EZEKIELE 7

₁Rito ra Yehovha ri ta kambe ka mina ri ku: ₂“N'wana wa munhu, Hosi Yehovha u vulavula ehenhla ka tiko ra Israele, u ri: Ku hela ku fikile; ku hela ku ta humelela emakun'wini ya mune ya misava! ₃Sweswi, ku hela ka wena ku fikile, ndzi ta ku rhumela vukari bya mina, ndzi ku avanyisa hikwalaho ka mikhuva ya wena, ndzi ku nyika hakelo ya manyala hinkwawo ya wena. ₄Mahlo ya mina ma nga ka ma nga ku tsetseleri; ndzi ta pfumala tintswalo, hikuva ndzi ta ku rihisa mitirho ya wena leyo biha, ni manyala ya wena ma ta va exikarhi ka wena, kutani mi ta tiva leswaku hi mina Yehovha.

₅“Hosi Yehovha u ri: Khombo, khombo lero vavisa ra ta. ₆Ku hela ku fikile; ku hetelela ku kona, ku ku langutele; ku fikile kunene. ₇Khombo ri na wena, wena muaki wa tiko! Nkarhi wu fikile, siku ri le kusuhi; ku nga ri ra ku yimbelela etintshaveni, kambe ra ku vaviseka. ₈Sweswi, ndzi ta hetisa vukari bya mina ehenhla ka wena, ndzi ta byi hetisa kunene, ndzi ta ku avanyisa hikwalaho ka mikhuva ya wena, kutani ndzi ta ku rihisela manyala ya wena hinkwawo. ₉Tihlo ra mina ri nga ka ri nga ku tsetseleri, ndzi ta pfumala tintswalo, hikuva ndzi ta ku rhwexa tindlela ta wena, ni manyala ya wena ma ta va exikarhi ka wena, mi ta tiva leswaku hi mina Yehovha la baka.

₁₀“Hi rona siku! Vona, ri fikile! Sweswi ri na wena; rhavi ri humesile swiluva; ku tikurisa ka wena ka voneka. ₁₁Mahlundzu ma pfukile, ma hundzukile nhonga ya ku ba vudyoho. A ku nga sali nchumu eka vona, hambi swa vunyingi bya vona hambi swa rifuwo ra vona; a ku nga vi na swirilo hikwalaho ka vona. ₁₂Nkarhi wu fikile, siku ri tshinelele, muxavi a nga tsaki; muxavisi a nga vileri; hikuva vukari byi le henhla ka vunyingi bya vona. ₁₃Hikuva muxavisi a nga ka a nga tlheri a fuwa leswi a swi xaviseke, hambi a ha hanya hikuva vuprofeta ehenhla ka ntshungu hinkwawo wa vona byi nga ka byi nga tlheri; na swona munhu la hanyaka a nga ka a nga hanyi hikwalaho ka ku dyoha ka yena. ₁₄Va tlhavile mukhosi, va lunghisile hinkwaswo, kambe a ku na loyi a humaka nyimpi, hikuva vukari bya mina byi le henhla ka vunyingi hinkwabyo bya vona.

₁₅“Ehandle ku ni fumu, emutini ku ni ntungu ni ndlala. La nga emasin'wini u ta dlawa hi fumu, la nga emutini u ta lovisiwa hi ntungu ni ndlala. ₁₆Vabaleki va vona va ta tsutsuma etintshaveni, va kotisa matuva ya mikova, un'wana ni un'wana u rila hikwalaho ka ku homboloka ka yena. ₁₇Mandla hinkwawo ma ta va ma tsanile, ni matsolo hinkwawo ma ta nyuka. ₁₈Va ta ambala tinguvu leto khwaxa, ku chava ku va funengeta; tingana ti le mimombyeni ya vona, tinhloko ta vona ti byewuriwile. ₁₉Va ta cukumeta silivhere ya vona emitsendzeleni, ni nsuku wa vona wu ta va thyaka eka vona, kasi silivhere ni nsuku a swi nga koti ku va ponisa esikwini ra vukari bya Yehovha; swi nga ka swi nga ha xurhisi mimoya ya vona, hambi ma ri makhwiri ya vona; hikuva hi swona leswi nga va dyohisa. ₂₀Va tibombisa hi nsuku ni masindza ya vona; va foroma hi swona swifaniso swa tingana ni swikwembu swa vona hikwalaho ndzi swi endle thyaka eka vona. ₂₁Vaendzi va ta swi phanga, vadyohi va misava va ta swi kandziya, va swi swihata. ₂₂Ndzi ta fularhela mombo wa mina eka vona; kutani valala va ta yirisa vukwetsimelo bya mina, vayivi va ta nghena eka byona, va byi nyamisa.

₂₃“Lunghisani tiketana, hikuva tiko ri tele hi ngati ni mangava, muti wu tele hi swidyoho. ₂₄Ndzi ta vitana matiko lama tlulaka matiko hinkwawo hi ku biha, leswaku ma fuwa tindlu ta vona; ndzi ta susa vubombi bya lava tikurisaka, kutani swivandla leswo kwetsima swa vona swi ta nyamisiwa. ₂₅Ku onhaka ku fikile! Va rhandza ku pona, kambe a ku na ku pona. ₂₆Khombo ri landziwa hi khombo rin'wana, nkosi wu ta va ehenhla ka nkosi, va ta lava mahlori eka vaprofeta; kambe vaprista va rivele nawu, a va ha wu tivi, ni vakulukumba va kohla xitsundzuxo. ₂₇Hosi yi le nkosini, n'wana wa yena u le nhlomulweni, mavoko ya vanhu va tiko ma rhurhumela. Ndzi ta va endla hi ku biha ka vona, ndzi va avanyisa hi mitirho ya vona, va ta tiva leswaku hi mina Yehovha.”