. ₅Hi vukulu bya vutlhari bya wena, ni mabindzu ya wena, u andzise rifuwo ra wena, kutani mbilu ya wena yi titlakusile hi rifuwo ra wena. ₆Hikwalaho, Hosi Yehovha u ri: Hikuva u veke mbilu ya wena kukotisa mbilu ya xikwembu, ₇vona, ndzi ta ku tisela vamatiko, lava chavisaka exikarhi ka matiko; va ta koka mafumu ya vona ku onha vutlhari bya wena lebyo saseka, va nyamisa ku kwetsima ka wena. ₈Va ta ku xikisela enceleni, u ta fa hi rifu ra lava tlhaviweke eswidziveni swa malwandle. ₉Xana u ta ku, ndzi xikwembu, emahlweni ka la nga ta ku tlhava xana? Kambe u munhu ku nga ri xikwembu, evokweni ra la ku tlhavaka. ₁₀U ta fa hi rifu ra makhuna, hi mavoko ya vamatiko. Hi mina ndzi vuleke sweswo, ku vula Hosi Yehovha.”

₁₁Rito ra Yehovha ri ta eka mina na kambe, ri ku: ₁₂“N'wana wa munhu, tlakusa xirilo eka hosi ya Tiri, u ku eka yena: Hosi Yehovha u ri: U tikombisile leswaku u hetisekile, u tele vutlhari u hetiserile hi ku saseka. ₁₃A wu ri eEdeni, ensin'wini ya Xikwembu; u funengetiwa hi maribye hinkwawo laya risima, ma nga rubi, ni topazi ni dayimani, ni krisolita, ni onikisi, ni yaspere, ni safiri, ni emeralda, ni karbunkele ni nsuku. Eka wena a ku lunghisiwe ntirho wa madzandzana ni wa timhalamhala, hi siku ra ku endliwa ka wena. ₁₄A wu ri kerubu leyi totiweke leyi ungamelaka; a ndzi ku veke sweswo, u ri entshaveni leyi kwetsimaka ya Xikwembu, a wu famba exikarhi ka maribye ya ndzilo. ₁₅U fambe hi tindlela leti hetisekeke, mpfhuka u tumbuluka ku fikela loko ku biha ku kumiwa eka wena. ₁₆Hi vunyingi bya mabindzu ya wena u tate ku nonon'hwa exikarhi ka wena, kutani u dyohile; ndzi ku hlongorile entshaveni ya Xikwembu kukotisa la nga tengangiki; ndzi ku lovisile, wena kerubu ra musirheleri, u ri exikarhi ka maribye ya ndzilo. ₁₇Mbilu ya wena yi titlakusile hi ku saseka ka wena, u borise vutlhari bya wena hikwalaho ka ku kwetsima ka wena; ndzi ku cukumete ehansi, ndzi ku veke emahlweni ka tihosi, ti ta ku hlalela. ₁₈Hi vunyingi bya ku homboloka ka wena, ni vudyohi bya mabindzu ya wena, u nyamise swivandla leswo kwetsima swa wena. Hilaha ndzi nga humesa ndzilo exikarhi ka wena; wu ku dyile, kutani ndzi ku endle tala ra nkuma emisaveni, emahlweni ka hinkwavo lava ku vonaka. ₁₉Vamatiko hinkwavo lava ingi va tivana na wena, va hlamala ha wena; u endliwe xilo lexi chavisaka kutani a ku nga ha vi kona ni siku ni rin'we.”

₂₀Rito ra Yehovha ri ta eka mina na kambe, ri ku: ₂₁“N'wana wa munhu, rhendzelekisa mombo wa wena tlhelo ra Sidoni, u n'wi profetela, ₂₂u ku: Hosi Yehovha u ri: Vona, ndzi le ka wena, Sidoni; ndzi ta dzunisiwa exikarhi ka wena. Va ta swi tiva leswaku hi mina Yehovha, siku ndzi n'wi humeselaka ku avanyisa, ndzi tiendlaka la hlawulekeke eka yena. ₂₃Ndzi ta n'wi rhumela ntungu ni ngati etindleleni ta yena; lava tlhaviweke va ta wa exikarhi ka yena hi fumu, ri ta n'wi tela ri pfa ematlhelo hinkwawo, va ta swi tiva leswaku hi mina Yehovha. ₂₄A ku nga ha vi na mutwa lowu tlhavaka, kumbe ku tlhava loku vavisaka eka yindlu ya Israele, exikarhi ka hinkwavo lava va rhendzelaka, va nga lava ingi va va xanisa, va ta swi tiva leswaku hi mina Hosi Yehovha.

₂₅“Hosi Yehovha u ri: Siku ndzi hlengeletaka yindlu ya Israele evanhwini lava va hangalasiweke xikarhi ka vona, ndzi ta tiendla la hlawulekeke ha vona emahlweni ka matiko, kutani va ta aka etikweni ra vona leri ndzi ri nyikeke nandza wa mina Yakobo. ₂₆Va ta aka kona hi ku tsaka, va aka tindlu, va byala tivhinya, kutani va ta aka hi ku tsaka, siku ndzi humesaka ku avanyisa ehenhla ka lava ingi a va xanisa, va va rhendzele; va ta swi tiva leswaku hi mina Yehovha, Xikwembu xa vona.”