1“Hosi Yehovha u ri: Nyangwa ya rivala ra le xikarhi, leyi langutaka tlhelo ra vuxa, yi ta pfariwa hi masiku ya ntlhanu na rin'we ya mitirho. Kambe hi siku ra Savata yi ta pfuriwa ni siku ra n'weti loko wu tshamisa. 2Hosi yi ta ta hi ndlela ya rikupakupa ra nyangwa, loko yi ta hi le handle, yi ta yima emahlweni ka marimba ya nyangwa; vaprista va ta tlhava holokosta ya yona ni magandzelo ya yona ya mikhenso. Yi ta khinsama evukandziyweni bya nyangwa, yi humela ehandle; kutani nyangwa yi nga pfariwi ku fikela nimadyambu. 3Vanhu va tiko va ta khinsama emahlweni ka Yehovha enyangweni ya rikupakupa rolero hi Savata, ni loko n'weti wu tshama. 4Holokosta leyi nga ta humesiwa hi hosi emahlweni ka Yehovha hi siku ra Savata, swi ta va, swinyimpfana swa ntlhanu na xin'we leswi pfumalaka xivati, ni khuna leri nga riki na xivati. 5Yona nyiko yi ta va efa yin'we hi khuna; hikwalaho ka swinyimpfana, ku nyika ku ta va leswi yi nga ta rhandza ku humesa xona; loko ma ri mafurha, yi ta humesa hino hi efa.
6“Siku ra n'weti loko wu tshama, va ta humesa nkuzana leyi kalaka xivati, ni swinyimpfana swa ntlhanu na xin'we, ni khuna swi nga leswi pfumalaka xivati. 7Loko yi ri nyiko ya swona, yi ta humesa efa hi khuna; loko swi ri swinyimpfana, yi ta endla hilaha yi nga ta swi kota hakona; loko ma ri mafurha, hino yin'we hi efa. 8Loko hosi yi nghena, yi ta nghena hi ndlela ya rikupakupa ra nyangwa, yi tlhela yi huma ha yona ndlela yoleyo. 9Loko ri ri tiko, loko ri ta emahlweni ka Yehovha hi tinhlengeletano ta mikhuvo, la nga ta nghena hi ndlela ya nyangwa ya n'walungu ku ta khinsama, u ta huma hi ndlela ya nyangwa ya dzonga; la nga ta nghena hi nyangwa ya dzonga, u ta huma hi nyangwa ya n'walungu. Va nga tlheli hi nyangwa leyi va nga nghena ha yona; va huma hilaha va nga lavana na kona. 10Na yona hosi, yi ta nghena yi ri exikarhi ka vona loko va nghena, loko va huma yi ta huma hi mukhuva lowu va humaka ha wona.
11“Emikhubyeni ni le tinhlengeletanweni, nhlengo wu ta va efa hi nkuzana, ni efa hi khuna; loko swi ri swinyimpfana, leswi yi nga ta swi rhandza; mafurha, wona, ma va hino yin'we hi efa. 12Loko hosi yi humesa mhamba hi ku swi rhandza, hambi yi ri holokosta, kumbe magandzelo yo khensa, ma ri magandzelo yo swi rhandza, yi ta pfuleriwa nyangwa ya le vuxeni, kutani holokosta ya yona, kumbe magandzelo ya yona yo khensa swi ta endliwa kukotisa loko ku endliwa hi Savata; yi ta huma, kutani nyangwa yi ta pfariwa loko yi humile.
13“Hi siku rin'wana na rin'wana u ta tlhavela Yehovha holokosta ya xinyimpfana lexi kalaka xivati, xa lembe rin'we. U ta yi humesa mixo wun'wana ni wun'wana. 14Loko wu ri nhlengo, u ta wu humesa swin'we ni xinyimpfana xolexo mixo wun'wana ni wun'wana, ku ta va ku pambula ka vuntlhanu na kan'we eka efa; mafurha wona, u ta teka ku pambula ka vunharhu eka hino ya wona ku olovisa mapa ya mhamba ya Yehovha; hi yona milawu ya ku tiya ya magandzelo lama nga heriki. 15Xinyimpfana xi ta tlhavisiwa sweswo, hi siku rin'wana ni rin'wana nimixo; hi sweswo ni nhlengo ni mafurha; hi yona holokosta leyi nga heriki.
16“Hosi Yehovha u ri: Kutakuloko hosi yi nyika un'wana wa vana va yona nyiko, yi ta va ndzhaka leyi yi nyikaka vana va yona; ku ta va ku averiwa ka vona ka ndzhaka. 17Kambe loko yi nyika nyiko eka un'wana wa malandza ya yona hi xilo xin'wana xa ndzhaka ya yona, swi ta va swa yena nandza ku yisa eka lembe ra ku tshunxeka, kutani swi ta tlhelela eka hosi. Ndzhaka ya yona, i ya vana va yona ntsena. 18Hosi yi nga ka yi nga teki nchumu endzhakeni ya munhu, hi ku n'wi hlongola eka leswi a swi fumeke; yi ta teka leswi yi swi fuweke ku endla ndzhaka ya vana va yena, leswaku ku nga tshuki ku va na munhu etikweni ra mina la hlongoriwaka eka leswi a swi fumeke.”
19Kutani a ndzi nghenisa hi ndlela ya tlhelo ra nyangwa, le makamareni yo kwetsima lama nga ya vaprista, lama languteke tlhelo ra n'walungu; ndzi vona kona xivandla xin'wana emahosi tlhelo ra vupeladyambu. 20Kutani a ku eka mina: “Hi leyi ndhawu leyi vaprista va nga ta sweka kona nyama ya magandzelo ya milandzu ni ya swidyoho; va ta sweka timhamba kona, va nga swi humesi ehandle, erivaleni ra le handle va nga ti kwetsimisa tiko ha tona.”
21Kutani a ndzi humesa erivaleni ra le handle, a ndzi yisa etinhleni ta mune ta rivala; kutani ndzi vona eyinhleni yin'wana ni yin'wana ya rivala a ku ri ni timbalanyana. 22Etinhleni ta mune ta rivala a ku ri ni timbala ta musi, ta ku leha ka swisungunhu swa mune wa makume, ni ku anama ka makume manharhu. Timbala ta mune ta tinhla a ti ri ta mpimo wun'we. 23Kutani rirhangu a ri ri kona, ri rhendzele timbala ta mune; ni switofu swa ku sweka a swi vekiwile ehansi ka rirhangu hi matlhelo hinkwawo. 24Kutani a ku eka mina: “Leyi, i yindlu ya makixi laha vatirhi va yindlu va nga ta sweka magandzelo ya tiko eka yona.”
