EZRA 1

₁Hi lembe ro sungula ra Korexe, hosi ya Peresi, hileswaku ku endlakala rito ra Yehovha leri a ri vuleke hi nomu wa Yeremiya, Yehovha a pfuxa mbilu ya Korexe, hosi ya Peresi, kutani a twarisa hinkwako eku fumeni ka yena hi mukhosi ni matsalwa mhaka leyi nge: ₂“Ku vula Korexe, hosi ya Vaperesi: Yehovha, Xikwembu xa le matilweni, xi ndzi nyikile vuhosi hinkwabyo bya misava; kambe xi ndzi lerisile leswaku ndzi n'wi akela yindlu eYerusalema, etikweni ra Yuda. ₃U kwihi exikarhi ka n'wina la nga wa tiko ra xona? Xikwembu xa yena a xi ve na yena, a ta tlhandlukela eYerusalema, etikweni ra Yuda, a pfuxa yindlu ya Yehovha, Xikwembu xa Israele! Hi xona Xikwembu lexi nga eYerusalema! ₄Kutani hinkwavo lava poneke va tiko ra Yehovha, hinkwako laha va luveleke kona, vanhu va kona a va va pfune hi silivhere, ni nsuku, ni xuma, ni tihomu, swin'we ni magandzelo lama humeseriwaka yindlu ya Xikwembu lexi nga eYerusalema.”

₅Kutani tihosi ta tinyimba ta ka Yuda na Benjamini, ni vaprista, ni Valevhi, swin'we ni lava timbilu ta vona ti pfuxiweke hi Yehovha, va suka va ya aka yindlu ya Yehovha eYerusalema. ₆Kutani hinkwavo lava akisaneke na vona, va va engetela hi timbita ta silivhere, ni ta nsuku, ni xuma, ni tihomu, ni swilo swo saseka, ehandle ka leswi va nga swi humesa hi ku rhandza ka vona.

₇Kambe hosi Korexe a humesa swingolongondzwana swa yindlu ya Yehovha leswi ngi swi tekiwile eYerusalema hi Nebukadnetsara; a a swi vekile endlwini ya xikwembu xa yena. ₈Korexe, hosi ya Peresi, a swi humesa hi voko ra Mitiredata, muhlayisi wa xuma xa yena, kutani a nyika Xexebasara, hosana ya Yuda. ₉Hi lowu ntsengo wa swona: makume manharhu ya mikamba ya nsuku, na khume ra madzana ya mikamba ya silivhere, ni mikwana ya switlhavelo ya 29; ₁₀ni makume manharhu ya mindzheko ya nsuku, ni mindzheko ya silivhere ya rixaka rin'wana ya 410, ni swigotso swin'wana swa 1 000. ₁₁Hinkwaswo swigotso swa nsuku ni silivhere a swi ri swa 5 400. Swilo leswi hinkwaswo, Xexebasara a ya na swona enkarhini lowu lava bohiweke eBabilona va nga tlheriseriwa eYerusalema.